ၶၢဝ်းတၢင်း 10 ဝၼ်းမႃးၼႆႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပၼ်ႇလဵပ်ႈ ဝဵင်းလၢႆးၶႃႈ ဢမ်ႇယွမ်း 4 ပွၵ်ႈယဝ်ႉ ယၢမ်းလဵဝ် သိုၵ်း တင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ပႆႇထွႆထွၼ် ၵူၼ်းမိူင်းတိုၵ်ႉယူႇၼႂ်းငဝ်းလၢႆးဢၼ်တိုၼ်ႇၽၢၼ်ႈၵူဝ်ႁႄ။
မိူဝ်ႈဝႃး ဝၼ်းတီႈ 15/8/2023 ယၢမ်းၵၢင်ဝၼ်းမွၵ်ႈ 12 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း လုၵ်ႉတၢင်း ၼမ်ႉၸၢင် မႃးပၼ်ႇလဵပ်ႈ တီႈဝဵင်းလၢႆးၶႃႈ ။
ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ဝၼ်း 12 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ်မႃး ပၼ်ႇလဵပ်ႈတီႈဝဵင်းလၢႆးၶႃႈၼႆႉထႅင်ႈ ။ ၶဝ်မႃးမိၼ်ၵမ်းၼႆႉ မိၼ်သုင်ဝႆႉဢေႃႈ မိၼ်ပူၼ်ႉမွၵ်ႇၵုမ်ႇၶႃႈ။ လွင်ႈသိုၵ်းမၢၼ်ႈ ထႅမ်ႁႅင်းသိုၵ်းမႃးထႅင်ႈတႄႉ ပႆႇငိၼ်းၶၢဝ်ႇဝႃႈႁိုဝ် တၢင်းၾၢႆႇပီႈၼွင်ႉၶူဝ်းၶဵဝ်ၶဝ်တႄႉ ထႅမ်မႃးၼမ်ၼႃႇယဝ်ႉ။ ပၢင်တိုၵ်းတႄႉ တေၸၢင်ႈၵိူတ်ႇၶိုၼ်ႈထႅင်ႈယူႇ ႁဝ်းၶႃႈတႄႉ လွမ်မႆႈၸႂ်ဝႆႉဢေႃႈ”- ဝႃႈၼႆ။
ၽူႈတူင်ႉၼိုင် ၵၢၼ်သိုၵ်း ၼႂ်းထုင်ႉလၢႆးၶႃႈတႄႉလၢတ်ႈဝႃႈ မိူဝ်ႈဝၼ်းတီႈ 9/8/2023 ယၢမ်းၵၢင်ၼႂ် 10:26 မူင်းၼၼ်ႉ ၶိူင်ႈမိၼ်သိုၵ်းမၢၼ်ႈ လုၵ်ႉတၢင်းၼမ်ႉၸၢင် မႃး ပၼ်ႇတၢင်းဝဵင်းလၢႆးၶႃႈ ၵမ်းၼိုင်ႈ။ ယၢမ်းၵၢင်ဝၼ်း 11:55 မူင်း မႃးပၼ်ႇထႅင်ႈ ၵမ်းၼိုင်ႈ။ ထိုင်မႃး ဝၼ်းတီႈ 10 ယၢမ်းၵၢင်ဝၼ်း သိုၵ်းမၢၼ်ႈ ဢဝ်ၶိူင်ႈမိၼ်မႅင်းမီႈ မႃးပၼ်ႇတၢင်းဝဵင်းလၢႆးၶႃႈထႅင်ႈ လမ်းၼိုင်ႈ ။
