သိုၵ်းမၢၼ်ႈတင်းသိုၵ်းၶၢင် KIA ပိုတ်းယိုဝ်းၵၼ် တီႈၸႄႈဝဵင်းၼမ်ႉတူႈ။

မိူဝ်ႈဝၼ်းတီႈ 17/8/2023 ယၢမ်းႁူဝ်ၶမ်ႈ 4 မူင်းၼၼ်ႉ သိုၵ်းမၢၼ်ႈတင်းသိုၵ်းၶၢင် KIA  မီးလွင်ႈတုမ်ႉတိူဝ်ႉ ပိုတ်းယိုဝ်း ၵၼ်တၢင်း မိူင်းတၢတ်ႇ  ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈတင်းသိုၵ်းၶၢင် တိုၵ်းၵၼ်ၼႆဢေႃႈ။ မိူဝ်ႈယၢမ်းၵၢင်ၼႂ်ၼၼ်ႉ ၵႃးသိုၵ်းမၢၼ်ႈ မွၵ်ႈ 10 လမ်းပၢႆ လုၵ်ႉတၢင်း သီႇပေႃႉမႃး ။ ထႅဝ်ၵႃးၶဝ် မႃးႁူပ်ႉသႂ်ႇ ၸုမ်းသိုၵ်း KIA သေ ၸင်ႇမီးလွင်ႈပိုတ်းယိုဝ်းၵၼ် ၼႆဢေႃႈ ” – ဝႃႈၼႆ။

ပၢင်တိုၵ်းၵမ်းၼႆႉ တႄႇပဵၼ် ႁူဝ်ၶမ်ႈ 4 မူင်း ထိုင် 5 မူင်း ၶၢဝ်းတၢင်း 1 ၸူဝ်ႈမူင်းသေ ၾၢႆႇသိုၵ်းမၢၼ်ႈ ထွႆၵႂႃႇၸူး ဝၢၼ်ႈပဵင်းသႃႇ ဢိူင်ႇမိူင်းတၢတ်ႇၼၼ်ႉ ၼႆယဝ်ႉ။

ၵူၼ်းပိုၼ်ႉတီႈ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ တၢႆ 2 ၵေႃႉ ။ ထိုင်ၵၢင်ၼႂ်မႃး ၶဝ်ၸင်ႇမႃး ၵဵပ်းၶၢပ်ႈတူဝ်တၢႆၵူၼ်းၶဝ် ။ ၼႂ်းၼမ်ႉတူႈၼႆႉၵေႃႈ သိုၵ်းမၢၼ်ႈ တပ်ႉ ၶမယ 324  ၽႄလုၵ်ႈၸုမ်းၶဝ်ဝႆႉ လၢႆပႃႈလၢႆၾၢႆႇ ။ ၼႂ်းဢိူင်ႇၼႂ်းဝၢၼ်ႈၵေႃႈ ယူႇဝႆႉ။မိူၼ်ၼင်ႇ ဝၢၼ်ႈပၢင်လူင်  ၊ မၢၼ်ႈၸၢမ် ၊ တႃႈတေႈ ၊ ၼမ်ႉတွင်ႈၵုင်း ၸိူဝ်းၼႆႉ တီႈႁိမ်းၸိူဝ်းၼၼ်ႉၵေႃႈသမ်ႉမီးဝႆႉ လုၵ်ႈၸုမ်း TNLA ၶဝ်ပၵ်းသဝ်းယူႇဝႆႉထႅင်ႈလႄႈ ၵူဝ်ပဵၼ်ပၢင်တိုၵ်းၵၼ်ထႅင်ႈၵွႆးယဝ်ႉ  ” – ဝႃႈၼႆ။

ၶၢဝ်းတၢင်းသိုၵ်းမၢၼ်ႈ ယိုတ်းမိူင်းမႃးၼႆႉ ပေႃးပဵၼ်ပၢင်တိုၵ်း ၾၢႆႇသိုၵ်းမၢၼ်ႈ တင်ႈၸႂ်ႈယိုဝ်းၶဝ်ႈၼႂ်းဝၢၼ်ႈ ၼႂ်းဢိူင်ႇ ႁဵတ်းႁႂ်ႈၵူၼ်းမိူင်း မႆႈၸႂ်ၵူဝ်ႁႄ ၵူဝ်တိူဝ်ႉၸၢၵ်ႇမၢၵ်ႇ ။ ၼႂ်းလိူၼ်ၵျူႊလၢႆႊပူၼ်ႉမႃးၼႆႉၵေႃႈ ပၢင်တိုၵ်းသိုၵ်းသိူဝ် ပဵၼ်လၢႆလၢႆတီႈ ၾၢႆႇသိုၵ်းမၢၼ်ႈ မီးလွင်ႈမၢတ်ႇၸဵပ်း လူႉသုမ်းၼမ်ၼႆယဝ်ႉ။