မိူဝ်ႈၼႆႉ ဝၼ်းတီႈ 14/8/2023 ယၢမ်းၵၢင်ၼႂ် 9 မူင်း ထိုင် 12 မူင်းၵၢင်ဝၼ်း ယူႇတီႈ ၸုမ်းႁူမ်ႈသၢင်ႈ ဝဵင်းမိူင်းမၢဝ်းလႄႈ ၼုမ်ႇႁၢႆးၸၢႆးယိင်း ႁႅင်းၵၢၼ်ယၢၼ်မိူင်း ၸိူဝ်းႁၵ်ႉသူင်ၽဵင်းၵႂၢမ်းတႆး ပၢၼ်မႂ်ႇဢိၵ်ႇပႃး ၸိူဝ်းၼပ်ႉယမ်ဝႆႉၼၵ်းၼိူဝ် ၸၢႆးလၢဝ်သႂ် ၵဝိပၢႆးမွၼ်းတႆး ႁူမ်ႈၵၼ် ၸတ်းႁဵတ်းပၢင်ႁႅၼ်းသွမ်းၸဵတ်း လူႇတၢၼ်းယၢတ်ႈၼမ်ႉ ယိုၼ်ႈၸူးထိုင် မၼ်း ၸၢႆး တီႈဝတ်ႉၸေႊၵဝ်ႇ မိူင်းမၢဝ်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ဢိူင်ႇတႂ်ႈၶူင်း ၸိုင်ႈမိူင်းၶႄႇ။
လုင်းၸၢႆးဢေႃႈၶမ်း ၽူႈၶဝ်ႈႁူမ်ႈ ပၢင်ႁႅၼ်းသွမ်းၸဵတ်းပၼ် ၸၢႆးလၢဝ်သႂ် လၢတ်ႈတီႈၽူႈတွႆႇႁွၵ်ႈဝႃႈ – “ပီႈၼွင်ႉၽူႈမႃးၶဝ်ႈႁူမ်ႈ လူႇတၢၼ်း တေမီးႁူဝ်ၵူၼ်း 150 ၵေႃႉ၊ သင်ၶၸဝ်ႈ 3 တူၼ်။ ဝၢႆးလူႇတၢၼ်း ၵၢပ်ႈသွမ်းဝၼ်းယဝ်ႉ ၽိတ်ႈ ႁပ်ႉပီၼွင်ႉ ၸိူဝ်းမႃးႁူမ်ႈလူႇတၢၼ်း ၵိၼ်ၶဝ်ႈမူႇၵၼ်။ ယွၼ်းသူးႁႂ်ႈၶႂၼ်ငဝ်း ၶူးၸၢႆးလၢဝ်သႂ်ႁဝ်း ႁွတ်ႈထိုင်တီႈလီ တီႈ ၵတ်းယဵၼ်သေၵမ်းၶႃႈ”– ဝႃႈၼႆ။
ၸၢႆးလၢဝ်သႂ် ၵဝိပၢႆးမွၼ်းတႆး လႆႈလူႉသဵင်ႈၵႂႃႇ ယွၼ်ႉတၢင်းပဵၼ်ယဵဝ်ႈဝၢၼ်၊ ပွတ်ႇၵႂ်ႈလႄႈ တၢင်းပဵၼ်တႂ် တီႈႁိူၼ်းမၼ်း ၸၢႆး ဝဵင်းပၢင်ႇဢူႈလူင် (မေႇမဵဝ်ႉ) မိူဝ်ႈဝၼ်းတီႈ 7/8/2023 ယၢမ်းႁူဝ်ၶမ်ႈ 6:25 မူင်း ၽွင်းဢႃယု 82 ပီ ၼႆယဝ်ႉ။
ၵူၼ်းၼုမ်ႇတႆး မိူင်းမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “တွၼ်ႈၵၢင်ၶမ်ႈၼႆႉ ႁဝ်းၶႃႈ ၸိူဝ်းပဵၼ်လုၵ်ႈလၢၼ်တႆး ၸိူဝ်းႁၵ်ႉ ၽဵင်းၵႂၢမ်းတႆး ဢဝ်ၵုင်ႇမုၼ်ၶူးလၢဝ်သႂ်သေ တေႁူမ်ႈၵၼ် တႆႈတဵၼ်းယွၼ်းသူးထိုင် ၶူးလၢဝ်သႂ် တီႈဝတ်ႉလူင်ႁေႃၶမ်း မိူင်းမၢဝ်း ၵွပ်ႈပိူဝ်ႈၼႂ်းလုမ်းတၢင်းပႃႈၼိူဝ် ၵူဝ်ႁဝ်းၶႃႈ ၶွၼ်ႈတုမ်ၵၼ်ၼမ်လႄႈ ၵွပ်ႈၼႆလႄႈ တေဢမ်ႇပဵၼ်ၸတ်းယဝ်ႉ တိုၵ်းသူၼ်းထိုင် ႁႂ်ႈတႆႈတဵၼ်း ယွၼ်းသူးတီႈႁိူၼ်းၽႂ်မၼ်းၵႂႃႇသေၵမ်းၶႃႈ”- ဝႃႈၼႆ။
