ၵူၼ်းယူႇၵိၼ်ၶၢင်ႈတၢင်းၵေႃႉၼိုင်ႈ လူမ်ႉတၢႆၶႅင်ဝႆႉ ထိုင်တီႈၸုမ်းၸွႆႈထႅမ်လႆႈမႃးၵဵပ်းဢဝ် တူဝ်တၢႆၵႂႃႇလုမ်းလႃး  ဝႆႉပၼ်။

မိူဝ်ႈဝႃး ဝၼ်းတီႈ 15/8/2023 ယၢမ်းႁူဝ်ၶမ်ႈ 5 မူင်း ၵူၼ်းၸၢႆးၵေႃႉၼိုင်ႈ ဢႃယုတေမီးမွၵ်ႈ 60 ပီ တၢႆဝႆႉႁိမ်း ႁၢၼ်ႉလၢင်ႉရူတ်ႉၵႃး ၼႂ်းပွၵ်ႉ 7 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မၼ်းၵႆႉၵႂႃႇမႃးၸွမ်းၸိူဝ်းၼႆႉ။ ယူႇၵိၼ်ၶၢင်ႈတၢင်းၼႆႉ။ မၼ်းပဵၼ်ၽႂ်လုၵ်ႉလႂ်မႃးတႄႉဢမ်ႇႁူႉ။ ၵွပ်ႈဝႃႈမိူၼ်ၵူၼ်းယွင်ႇမဝ်းဝႆႉလႄႈဢမ်ႇမီးၽႂ်ထၢမ်/ လၢတ်ႈတေႃႇမၼ်း သေပွၵ်ႈ  ” – ဝႃႈၼႆ။

မၼ်းၸၢႆးၼႆႉ ပေႃးတူၺ်းတႄႉ ဢႃယုတေမီးမွၵ်ႈ 60 ၊  ၸုမ်းၵူၼ်းၼုမ်ႇလႃႈသဵဝ်ႈ တိုၵ်ႉပိုၼ်ၽၢဝ်ႇ ႁႃပီႈၼွင်ႉၽူႈတၢႆဝႆႉယူႇဝႃႈၼႆ။

ၸုမ်းၵူၼ်းၼုမ်ႇလႃႈသဵဝ်ႈတႅမ်ႈတၢင်ႇ တီႈၾဵတ်ႉသ်ပုၵ်ႉၶ်ဝႆႉဝႃႈ – “  ၵေႃႉဢၼ်တၢႆၶၢင်ႈတၢင်းၼႆႉ မိူဝ်ႈဢွၼ်တၢင်း ပဵၼ်ဢမ်ႇယူႇလီလႄႈ ၸုမ်းပရႁိတဢၼ်မီးၼႂ်းဝဵင်းလႃႈသဵဝ်ႈႁူမ်ႈၵၼ်သေ ယၢမ်ႈဢဝ်ၵႂႃႇသူင်ႇယူတ်းယႃ တူဝ်တီႈႁူင်းယႃယူႇ။ ၵူၺ်းၵႃႈမၼ်းၸၢႆးၵျိူၵ်ႈယူႇၵိၼ်ၶၢင်ႈတၢင်း၊ ၾၢႆႇၼိုင်ႈ ဢမ်ႇမီးပီႈၼွင်ႉၸိူဝ်ႉၶိူဝ်းမႃးႁႃ မႃးထၢမ်တူၺ်း သေပွၵ်ႈလႄႈ ၸင်ႇဝႃႈထိုင်တီႈလႆႈတၢႆၶၢင်ႈတၢင်း   ” – ဝႃႈၼႆ။

တီႈဝဵင်းလႃႈသဵဝ်ႈၼႆႉ ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၶၢဝ်းတၢင်း 2 ပီၼႆႉ ပၢင်တေႃႇလွင်းၼမ်၊ ႁၢၼ်ႉၵိၼ်ၵျေႃႇလေႃႇၵွၵ်းယၢမ်းၵၢင်ၶမ်ႈၵၢင်ၶိုၼ်းၵေႃႈလိူင်ႇ ယႃႈမႃႉ ယႃႈမဝ်းၵမ်သိုဝ်ႉငၢႆႈၶၢႆလီ မီးၵူႈတီႈလႄႈၵူၼ်းဢမ်ႇမီးႁိူၼ်းယေးတီႈယူႇၵေႃႈလိူင်ႇၼမ်မႃး။ ဢၼ်သူႇသမ်းယႃႈမဝ်းၵမ်ပူၼ်ႉလူၼ်ႉလိူဝ်သေ သျွၵ်ႉတၢႆၶၢင်ႈတၢင်းၵေႃႈၶႂ်ႈဝႃႈမီးၵူႈဝၼ်း။

ဝၼ်းၼၼ်ႉၵူၺ်းၼင်ႇၵဝ်ႇ ထူပ်းႁၼ်တူဝ်တၢႆၵူၼ်းၸၢႆးထႅင်ႈၵေႃႉၼိုင်ႈ တီႈၼိူဝ်ၶဵင်ႇၸၢတ်ႈသႅင်းတႆး ဢၼ်မီး ၼႂ်းဝၢင်းဝတ်ႉၵျွင်းၽြႃးလူင်ၼမ်ႉလၼ်ႈ  ။ ၵေႃႉၼႆႉၵေႃႈ ပဵၼ်ၵူၼ်းသူႇသမ်းၵိၼ်ယႃႈ ယူႇၵိၼ်ၸွမ်းၶၢင်တၢင်းၵူၺ်းၼင်ႇၵဝ်ႇၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။