ဝၼ်းတီႈ 18/08/2023 ဝၼ်းလဵဝ်ၵူၺ်း ရူတ်ႉၵႃးၽႃႇၵၼ် 3 တီႈၼႂ်းၸႄႈဝဵင်းလႃႈသဵဝ်ႈ ၵူၼ်းမၢတ်ႇၸဵပ်းမီး 6 ၵေႃႉ၊ ၸုမ်းၸွႆႈထႅမ်တူင်ႇဝူင်းၵူၼ်းတႄႉလၢတ်ႈဝႃႈပဵၼ်ယွၼ်ႉ ႁေႃႈရူတ်ႉႁေႃႈၵႃးဝႆး ဢမ်ႇၸွမ်းမၢႆမီႈႁေႃႈရူတ်ႉၵႃးဝႃႈၼႆ။
ယၢမ်းၵၢင်ၼႂ် 11 မူင်းၼၼ်ႉၵႃးၽႃႇၵၼ်တီႈသဵၼ်ႈတၢင်းလႃႈသဵဝ်ႈ သႅၼ်ဝီ၊ တီႈတၢင်းလူင်းၵုင်း 16 လၵ်း၊ ၸၢႆး 1 ၵေႃႉယိင်း 2 ၵေႃႉမၢတ်ႇၸဵပ်းလိူဝ်ႁႅင်း။
ၸိူင်ႉၼၼ်ၼင်ႇၵဝ်ႇတီႈသဵၼ်ႈတၢင်းၶူင်ႇႁိူဝ်းမိၼ်ၼၼ်ႉၵေႃႈ ရူတ်ႉၵႃးလႄႈ ရူတ်ႉၶိူင်ႈ ၽႃႇၺႃးၵၼ်။ ၽူႈၸၢႆး 2 ၵေႃႉဢၼ်ၶီႇရူတ်ႉၶိူင်ႈမႃးၼၼ်ႉမၢတ်ႇၸဵပ်းႁၢဝ်ႈႁႅင်း။ ၽွင်းၼၼ်ႉၵူၺ်း ၽူႈၸၢႆးၵေႃႉၼိုင်ႈၶီႇရူတ်ႉၶိူင်ႈမႃးဝႆး မႃးပိၼ်ႈလူမ်ႉထႅင်ႈလႄႈမၢတ်ႇၸဵပ်းႁၢဝ်ႈႁႅင်း – ၸုမ်းၸွႆႈထႅမ်တူင်ႇဝူင်းၵူၼ်းဢၼ်ၵႂႃႇ ဢဝ်တူဝ်မၢတ်ႇၸဵပ်းသူင်ႇပၼ်ႁူင်းယႃၼၼ်ႉလၢတ်ႈ ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ-“တီႈဝဵင်းလႃႈသဵဝ်ႈၼႆႉ ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းတၢင်ႇတီႈတၢင်ႇဝဵင်း မႃးယူႇသဝ်းႁဵတ်းၵၢၼ်ႁႃၵိၼ်လဵင်ႉတွင်ႉၼမ်။ ရူတ်ႉၵႃး ရူတ်ႉၶိူင်ႈၼမ်မႃးၼႃႇယဝ်ႉ။ ဢွၼ်ၵၼ်ၶပ်းႁေႃႈဝႆးလႄႈ ရူတ်ႉၽႃႇၵၼ်၊ ပိၼ်ႈၶွမ်ႈမၢတ်ႇၸဵပ်း မီးၵူႈဝၼ်း။ ” – ဝႃႈၼႆ။
ၸုမ်းၸွႆႈထႅမ်လၢတ်ႈဝႃႈ-ၽူႈၵဵဝ်ႇၶွင်ႈၾၢႆႇရူတ်ႉၵႃးၵေႃႈၵႆႉႁၼ်လူင်းပၼ်ပၢင်သွၼ်ၵဵဝ်ႇၵပ်းမၢႆမီႈလွင်ႈရူတ်ႉၵႃး လွင်ႈၶပ်းႁေႃႈရူတ်ႉၵႃးယူႇ။ ၵူၺ်းၵႃႈ ၵူၼ်းၶပ်းရူတ်ႉၵႃး ဢမ်ႇၸွမ်းမၢႆမီႈလႄႈ ၸင်ႇၵႆႉၽႃႇၵၼ်ဝႃႈၼႆ။
လွင်ႈၼႆႉၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ- “ ၵၢၼ်ပၼ်ပိုၼ်ႉႁူႉတႄႉမီးယူႇ။ ၵူၺ်းၵႃႈပၼ်ပိုၼ်ႉႁူႉတႄႉဢိတ်းဢိတ်းၵူၺ်း၊ ဢၼ်ပႂ်ႉၵူတ်ႇထတ်းတီႉၺွပ်းသမ်ႉၼမ်ၼမ်ၼၼ်ႉၼႃႇ။ ” ဝႃႈၼႆ။
ၸွမ်းၼင်ႇၸုမ်းၸွႆႈထႅမ်ၵဵပ်းသဵၼ်ႈမၢႆဝႆႉတႄႉ ၼႂ်းဝၼ်းတီႈ 1 ထိုင် 19 ၼႂ်းၶၢဝ်းတၢင်း 19 ဝၼ်းၼႆႉၵူၺ်း ရူတ်ႉၵႃးၽႃႇၵၼ်ဢမ်ႇယွမ်း 7 ပွၵ်ႈ ။ ၵူၼ်းမၢတ်ႇၸဵပ်း မီး 14 ၵေႃႉ ၸၢႆး 10 ၵေႃႉ ယိင်း 4 ၵေႃႉ။
