ၼၢင်းယိင်းၵေႃႉၼိုင်ႈ တီႈဝဵင်းပၢင်ႁူႈ(ပၢင်ႇဢူႈလူင်) ပိၼ်ႈတူၵ်းၵႃး မၢတ်ႇၸဵပ်းႁၢဝ်ႈႁႅင်းသေ လူႉတၢႆတီႈႁူင်းယႃ။
မိူဝ်ႈၼႆႉ ဝၼ်းတီႈ 8/6/2023 ယၢမ်းၵၢင်ၼႂ် 8 မူင်းၶိုင်ႈၼၼ်ႉ ၼၢင်းယိင်းၵေႃႉၼိုင်ႈ ပိၼ်ႈတူၵ်းၵႃး ႁိမ်းႁၢၼ်ႉၶဝ်ႈၽၵ်းထဵၵ်ႉတၢၼ်း ၼိူဝ်သဵၼ်ႈတၢင်းလူင် ဝဵင်းလိူဝ်ႇ – လႃႈသဵဝ်ႈၼၼ်ႉသေ မၢတ်ႇၸဵပ်းႁၢဝ်ႈႁႅင်း လူႉသဵင်ႈသၢႆၸႂ် တီႈႁူင်းယႃလူင်ပၢင်ႁူႈ ။
ၽူႈၶဝ်ႈၸုမ်းသၼ်ႇတိသုၶဝဵင်းပၢင်ႁူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မၼ်းၵႂႃႇၸွမ်းၵႃးလုၵ်ႈႁဵၼ်းဢေႃႈၼၼ်ႉ တေဢၢၼ်းၵႂႃႇလႂ် တႄႉဢမ်ႇႁူႉ ၵႂႃႇသူင်ႇလုၵ်ႈသူင်ႇလၢၼ်ၶိုၼ်ႈၵျွင်းႁိုဝ်ၼၼ်ႉၵႂႃႈ ။ မိူဝ်ႈၵႂႃႇထိုင်သႂ်ႇ တီႈၾႆးလႅင်ၼၼ်ႉ သမ်ႉ ၵႃးၵိုတ်းၵမ်းၼိုင်ႈ ။ ၾူၼ်းမၼ်းသမ်ႉ လုတ်ႈတူၵ်းၵႃးၼႆဝႃႈ ။ ၽိူဝ်ႇမၼ်း ၵူမ်ႈသေ ယိုၼ်းဢဝ်သမ်ႉ မႅၼ်ႈမိူဝ်ႈၵႃး ဢွၵ်ႇၵႂႃႇၶိုၼ်းလႄႈ ၶိတ်းတူၵ်းသေ ႁူဝ်ၽတ်ႉသႂ်ႇ သဵၼ်ႈတၢင်းဢေႃႈ ။ ၵွၵ်းႁူဝ်မၼ်းတႅၵ်ႇပေႃး ဢႃႈလူင်ဝႆႉဢေႃႈ ။ ႁဝ်းၵႂႃႇၸွႆႈ သူင်ႇထိုင် ႁူင်းယႃယူႇ။ ဢမ်ႇလႆႈ လူႉတၢႆ ပႅတ်ႈတီႈႁူင်းယႃသေယဝ်ႉဢေႃႈ ” – ဝႃႈၼႆ။
ၼၢင်းယိင်းဢၼ်လူႉတၢႆၵႂႃႇၼႆႉ ဢႃယု မီး ႁိမ်း 50 ပီသေ ပဵၼ်ၵူၼ်းပွၵ်ႉလူင် မၢႆ 1 ၸႄႈဝဵင်းပၢင်ႁူႈ ၵွၵ်းႁူဝ်တႅၵ်ႇ မၢတ်ႇၸဵပ်းႁၢဝ်ႈႁႅင်းလႄႈ ထိုင်တီႈလူႉသုမ်းသၢႆၸႂ် ၼႆယဝ်ႉ ။
ၽူႈၶဝ်ႈၸုမ်းသၼ်ႇတိသုၶဝဵင်းပၢင်ႁူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈဢၼ်ဝႃႈ ၵူၼ်းတူၵ်းၵႃးသေတၢႆၼႆ တီႈဝဵင်းႁဝ်းဢမ်ႇသူႈမီး ၵႃးဢၼ်ၽႃႇၵၼ် တမ်ၵၼ်တႄႉ ၼမ်ဢေႃႈ ။ ပဵၼ်ႁိုဝ်ၵေႃႈ လူဝ်ႇလႆႈ ဝႆႉ သတိၵၼ်ၼမ်ၼမ်ဢေႃႈ ။ ၼင်ႇႁိုဝ်တေ ဢမ်ႇပဵၼ်ၽေးၸိူင်ႉၼႆ။ ၸဝ်ႈၵႃးၶဝ်ၵေႃႈ လူဝ်ႇလႆႈ သႂ်ႇၸႂ်ၼိူဝ် ၵူၼ်းၶီႇၸွမ်းတၢင်းလင်ၽွင်ႈဢေႃႈ ။ ၵွပ်ႈဝႃႈ မၼ်းမီးပုၼ်ႈၽွၼ်းလူဝ်ႇလႆႈတူၺ်းၵႃးမၼ်းတင်းလမ်းယူႇယဝ်ႉ ” – ဝႃႈၼႆ။
မိူဝ်ႈဝၼ်းတီႈ 22/5/2023 ပူၼ်ႉမႃးၼႆႉၵေႃႈ ၵူၼ်းၸၢႆးၵေႃႉၼိုင်ႈ တူၵ်းတၢႆၼႂ်းၼွင်ၶင်ၼမ်ႉ ၼႂ်းသူၼ်ၸဝ်ႈၵဝ်ႇ တီႈဝၢၼ်ႈ တႅတ်ႉၵၢၼ်ႇၶျၢႆး (သက္ကံချိုင်းကျေးရွာ) ၼႂ်းၼႃႈလိၼ် မၢႆ 5 ၸႄႈဝဵင်းပၢင်ႁူႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