ၵူၼ်းၸၢႆးပၢင်ႁူႈ(ပၢင်ႇဢူႈလူင်)ၵေႃႉၼိုင်ႈ ၺႃးပေႃႉထုပ်ႉ တၢႆဝႆႉၶၢင်ႈတၢင်း။

ၵူၼ်းၸၢႆးၵေႃႉၼိုင်ႈ ၺႃးပေႃႉထုပ်ႉသေ လူႉတၢႆဝႆႉတီႈၶၢင်ႈတၢင်း ႁိမ်းပႃႇၸႃႉ ၵုင်းၼိဝ်ႉ(လက်ပံကုန်း) ၸႄႈဝဵင်းပၢင်ႁူႈ(ပၢင်ႇဢူႈလူင်) မိူဝ်ႈဝၼ်းတီႈ 25/8/2023 ။

ၸုမ်းၸွႆႈတူင်ႇၵူၼ်းတုသီႇတႃႇပၢင်ႁူႈ လၢတ်ႈတီႈၽူႈတွႆႇႁွၵ်ႈဝႃႈ – “ ယွၼ်ႉသင်လႄႈ မၼ်းၺႃးပေႃႉၼႆတႄႉ ႁဝ်းၵေႃႈ ဢမ်ႇႁူႉၸွမ်း။ၵုမ်ႇသုၵ်ႉသၵ်ႉ ၵႂႃႇတေႃႉတူဝ်တၢႆမၼ်းၵွႆး။ဢၼ်မၢတ်ႇၸဵပ်းတႄႉ ၸွမ်းၵွၵ်းႁူဝ်မၼ်းလႄႈ ၸွမ်းၵွင်ႇၵေႃႈမၼ်းၸိူဝ်းၼႆႉဢေႃႈ။ၵူၼ်းဝၢၼ်ႈၶဝ် ၵႂႃႇႁၼ် တူဝ်တၢႆမၼ်း မွၵ်ႈၵၢင်ၼႂ် 8 မွင်းၼႆႉဢေႃႈၼၼ်ႉ” – ဝႃႈၼႆ။

ၵေႃႉဢၼ်ၺႃးပေႃႉၼႆႉ ဢႃယု မီးမွၵ်ႈ 30 ပဵၼ်ၵူၼ်းၼႂ်းဝဵင်းပၢင်ႁူႈၵူၺ်းသေ ၺႃး ပေႃႉတၢႆယဝ်ႉ  ဢဝ်ၵႂႃႇပႅတ်ႈဝႆႉၼွၵ်ႈဝဵင်း။မိူဝ်ႈလဵဝ်ၸုမ်းၸွႆႈတူင်ႇၵူၼ်း ၸွႆႈသူင်ႇၵူတ်ႇထတ်းတီႈႁူင်းယႃသေ ပူၼ်ႉၶၢပ်ႈတူဝ်ယဝ်ႉလီငၢမ်း။

ၸုမ်းၸွႆႈတူင်ႇၵူၼ်းတုသီႇတႃႇပၢင်ႁူႈ သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ႁိမ်းမၼ်းတၢႆၼၼ်ႉ မီးပႃး ပွတ်းမႆႉမွၵ်ႈသွၵ်ႇၼႆႉ ဢၼ်ၼိုင်ႈ။လႅပ်ႈတေပဵၼ်ၶွၼ်ႉ ဢၼ်ပိူၼ်ႈပေႃႉမၼ်းယူႇ ” -ဝႃႈၼႆ။

တီႈဝဵင်းပၢင်ႁူႈၼႆႉ ယွၼ်ႉယႃႈမဝ်းၵမ်သေ ၵူၼ်းလူႉတၢႆၶၢင်ႈတၢင်းၸိူဝ်းၼႆႉ မီးမႃးယူႇသေတႃႉ ဢၼ်ၺႃးပေႃႉသေ ပွႆႇပႅတ်ႈၸိူင်ႉၼႆ ဢမ်ႇပေႃးသူႈမီးၼႆယဝ်ႉ။

ၼႂ်းလိူၼ်ၵျူႊလၢႆႊ ပူၼ်ႉမႃးၼႆႉၵေႃႈ ၼၢင်းယိင်းၵူၼ်းမူႇၸေႊၵေႃႉၼိုင်ႈ ၺႃးပေႃႉ မၢတ်ႇၸဵပ်းႁၢဝ်ႈႁႅင်းသေတၢႆၵိုၵ်းႁိူၼ်း ။မၼ်းၼၢင်းယူႇႁိမ်းသူၼ်မွၵ်ႇ (ထွယ် ပန်းခြံ) ၼႂ်းပွၵ်ႉၸၢၵ်ႈ ၸႄႈဝဵင်းမူႇၸေႊ၊ မီးၵူၼ်းၶဝ်ႈမႃးပေႃႉမၼ်းၼၢင်းထိုင်ၼႂ်းႁိူၼ်း တိူဝ်ႉတီႈႁူဝ် တၢႆထင်တီႈ။