ၽူႈတူင်ႉၼိုင် ၵၢၼ်သိုၵ်း ၼႂ်းထုင်ႉလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ၶဝ်မႃးဢဝ်ၶိူင်ႈမိၼ်တိုၵ်း မႃးပၼ်ႇလဵပ်ႈၸွမ်းၵၼ် 2 လမ်းလူးၵွၼ်ႇၶႃႈဢေႃႈ။ လုၵ်ႉတၢင်းၼမ်ႉၸၢင် မႃးတၢင်းၵၢင်းဢုၼ် ႁၢႆးသႅင် လၢႆးၶႃႈ သၼ်လွႆၶႄႇ ၸိူဝ်း ၼႆႉၶႃႈဢေႃႈ။ ယၢမ်းလဵဝ် ဢွင်ႈတီႈ သိုၵ်းႁဝ်းၶႃႈ တူင်ႉၼိုင်ယူႇဝႆႉတႄႉ ဢဝ်တီႈယူႇၵၼ်ဝႆႉ ဢွင်ႈတီႈလီဝႆႉမူတ်းယဝ်ႉၶႃႈ။ သင်ဝႃႈ ၶဝ်ႁႅၼ်းသိုၵ်း ဢဝ်ၶိူင်ႈမိၼ်လေႃႇတိုၵ်းႁဝ်းၶႃႈ ႁၢဝ်ႈႁႅင်းထႅင်ႈတႄႉ ပၢင်တိုၵ်းၼႆႉ တိုၼ်းတေတႅၵ်ႇႁႅင်းၼၼ်ႉယဝ်ႉ။ ယၢမ်းလဵဝ် ပၢင်တိုၵ်းတႄႉ ယဵၼ်ဝႆႉၶႃႈဢေႃႈ။ တင်းသွင်ၾၢႆႇၵေႃႈ တိုၵ်ႉၶဵင်ႈၶႅင် ၵၼ်ဝႆႉယူႇၶႃႈ”- ဝႃႈၼႆ။
သိုၵ်းမၢၼ်ႈ ယိုတ်းမိူင်း ဢၼ်တူင်ႉၼိုင် တၢင်းဝဵင်းလၢႆးၶႃႈၼႆႉ တေပဵၼ်သိုၵ်းမၢၼ်ႈ တႂ်ႈတိူင်းသိုၵ်းၶူဝ်လမ် ၵုမ်းၵမ် -လႆႈႁူႉၼင်ႇၼႆ။
မိူဝ်ႈဝၼ်းတီႈ 6/8/2023 ယၢမ်းၵၢင်ၼႂ် 6 မူင်းပၢႆၼၼ်ႉ သိုၵ်းမၢၼ်ႈ ယိုတ်းမိူင်း ႁႅၼ်းသိုၵ်းလေႃႇတိုၵ်း ပႃႇတီႇမႂ်ႇသုင်ၸိုင်ႈ တႆး/ တပ်ႉသိုၵ်းၸိုင်ႈတႆး (SSPP/ SSA) တီႈတပ်ႉပၢင်သဝ်း ၶၢႆးၽၵ်းၼၢမ် ၾၢႆႇဢွၵ်ႇဝၢၼ်ႈၼမ်ႉပွၵ်ႉ ၵေႃႉသိုၵ်း ႁၢၼ် SSPP လူႉတၢႆၵေႃႉၼိုင်ႈ။ ထိုင်မႃး ယၢမ်းၵၢင်ၼႂ် 7:30 မူင်း သိုၵ်း SSPP ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈ တီႈဝၢၼ်ႈ မၢၵ်ႇလၢင်း ၾၢႆႇဢွၵ်ႇဝဵင်းလၢႆးၶႃႈ ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ မၢတ်ႇၸဵပ်း 6 ၵေႃႉ၊ တီႉလႆႈတူဝ်လိပ်း 2 ၵေႃႉ၊ ၵွင်ႈ 2 လဝ်းလႄႈ ၵႃး 1 လမ်း ၼႆယဝ်ႉ။
ဝၢႆးပၢင်တိုၵ်းၼၼ်ႉယဝ်ႉ သိုၵ်းမၢၼ်ႈ ၸၵၶ 2 မိူင်းၼွင် သင်ႇပိၵ်ႉဢိုတ်းသဵၼ်ႈတၢင်း မိူင်းၼွင် – လၢႆးၶႃႈမႃး ႁၢၼ်ႉတေႃႇထိုင် ပႆႇပိုတ်ႇ။ ႁဵတ်းႁႂ်ႈၸဝ်ႈၵႃး၊ ၵူၼ်းဢွၵ်ႇတႃႈပႆတၢင်း၊ ၵူၼ်းၶၢႆၽၵ်းၶဵဝ် ၸိူဝ်းၼႆႉ ၵႂႃႇမႃးယၢပ်ႇၽိုတ်ႇႁႅင်း။ ၼွၵ်ႈလိူဝ်ၼၼ်ႉ သိုၵ်းမၢၼ်ႈ ဢွၵ်ႇၶေႃႈႁၢမ်ႈၸူး ၵူၼ်းမိူင်းလၢႆးၶႃႈ ႁၢမ်ႈဢွၵ်ႇၼွၵ်ႈႁိူၼ်းယေး ယၢမ်းၵၢင်ၶမ်ႈ 6 မူင်းထိုင် ၵၢင်ၼႂ် 6 မူင်း။
