ၶႃႈႁၢပ်ႇၵၢၼ်ၶုၼ် တႂ်ႈၶွင်ႇသီႇသိုၵ်းမၢၼ်ႈ ၺႃးသင်ႇႁဵတ်းသိုၵ်း

သိုၵ်းမၢၼ်ႈယိုတ်းမိူင်းဢွၵ်ႇလိၵ်ႈပိုၼ်ၽၢဝ်ႇ သင်ႇႁႂ်ႈ ၽူႈႁၢပ်ႇၵၢၼ်ၶုၼ် တႂ်ႈၶွင်ႇသီႇသိုၵ်းမၢၼ်ႈ ၶွတ်ႇၽွတ်ႈတပ်ႉၸုမ်းၵႅမ်သိုၵ်း။

မိူဝ်ႈဝၼ်းတီႈ  9/8/2023 ၼႆႉ ၾၢႆႇသိုၵ်းမၢၼ်ႈယိုတ်းမိူင်း ဢွၵ်ႇလိၵ်ႈပိုၼ်ၽၢဝ်ႇ သင်ႇ ၽူႈႁၢပ်ႇၵၢၼ်ၶုၼ် တႂ်ႈၶွင်ႇသီႇသိုၵ်းမၢၼ်ႈ ၸိူဝ်းမီးၼႂ်းၸႄႈတွၼ်ႈတူၼ်ႈတီး ႁႂ်ႈၶွတ်ႇၽွတ်ႈၸုမ်းတပ်ႉသိုၵ်း ၵႅမ်ဝႆႉၼႆယဝ်ႉ။

ၽူႈၸမ်ၸႂ် ၶႃႈႁၢပ်ႇၵၢၼ်ၶုၼ်ၾၢႆႇၽွင်းငမ်းၵူႈလွင်ႈလွင်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တီႈတႄႉမၼ်း လိၵ်ႈၸီႉသင်ႇဢၼ်ၼႆႉ ပဵၼ်တႃႇလပ်ႉ ဢမ်ႇႁႂ်ႈၵူၼ်းတင်းၼွၵ်ႈႁူႉ ၵူၺ်းၼႃႇ မၼ်းလုတ်ႈဢွၵ်ႇမႃး ထိုင်ၼိူဝ် ဢွၼ်ႊလၢႆႊ ။ မီးၶေႃႈပိုၼ်ၽၢဝ်ႇဢွၵ်ႇမႃးဝႃႈ ၽူႈႁၢပ်ႇၵၢၼ် ၼႂ်းႁွင်ႈၵၢၼ်ၵူႈဢၼ် တၵ်းတေလႆႈၽိုၵ်းၵၢၼ်သိုၵ်းဝႆႉ ၼႆလႄႈ ဢွၼ်ၵၼ်မႆႈၸႂ်ဝႆႉဢေႃႈ။ သမ်ႉဝႃႈ ဢမ်ႇဝႃႈၵူၼ်းၸၢႆးၵူၺ်း ၵူၼ်းယိင်းၵေႃႈဝႃႈ တေလႆႈၶဝ်ႈပႃး ၼႆဢေႃႈ။ တေလႆႈႁၢပ်ႇၵၢၼ်သိုၵ်းလႆႈၵူႈၵေႃႉ ပုၼ်ႈၽွၼ်းပၼ်တၢင်းလႂ်ၵေႃႈ ႁႂ်ႈၵႂႃႇလႆႈ ၵူႈတီႈၼႆဢေႃႈ ” – ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ ၽူႈႁၢပ်ႇၵၢၼ်ၼႂ်းႁွင်ႈၵၢၼ်ဢၼ်လႂ်သေဢမ်ႇဝႃႈ ဢၼ်ယူႇၼႂ်းလႅၼ်လိၼ် တိူင်းသိုၵ်းပွတ်းဢွၵ်ႇ တီႈတူၼ်ႈတီး(တောင်ကြီးမြို့ အခြေစိုက် အရှေ့ပိုင်းတိုင်း စစ်ဌာနချုပ်) တၵ်းတေလႆႈ ၶွတ်ႇၽွတ်ႈၸုမ်းသိုၵ်း မိူၼ်ၼင်ႇပျီႇတူႉၸိတ်ႉ ယူႇတီႈဢဵၼ်ႁႅင်း မီးဢေႇမီးၼမ်သေ ပေႃးၸႅၵ်ႇၽႄ ၼႃႈတီႈ ပုၼ်ႈၽွၼ်း မႃးၵေႃႈ ႁႂ်ႈၸႂ်ႉတိုဝ်းၵႂႃႇလႆႈၵမ်းသိုဝ်ႈ ဝႃႈၼႆဝႆႉ။

