ဝၼ်းတီႈ 20/8/2023 ယၢမ်းလူင်းႁူင်းႁဵၼ်း ၵႃးသိုၵ်းၼႂ်းတပ်ႉဢၼ်မႃးႁၵ်ႉလုၵ်ႈႁဵၼ်းတီႈႁူင်းႁဵၼ်းၸၼ်ႉသုင်မၢႆ 1 တီႈဝဵင်းမိူင်းၵွင် ၸႄႈမိူင်းၶၢင် ၼၼ်ႉၺႃးၸုမ်းဢမ်ႇႁူႉၾၢႆႇယိုဝ်းသႂ်ႇလႄႈ ၵူၼ်းသိုၵ်းဢၼ်မႃးၸွမ်းၵႃး မၢတ်ႇၸဵပ်း 2 ၵေႃႉ။
ပေႃႈမႄႈလုၵ်ႈႁဵၼ်း လၢတ်ႈဝႃႈ “ ရူတ်ႉၵႃးသိုၵ်းမၢၼ်ႈၵိုတ်းၸွတ်ႇပႂ်ႉဝႆႉတႃႇႁပ်ႉလုၵ်ႈႁဵၼ်း။ ၽွင်းၼၼ်ႉ ႁူင်းႁဵၼ်းတႄႉပႆႇပွႆႇလုၵ်ႈႁဵၼ်းၼင်ႇၵဝ်ႇ။ မီးၵူၼ်းၸၢႆးၶီႇရူတ်ႉၶိူင်ႈမႃး 2 ၵေႃႉၼိုင်ႈလမ်း၊ ရူတ်ႉၶိူင်ႈ 2 လမ်း မႃးယိုဝ်းၵႃး။ သိုၵ်းမၢၼ်ႈမီးယူႇၼိူဝ်ၵႃးၼၼ်ႉ 3 ၵေႃႉ။ မၢတ်ႇၸဵပ်းႁႅင်း 2 ၵေႃႉ လႆႈငိၼ်းဝႃႈတၢႆ ၼႆသေတႃႉ ၸွင်ႇတၢႆတႄႉတႄႉဢမ်ႇပႆႇႁူႉ”- ႁွင်ႈၵၢၼ်ၶၢဝ်ႇတႆးလႅင်ပိုၼ်ၽၢဝ်ႇဝႆႉၼင်ႇၼႆ။
ၵူၼ်းဢၼ်ၶီႇရူတ်ႉၶိူင်ႈမႃးယိုဝ်းၵႃးၼၼ်ႉတႄႉ တေႃႇထိုင်ယၢမ်းလဵဝ် သိုၵ်းမၢၼ်ႈယင်းပႆႇတီႉလႆႈ။ တူဝ်သိုၵ်းမၢၼ်ႈမၢတ်ႇၸဵပ်းတႄႉသူင်ႇႁူင်းယႃမျိတ်ႉၵျီးၼႃး (မိူင်းၸေႊၼႃး) ယဝ်ႉ။ လုၵ်ႈႁဵၼ်းတႄႉဢမ်ႇတိူဝ်ႉမၢတ်ႇသေၵေႃႉ။
ဝၢႆးလင်ပိူင်ပဵၼ်ၼႆႉယဝ်ႉ သိုၵ်းမၢၼ်ႈ ဢဝ်ဢဵၼ်ႁႅင်းသိုၵ်းပႂ်ႉၸွမ်းၶူဝ် ႁူဝ်တၢင်းသေ ပႂ်ႉၵူတ်ႇထတ်းၵူၼ်းမိူင်းၵႂႃႇမႃး ယူႇလႆႈႁူႉၼင်ႇၼႆ။
