ၸဝ်ႈႁႆႈၸဝ်ႈၼႃး ၼႂ်း ၸေႈဝဵင်းယွင်ႁူၺ်ႈ လၢႆဢိူင်ႇလၢႆထုင်ႉ ႁူမ်ႈၵၼ် ၼေၵၢင်ၸႂ်တုၵ်းယွၼ်းႁႂ်ႈ လူင်ပွင်ၸိုင်ႈ ၶိုင်ပၼ်တႃႇလႆႈတီႈလိၼ်ၶိုၼ်း ဢၼ်ၺႃးယိုတ်းဝႆႉၸဵမ်မိူဝ်ႈပူၼ်ႉမႃး 20 ပီပၢႆ။
ဝၼ်းတီႈ 30/4/2018 ၸဝ်ႈႁႆႈၸဝ်ႈၼႃး ဝၢၼ်ႈပႃႇၼူၺ်း ဢိူင်ႇမိူင်းသွၵ်ႇ ဢဵၼ်ႁႅင်းမွၵ်ႈ 50 ႁူမ်ႈၵၼ်ပႆတၢင်းၼေၵၢင်ၸႂ်တီႈ ဢိူင်ႇမိူင်းသွၵ်ႇ။ ႁွင်ႉၶၢၼ်တုၵ်းယွၼ်းလူင်ပွင်ၸိုင်ႈ NLD ၸွႆႈၶိုင်ပၼ် ႁႂ်ႈလႆႈၶိုၼ်းတီႈလိၼ် ဢၼ်လူင်ပွင်ၸိုင်ႈသိုၵ်းယိုတ်းဝႆႉၸဵမ်မိူဝ်ႈ ပီ 1991။
“ၶေႃႈၶၢၼ်ပၢၵ်ႇႁဝ်းၶႃႈမီးယူႇ 10 ၶေႃႈၶႃႈ။ ႁဝ်းၶႃႈသၢၼ်ၶတ်း လိၵ်ႈၵိၼ်ၵႅၼ်ႇဢၼ်သိုၵ်း ႁဵတ်းသေ တဵၵ်းၸႂ်ႉႁဝ်းၶႃႈလူင်းလၢႆးမိုဝ်း မိူဝ်ႈၶဝ်ယိုတ်းလိၼ်ႁဝ်းၶႃႈၼၼ်ႉ။ ႁဝ်းၶႃႈတုၵ်းယွၼ်းႁႂ်ႈလူင်ပွင်ၸိုင်ႈ ၵူၼ်းမိူင်း တူၺ်းလူလုမ်းလႃးပၼ်ၽဝ ၸဝ်ႈႁႆႈၸဝ်ႈၼႃး ႁႂ်ႈၶိုၼ်ႈယႂ်ႇမႂ်ႇသုင်။ ႁႂ်ႈၶိုင်ပွင်ပၼ် တႃႇလႆႈတီႈလိၼ် ဢၼ်သိုၵ်းတဵၵ်းငႅၼ်ႉယိုတ်းဢဝ်ၵႂႃႇၼၼ်ႉ – ပႃးၸဵမ်ၸိူဝ်းၼႆႉၶႃႈဢေႃႈ။ ပိူင်လူင်တႄႉ ႁႂ်ႈၶိုင်ပၼ်လႆႈတီႈလိၼ်ဢၼ်တႅၼ်းတၢင်ၶိုၼ်း ဢမ်ႇၼၼ် ႁႂ်ုႈလႆႈၵႃႈသၢႆႈတႅၼ်းၶိုၼ်း ၼႆၶႃႈဢေႃႈ”- ဢူးထုၼ်းၸၢမ်ႇ ၸဝ်ႈၼႃး ၵူၼ်းမိူင်းသွၵ်ႇလၢတ်ႈ။
တင်ႈဢဝ်ၶၢဝ်းယၢမ်းမွၵ်ႈ 9 မူင်းၶိုင်ႈၵၢင်ၼႂ် ၸုမ်းၸဝ်ႈၼႃး ပႆတၢင်းလဵပ်ႈ လိၼ်သူၼ်ဢၼ်ၺႃးယိုတ်းဝႆႉ ၼၼ်ႉသေ ႁွင်ႉပၢဝ်ႇၶေႃႈၶၢၼ် 10 ၶေႃႈ ၼေၵၢင်ၸႂ် တေႃႇထိုင် 10 မူင်းပၢႆၵေႃႈယင်းပႆႇၵိုတ်းလိုဝ်ႈ။
မီးပလိၵ်ႈမၢၼ်ႈ ယွင်ႁူၺ်ႈ မႃးၵုမ်းတူၺ်းဢဝ်ႁူမ်ႇလူမ်ႈ သွင်ၾၢၵ်ႇၶၢင်ႈတၢင်း ၼပ်ႉႁူဝ်သိပ်း။ ၵူၺ်းၵႃႈဢမ်ႇမီးလွင်ႈႁႄႉႁၢမ်ႈၼင်ႇၵဝ်ႇဝႃႈၼႆ။
လိၼ်ၵူၼ်းဝၢၼ်ႈပႃႇၼူၺ်း ဢၼ်ၺႃးယိုတ်းၵႂႃႇမိူဝ်ႈပီ 1991 ၼီႈၼၼ်ႉ မီး ႁိမ်း 50 ဢေႊၶိူဝ်ႊ။ တေႃႇထိုင်ယၢမ်းလဵဝ် ဢမ်ႇႁၼ်ၾၢႆႇသိုၵ်းၶဝ် ၸႂ်ႉတိုဝ်း ၼႂ်းၵၢၼ်ငၢၼ်းလႄႈ ၸင်ႇလႆႈၼေၵၢင်ၸႂ်တုၵ်းယွၼ်းၶိုၼ်း ဝႃႈၼႆ။