ယၢမ်းလဵဝ် ၶႃႈႁၢပ်ႇၵၢၼ်ၶုၼ်ၵမ်ႈၽွင်ႈ  ဢၼ်မီးၼႂ်းႁွင်ႈၵၢၼ်ၵူႈလွင်ႈလွင်ႈဝဵင်းတူၼ်ႈတီး လႆႈၶဝ်ႈပၢင်ၾိုၵ်းၽွၼ်ႉၵၢၼ်သိုၵ်းတီႈ ၸၼ်ႉၸွမ်ၽွင်ႇၵျီး( ဖောင်ကြီး ဗဟိုဝန်ထမ်း တက္ကသိုလ်သင်တန်း)ၼၼ်ႉဝႆႉၼႆယဝ်ႉ။

ဢိင်ၼိူဝ်လွင်ႈၼႆႉ ၶႃႈႁၢပ်ႇၵၢၼ်ၶုၼ် တီႈတူၼ်ႈတီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶႃႈႁၢပ်ႇၵၢၼ်ၶုၼ်ၵမ်ႈၽွင်ႈ တီႈတူၼ်ႈတီးၼႆႉ ပေႃးလႆႈ ၾိုၵ်းသွၼ်ၵၢၼ်သိုၵ်းယူႇယဝ်ႉၼႆဢေႃႈ ။ လႆႈသွၼ် ယိုဝ်းၵွင်ႈဢွၼ်ႇ ပဵၼ်ပိူင်ယႂ်ႇဝႆႉ။တိုၼ်းဝႃႈ တေႁႂ်ႈ တိုၵ်းသိုၵ်းၼၼ်ႉယဝ်ႉ။ မၢင်ၵေႃႉ ၶႂ်ႈဢွၵ်ႇသေ လႅၼ်ႈပၢႆႈၵွၼ်ႇယဝ်ႉ ” – ဝႃႈၼႆ။

 ပၢင်တိုၵ်း လၢႆလၢႆတီႈၼႆႉ လုၵ်ႈၸုမ်းသိုၵ်းမၢၼ်ႈမီးလွင်ႈတုမ်ႉတိူဝ်ႉလူႉတၢႆမႃးၼမ်လႄႈ ၸင်ႇသင်ႇႁႂ်ႈပျူႇၸေႃးထီး ယူႇတႅဝ်းၼႃႈသေ ၶဝ်ႈပိုတ်းယိုဝ်းၸွႆႈမႃး။ ငဝ်းလၢႆးမိူဝ်ႈလဵဝ်ၵေႃႈ မီးလွင်ႈသင်ႇ ႁႂ်ႈၶႃႈႁၢပ်ႇၵၢၼ်ၶုၼ်လၢႆႁွင်ႈၵၢၼ် ၽွတ်ႈတပ်ႉၸုမ်းသေ တေထႅမ်သိုၵ်းၶဝ်ႈထႅင်ႈ ၼႆ ၵူၼ်းပိုၼ်ႉတီႈၵမ်ႈၼမ် ထတ်းသၢင်ႁၼ်ၼင်ႇၼႆ။