မေႃတႅမ်ႈၵႂၢမ်း – ၸၢႆးလၢဝ်သႂ် ၸဝ်ႈပၢႆးမွၼ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇ ဢမ်ႇယူႇလီမႃး မီးၶၢဝ်းတၢင်းလိူၼ်ပၢႆ ယွၼ်ႉတၢင်းပဵၼ်ၵူၼ်းထဝ်ႈ ဝႃႈၼႆ။

ၸၢႆးလၢဝ်သႂ် ၽူႈတႅင်ႇတႅမ်ႈၽဵင်းၵႂၢမ်းတႆး – ၵေႃႉပဵၼ်ပီႈဢၢႆႈလူင် မေႃႁွင်ႉၵႂၢမ်း ၸၢႆးသၢႆမၢဝ်း ၸဝ်ႈပၢႆးမွၼ်း ၵိုၵ်းပိုၼ်း ၸိုင်ႈသဵင်ယႂ်ႇၼၼ်ႉ ယၢမ်းလဵဝ်ပဵၼ်ဝႆႉ ယဵဝ်ႈဝၢၼ်၊ တပ်းလႄႈ ပွတ်ႇၵႂ်ႈသေ ဢမ်ႇယူႇလီ၊ လႆႈလုမ်းလႃးတူဝ်ဝႆႉတီႈႁိူၼ်းယေး တီႈဝဵင်းပၢင်ႇဢူးလူင် (မေႇမဵဝ်ႉ) ၼႆယဝ်ႉ။

ၸၢႆးလၢဝ်သႂ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ပဵၼ်ဝႆႉ ယဵဝ်ႈဝၢၼ်၊ တပ်း၊ ပွတ်ႇၵႂ်ႈ တၢင်းပဵၼ်ၼႆႉ ၵူတ်ႇထတ်း ႁၼ်မႃး လိူၼ်ပၢႆယဝ်ႉ။ လႆႈလုမ်းလႃးတူဝ်ဝႆႉတီႈႁိူၼ်းယေး ပၢင်ႇဢူးလူင်ၼႆႉ။ တေႃႈလဵဝ် လုၵ်ႉလႆႈၼင်ႈလႆႈယူႇ ၵူၺ်းၵႃႈ ပႆႁိုင်ႁိုင် လၢတ်ႈႁိုင်ႁိုင် ၸိူဝ်းၼႆႉတႄႉ ဢမ်ႇပေႃးလႆႈ ယွၼ်ႉဢမ်ႇမီးႁႅင်းပႆ/ ႁႅင်းလၢတ်ႈ ႁိူဝ်ႉမွႆႈၶႃႈဢေႃႈ”- ဝႃႈၼႆ။

ယၢမ်းလဵဝ် ၸၢႆးလၢဝ်သႂ်ၼႆႉ မီးဢႃယု 81 ပီယဝ်ႉ ပဵၼ်ပီႈဢၢႆႈလူင် ၸၢႆးသၢႆမၢဝ်း။ ပေႃးထိုင်မႃး ဝၼ်းတိတ်ႉ (ဝၼ်းတီႈ 2/7/2023) ၼႆႉ တေလႆႈၵႂႃႇၼႄမေႃယႃထႅင်ႈ ၵမ်းၼိုင်ႈ တီႈႁူင်းယႃပၢင်ႇဢူႈလူင် ဝႃႈၼႆ။

