ၸၢႆးလွမ်ႉဝုၼ်း မေႃၵႂၢမ်းၵၢၼ်လုၵ်ႉၽိုၼ်ႉတႆး ပူၵ်းတိုၼ်ႇၸႂ်ႁၵ်ႉၸိူဝ်ႉၸၢတ်ႈၼၼ်ႉ ဢႅဝ်ႇႁႃႁွင်ႉၵႂၢမ်း ႁႃငိုၼ်းတႃႇၸွႆႈထႅမ် ပၢႆးယူႇလီ ၸၢႆးလၢဝ်သႂ် တီႈဝဵင်းလူင်မိူင်းၵွၵ်ႇ – ရယွင်းလႆႈ ငိုၼ်းထႆးမွၵ်ႈ 60,000 ဝၢတ်ႇ။

တႄႇဢဝ် ၵၢင်လိူၼ်ၵျူႊလၢႆႊ 2023 ၼၼ်ႉမႃးတေႃႇထိုင်လိူၼ်သဵင်ႈ မေႃၵႂၢမ်းၵၢၼ်လုၵ်ႉၽိုၼ်ႉ ပူၵ်းတိုၼ်ႇႁူဝ်ၸႂ်ႁၵ်ႉၸိူဝ်ႉၸၢတ်ႈတႆး ၸၢႆးလွမ်ႉဝုၼ်း လူင်းပိုၼ်ႉ တီႈ ႁႃငိုၼ်းၵွင်ၵၢင် တႃႇၵမ်ႉၸွႆႈ တႃႇယူတ်းယႃပၢႆးယူႇလီ ၸၢႆးလၢဝ်သႂ် မေႃတႅမ်ႈၽဵင်းၵႂၢမ်းတႆး တီႈႁၢၼ်ႉၶဝ်ႈၽၵ်းတႆး မိူင်းလႅင်း ဝဵင်းလူင် မိူင်းၵွၵ်ႇ ဢိၵ်ႇပႃး ႁၢၼ်ႉၶဝ်ႈၽၵ်း မွၵ်ႇၵွၼ်တႆးလႄႈ ႁၢၼ်ႉမိူၼ်ၾၢၼ် တီႈဝဵင်းရယွင်း ၼႂ်းၸိုင်ႈထႆး လႆႈႁပ်ႉငိုၼ်းၵမ်ႉၸွႆႈတီႈပီႈ ၼွင်ႉတႆး ႁွတ်ႈမိူင်းထႆး တင်းမူတ်းၸမ် 60,000 ဝၢတ်ႇ။

ၸၢႆးလွမ်ႉဝုၼ်း လၢတ်ႈတီႈၽူႈတွႆႇႁွၵ်ႈဝႃႈ – “တီႈၵုင်းထဵပ်ႈတႄႉ လႆႈႁပ်ႉငိုၼ်းၸွႆႈထႅမ် တင်း မူတ်း 38,600 ဝၢတ်ႇ တေမႅၼ်ႈငိုၼ်းမၢၼ်ႈမွၵ်ႈ 33 သႅၼ်ပျႃး။ ယဝ်ႉၵေႃႈ တီႈရယွင်းလႆႈငိုၼ်းထႆး 20,000 ဝၢတ်ႇပၢႆ ၶၢဝ်းတၢင်း 3 ဝၼ်း 3 ၶိုၼ်း။ ငိုၼ်းတီႈလႆႈမႃး တင်းသွင်ဢွင်ႈတီႈၼၼ်ႉ ၶႃႈႁဝ်း လႆႈဢူၼ်းၸွႆႈမိူဝ်းပၼ် ပီႈၸၢႆးလၢဝ်သႂ်ႁဝ်းၶႃႈ မူတ်းယဝ်ႉ”- ဝႃႈၼႆ။

လိူဝ်ၼၼ်ႉ ငိၼ်းၸူမ်းၶွပ်ႇၸႂ်ဢဝ်ၵုင်ႇမုၼ်ထိုင် ပီႈၼွင်ႉတႆး မိူင်းၵွၵ်ႇ – ရယွင်း တီႈၽူႈမီးသုၼ်ႇႁူမ်ႈၸွႆႈထိုင် တႃႇပၢႆးယူႇလီ ၸၢႆးလၢဝ်သႂ် မေႃတႅမ်ႈၽဵင်းၵႂၢမ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇလႄႈ ငိၼ်းၸူမ်းၶွပ်ႇၸႂ်ထိုင် ဢွၼ်ႁူဝ်ၸွႆႈၶပ်ႉၶိုင်ပၼ်ၵူႈလွင်ႈ သေဢမ်ႇၵႃး ႁူမ်ႈပႃး ၸဝ်ႈပၢႆးမွၼ်းတႆးထႅင်ႈ လၢႆၵေႃႉ တီႈႁူမ်ႈၵၼ် မႃးႁႃငိုၼ်းၵွင်ၵၢင်ၸွႆႈၵၼ် ၸိူဝ်းၼႆႉ ၸၢႆးလွမ်ႉဝုၼ်း လၢတ်ႈ။