မိူဝ်ႈၼႆႉ ယၢမ်းၵၢင်ၶမ်ႈ 8 မူင်း (ၶၢဝ်းယၢမ်းမိူင်းၶႄႇ) ယိူင်းဢၢၼ်းဝႆႉ တေမီးပၢင်တႆႈတဵၼ်း ယွၼ်းသူးလႄႈတမ်းဝၢင်းတူင်ႇမွၵ်ႇမွင်ၸႂ် ပၢင်ႁွင်ႉၵႂၢမ်းသူင်ႇသင်ႇ ၸၢႆးလၢဝ်သႂ် ၵဝိပၢႆးမွၼ်းတႆး တီႈဝတ်ႉလူင်ႁေႃၶမ်း မၢၼ်ႈပၢင်ႇပုင်ႇ မိူင်းမၢဝ်းလူင် ဝႃႈၼႆသေတႃႉ ဢမ်ႇပဵၼ်ၸတ်း၊ ယွၼ်ႉၽူႈယႂ်ႇၵူၼ်းလူင် ၼႂ်းလုမ်းတၢင်းမိူင်းၶႄႇ ဢမ်ႇပၼ်ၸတ်း ဝႃႈၼႆ။
ၸၢႆးလၢဝ်သႂ်ၼႆႉ ပဵၼ်လုၵ်ႈၸၢႆးလူင် လုင်းၸၢႆးပႃႉၶႅင်ႇလႄႈ ပႃႈၼၢင်းဢေႇၸဵင်ႇ ပဵၼ်ၵူၼ်းၸႃႇတိ ဝဵင်းၵူတ်ႉၶၢႆ မီးပီႈ ၼွင်ႉႁူမ်ႈ တွင်ႉၵၼ် 6 ၵေႃႉ။ မိူၼ်ၼင်ႇ – ၸၢႆးလၢဝ်သႂ်၊ ၸၢႆးလိူၼ်ၶမ်း၊ ၸၢႆးဢၢႆႈသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ်လႄႈ ၼၢင်းတဵင်း ႁၢၼ်ႇ ၸိူဝ်းၼႆႉ။
ၸၢႆးလၢဝ်သႂ်ၼႆႉ တႄႇၼႃႈႁိူၼ်း ၵိုၵ်းၸွမ်း ၼၢင်းသီႇတႃႇ ၵူၼ်းပွၵ်ႉဢွင်ႇတေႃႇမူႇ ဝဵင်းလိူဝ်ႇ(မၼ်းတလေး) မီးလုၵ်ႈ ၸၢႆး ႁူမ်ႈၵၼ် 3 ၵေႃႉ – ၸၢႆးသျႅင်ႇဢူးၼွင်ႇ (ၸၢႆးလူင်)၊ ၸၢႆးၽူဝ်းၼွင်ႇ (ၸၢႆးၵၢင်) လႄႈ ၸၢႆးၸွမ်ၶိူဝ်းသႂ် (ၸၢႆးၸွမ်) ၼႆယဝ်ႉ။
ၸၢႆးလၢဝ်သႂ်ၼႆႉ ပဵၼ်ၸဝ်ႈၵဝိပၢႆးမွၼ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇ ၵေႃႉၼိုင်ႈ မၼ်းၸၢႆး တႅမ်ႈၽဵင်းၵႂၢမ်းတႆး – ၵႂၢမ်းမၢၼ်ႈ မႃး ဢမ်ႇယွမ်း 2,000 ႁူဝ်။ ပဵၼ်ၵေႃႉ ၸုင်ၸၼ် ၼွင်ႉၸၢႆး ၸၢႆးသၢႆမၢဝ်း ၸိုဝ်ႈသဵင်ယႂ်ႇမႃး ၼႂ်းတူင်ႇပၢႆးမွၼ်း ၵေႃႈၸႂ်ႈ လိူဝ်ၼၼ်ႉ ၽူႈႁွင်းၵႂၢမ်းတႆးထႅင်ႈ တင်းၼမ် ၼႆယဝ်ႉ။
လႅင်ႇၶၢဝ်ႇ ၸၢႆးၶိူဝ်းႁၢၼ် ၸုမ်းတႆးၽွမ်ႉၵၼ်
