ၾႆးမႆႈႁိူၼ်းလင်ၼိုင်ႈ တီႈဝဵင်းသူၺ်ႇၺွင်ႇ လုၵ်ႈဢွၼ်ႇ 5 ၶူပ်ႇၵေႃႉၼိုင်ႈ လူႉတၢႆၵိုၵ်းႁိူၼ်း။

မိူဝ်ႈဝၼ်းတီႈ 14/8/2023 ယၢမ်းၵၢင်ၶိုၼ်း 11 မူင်းပၢႆၼၼ်ႉ  ၾႆးမႆႈႁိူၼ်းလင်ၼိုင်ႈ တီႈပွၵ်ႉဢွင်ႇသပျေႇ ၼႃႈလိၼ်မၢႆ 6 ၸႄႈဝဵင်းသူၺ်ႇၺွင်ႇ ၸႄႈတွၼ်ႈတူၼ်ႈတီး လုၵ်ႈဢွၼ်ႇတၢႆၵိုၵ်းၸွမ်း ၵေႃႉၼိုင်ႈ ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းဝႃႈတႄႉ ၶဝ်တႆႈတဵၼ်းၽြႃးသေၼွၼ်း။ ၾႆးတဵၼ်းၼၼ်ႉ ၸင်ႇလၢမ်းမႆႈ ။ ၶဝ်ယူႇဝႆႉၸွမ်းၵၼ် မီး 4 ၵေႃႉမႄႈလုၵ်ႈဢေႃႈ ။ ၾႆးႁုပ်ႇမႆႈႁႅင်းလႄႈ တၼ်းဢဝ်ၵၼ်ပၢႆႈလွတ်ႈ 3 ၵေႃႉၵူၺ်း။ ဢၼ်လုၵ်ႈဢွၼ်ႇ ဢႃယု 5 ၶူပ်ႇၼၼ်ႉတႄႉ ဢမ်ႇတၼ်းလွတ်ႈ ၶူဝ်းႁိူၼ်းယေးၵေႃႈ ဢမ်ႇတၼ်းလႆႈသင်   ” – ဝႃႈၼႆ။

ႁိူၼ်းဢၼ်ၺႃးၾႆးမႆႈၼႆႉ မီးၵူၼ်းယူႇဝႆႉ 4 ၵေႃႉ ၼႂ်းၼၼ်ႉ မီးလုၵ်ႈဢွၼ်ႇ ဢႃယု 13 ၵေႃႉၼိုင်ႈ ၊ ဢႃယု 14 ၵေႃႉၼိုင်ႈ ၊ ဢႃယု 5 ၶူပ်ႇၵေႃႉလဵၵ်ႉသုတ်းၵေႃႉၼိုင်ႈလႄႈတင်းၵေႃႉပဵၼ်မႄႈၶဝ်ယူႇဝႆႉၸွမ်း။ ဢၼ်ပႃးၵႂႃႇၸွမ်းၾႆးၼႆႉပဵၼ်လုၵ်ႈလဵၵ်ႉ ဢႃယု 5 ၶူပ်ႇ ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၾႆးမႆႈၼၼ်ႉ မွၵ်ႈ ၶိုင်ႈၸူဝ်ႈမူင်းၼႆဢေႃႈ ၸင်ႇမွတ်ႇလႆႈသဵင်ႈ၊ ၸုမ်းၶႄၾႆးလႄႈ ၵူၼ်းႁိမ်းႁွမ်း မႃးၸွႆႈၵၼ်ၶႄ။ၾႆးတဵၼ်းၾႆးၽိုၼ်းၸိူဝ်းၼႆႉ လႆႈၵူဝ်ဢေႃႈ မၼ်းၸၢင်ႈမီးၽေးၾႆးမႆႈ။ ဢၼ်မႆႈၵႂႃႇၼႆႉၵေႃႈ ပႆႇႁူႉဝႃႈ တင်းသဵင်ႈလူႈသုမ်းၵႃႈႁိုဝ် ” – ဝႃႈၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ ၾႆးၾႃႉ ဢမ်ႇမႃးၸွမ်းၶိင်ႇၸွမ်းၶၢဝ်း ၵမ်ႈၽွင်ႈၸႂ်ႉၾႆးၽိုၼ်းၾႆးထၢၼ်ႇ ႁုင်ၶဝ်ႈႁုင်ၽၵ်းသေ ပဵၼ်ၽေးၾႆးမႆႈ ၊ မၢင်ၸိူဝ်း တႆႈတဵၼ်းၸပ်းတဵၼ်းသေ ထိုင်တီႈလၢမ်းမႆႈ လူႉသုမ်းၶိူင်ႈၶူဝ်းႁိူၼ်းယေးတင်းလင်။