တွၼ်ႈတႃႇ တေၸတ်းႁဵတ်းပၢင်မူၼ်ႈသိူဝ်း ႁႃငိုၼ်းၵွင်ႈၵၢင် ၸွႆႈၵႃႈယူတ်းယႃ ၸၢႆးလၢဝ်သႂ် တီႈဝဵင်းၵဵင်းမႂ်ႇၼၼ်ႉသမ်ႉ ယၢမ်း လဵဝ် တိုၵ်ႉဝၢင်းၽႅၼ် ႁၢင်ႈႁႅၼ်းဝႆႉဝႃႈ တေၸတ်းဢွင်ႈတီႈလႂ် ဝၼ်းလႂ် ယၢမ်းလႂ် ၸိူဝ်းၼႆႉ။

မိူဝ်ႈၵၢင်လိူၼ်ၵျုႊလၢႆႊ ပူၼ်ႉမႃးၼၼ်ႉၵေႃႈ ၸုမ်းတူင်ႉၼိုင်တူင်ႇဝူင်းတႆးလႄႈ ၸုမ်းပၢႆးမွၼ်းတႆး ၼႂ်းမိူင်းထႆး လႆႈႁူမ်ႈငိုၼ်း ၵၼ်သေ ၸွႆႈထႅမ် ၵႃႈယူတ်းယႃ ၸၢႆးလၢဝ်သႂ်ၵႂႃႇ တႃႇငိုၼ်းမၢၼ်ႈ 20 သႅၼ်ပျႃး။

ၸၢႆးလၢဝ်သႂ် မေႃတႅမ်ႈၽဵင်းၵႂၢမ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇၼႆႉ ပဵၼ်ဝႆႉ ယဵဝ်ႈဝၢၼ်၊ ပွတ်ႇၵႂ်ႈလႄႈ တၢင်းပဵၼ်တပ်း ၸိူဝ်းၼႆႉ ပဵၼ်မႃးၶၢဝ်းတၢင်း 2 လိူၼ်ယဝ်ႉ ယၢမ်းလဵဝ် လႆႈယူတ်းယႃတူဝ်ဝႆႉတီႈ ႁိူၼ်းယေး မၼ်းၸၢႆး တီႈဝဵင်းပၢင်ႇ ဢူးလူင် (မေႇမဵဝ်ႉ) ၼႆယဝ်ႉ။

ၸၢႆးလၢဝ်သႂ်ၼႆႉ မီးဢႃယု 81 ပီ မၼ်းၸၢႆး ပဵၼ်လုၵ်ႈၸၢႆး လုင်းပႃႉၶႅင်ႇ ပႃႈၼၢင်းဢေးၸဵင်ႇ ပဵၼ်ၵူၼ်းၸႃတိ ဝဵင်းမူႇ ၸေႊ ၸိုင်ႈတႆးပွတ်းႁွင်ႇ။ မီးပီႈ ၼွင်ႉ ႁူမ်ႈတွင်ႉ 6 ၵေႃႉ ၸၢႆးလၢဝ်သႂ်ၼႆႉ ပဵၼ်ပီႈဢၢႆႈလူင် လိူဝ်ၼၼ်ႉ ၸၢႆးလိူၼ်ၶမ်း၊ ၸၢႆးသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ် (မေႃၵႂၢမ်း ၵေႃႉၼိုင်ႈ)လႄႈ ၼၢင်းတဵင်းႁၢၼ်ႇ။ ယၢမ်းလဵဝ် ၵိုတ်းၸၢႆးလၢဝ်သႂ်၊ ၸၢႆးသၢႆမၢဝ်းလႄႈ ၸၢႆးလႅင်းသႂ် 3 ၵေႃႉ ၵူၺ်းယဝ်ႉ။ ၸၢႆးလၢဝ်သႂ်ၼႆႉ ယၢမ်းလဵဝ် မီးဝႆႉ လုၵ်ႈၸၢႆး 3 ၵေႃႉ လႆႈႁူႉၼင်ႇၼႆ။