ၵူၼ်းၼုမ်ႇၽူႈၸမ်ၸႂ် ၸၢႆးလၢဝ်သႂ် တီႈဝဵင်းပၢင်ႇဢူႈလူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီႈလၢဝ်သႂ်ႇႁဝ်းၶႃႈ ပဵၼ်တၢင်းပဵၼ် မႃးၼႆႉ မီးၶၢဝ်းတၢင်းလိူၼ်ပၢႆယဝ်ႉ လႆႈၶိုၼ်ႈႁူင်းယႃမႃးၼႆႉ မီးသွင်ပွၵ်ႈယဝ်ႉ။ ပွၵ်ႈၵမ်းဢွၼ်ႇတၢင်းၼၼ်ႉ လႆႈၶိုၼ်ႈႁူင်းယႃတီႈ ဝဵင်းလိူဝ်ႇ( မၼ်းတလေး)။ ပွၵ်ႈၵမ်းသွင်ၼႆႉ လႆႈၶိုၼ်ႈႁူင်းယႃ တီႈမေႇမဵဝ်ႉၼႆႉသေ ယၢမ်းလဵဝ် လုမ်းလႃးတူဝ်ဝႆႉတီႈႁိူၼ်း။ လွင်ႈၵိၼ်ယႅမ်ႉတႄႉ ႁၼ်ပီႈလၢဝ်သႂ်ႁဝ်း ဝၢၼ်ယူႇၶႃႈဢေႃႈ။ ၵေႃႉလုမ်းလႃးပၼ်တႄႉ ပႃႈႁဝ်း (ၵေႃႉပဵၼ်မေးၼၢင်းပီႈလၢဝ် သႂ်) လုမ်းလႃး ဝႆႉၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၸၢႆးလၢဝ်သႂ် ဢမ်ႇယူႇလီမႃး ၶၢဝ်းတၢင်းလိူၼ်ပၢႆၼႆႉသေ ယူႇတီႈ မေႃၵႂၢမ်းတႆး လုၵ်ႉတီႈၵႆၸမ်သေ သူင်ႇငိုၼ်း ၸွႆႈယူတ်းယႃ ၸိူဝ်းၼႆႉမႃးၵေႃႈ မီးယူႇၵမ်ႈၽွင်ႈ။ မၢင်ၸိူဝ်း မိူဝ်းသူႇၸႂ်းထိုင်တီႈႁိူၼ်းယေး ၸိူဝ်းၼႆႉၵေႃႈမီးယူႇ ၸၢႆးလၢဝ်သႂ် လၢတ်ႈ။

ၸၢႆးလၢဝ်သႂ်ၼႆႉ ပဵၼ်လုၵ်ႈၸၢႆး လုင်းပႃႉၶႅင်ႇ ပႃႈၼၢင်းဢေးၸဵင်ႇ ပဵၼ်ၵူၼ်းၸႃတိ ဝဵင်းမူႇၸေႊ ၸိုင်ႈတႆးပွတ်းႁွင်ႇ။ မီးပီႈ ၼွင်ႉ ႁူမ်ႈတွင်ႉ 6 ၵေႃႉ ၸၢႆးလၢဝ်သႂ်ၼႆႉ ပဵၼ်ပီႈဢၢႆႈလူင် လိူဝ်ၼၼ်ႉ ၸၢႆးလိူၼ်ၶမ်း၊ ၸၢႆးသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ် (မေႃၵႂၢမ်း ၵေႃႉၼိုင်ႈ)လႄႈ ၼၢင်းတဵင်းႁၢၼ်ႇ။ ယၢမ်းလဵဝ် ၵိုတ်းၸၢႆးလၢဝ်သႂ်၊ ၸၢႆးသၢႆမၢဝ်းလႄႈ ၸၢႆးလႅင်းသႂ် 3 ၵေႃႉ ၼႆႉ ၵူၺ်း လႆႈႁူႉၸွမ်းၼင်ႇၼႆ။ ယဝ်ႉၵေႃႈ ၸၢႆးလၢဝ်သႂ်ၼႆႉ ယၢမ်းလဵဝ် မီးဝႆႉ လုၵ်ႈၸၢႆး 3 ၵေႃႉ ၼႆယဝ်ႉ။

ၸၢႆးလၢဝ်သႂ်ၼႆႉ ပဵၼ်ၽူႈတႅမ်ႈၽဵင်းၵႂၢမ်းတႆး ၸိုဝ်ႈသဵင်ယႂ်ႇ ၵိုၵ်းပိုၼ်းတႆးမႃး ၵေႃႉၼိုင်ႈ ယဝ်ႉၵေႃႈ ပဵၼ်ပႃးၽူႈႁွင်ႉၽဵင်းၵႂၢမ်း တႆးထႅင်ႈ။ ၽဵင်းၵႂၢမ်း ဢၼ်မၼ်းၸၢႆးၵႆႉႁွင်ႉသေ ၵူၼ်းမိူင်းတႆး တေႁူႉၸတ်းၵၼ်ၼမ်မႃးတႄႉ တေပဵၼ်ၽဵင်းၵႂၢမ်း “ႁူဝ်ၸႂ် ၵၢႆႇၶူဝ်” ၼႆယဝ်ႉ။