မေႃၵႂၢမ်းတႆးၸိုဝ်ႈသဵင်ယႂ်ႇ ၸၢႆးသၢႆမၢဝ်း ၶဝ်ႈၵူတ်ႇထတ်းယူတ်းယႃပၢႆးယူႇလီ တီႈဝဵင်းလိူဝ်ႇ 2 ၶိုၼ်း 3 ဝၼ်း ။
ပူၼ်ႉမႃး ဝၼ်းတီႈ 2-3/9/2022 ၼႆႉ မေႃၵႂၢမ်း ၸၢႆးသၢႆမၢဝ်း ၶဝ်ႈၵူတ်ႇထတ်းပၢႆးယူႇလီ တီႈႁူင်းယႃမဵဝ်ႉတေႃႇ ဝဵင်း လိူဝ်ႇ (မၼ်းတလေး) တႃႇလႅၵ်ႈလွတ်ႇဢၼ်သႂ်ႇဝႆႉတီႈတႂ် ၼၼ်ႉဝႃႈၼႆ။
မေႃတႅမ်ႈၵႂၢမ်း ၸၢႆးလၢဝ်သႂ် ၵေႃႉပဵၼ်ပီႈဢၢႆႈ ၸၢႆးသၢႆမၢဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉ ၸၢႆးသၢႆမၢဝ်း မႃးၸႅတ်ႈပၢႆးယူႇလီ တီႈႁူင်း ယႃမဵဝ်ႉတေႃႇ ဝဵင်းလိူဝ်ႇၼႆႉ ၶၢဝ်းတၢင်း 2 ၶိုၼ်း 3 ဝၼ်းသေ ယူတ်းယႃတူဝ်ယဝ်ႉ ယၢမ်းလဵဝ်လႆႈလူင်းႁူင်းယႃၵႂႃႇ မိူဝ်ႈဝႃး ဝၼ်းတီႈ 4 ၼႆႉ။ မၼ်းမႃးလႅၵ်ႈလွတ်ႇဢၼ်သႂ်ႇဝႆႈတီႈတႂ်မၼ်းၼၼ်ႉ။ တေလႆႈလႅၵ်ႈ 6 လိူၼ် 1 ပွၵ်ႈ ဢမ်ႇၼၼ် 1 ပီ 1 ပွၵ်ႈ။ ယၢမ်းလဵဝ် ၸၢႆးသၢႆမၢဝ်း လူင်းႁူင်းယႃ ပွၵ်ႈမိူဝ်း ၶိုၼ်းတႃႈၵုင်ႈယဝ်ႉ”- ဝႃႈၼႆ။
ၽွင်းမၼ်းၸၢႆးမႃးယူတ်းယႃတူဝ်တီႈဝဵင်းလိူဝ်ႇၼႆႉမီး ပီႈၼွင်ႉႁူမ်ႈတွင်ႉလႄႈဢူၺ်းၵေႃႉဢူၺ်းသႄႈ တီႈၸမ်တီႈၵႆ မႃးယဵမ်ႈမႃးၸႂ်း မႃးပၼ်ႁႅင်းၸႂ်။ ၵေႃႉပဵၼ်ပီႈဢၢႆႈ ၸၢႆလၢဝ်သႂ်လႄႈ ၵေႃႉပဵၼ်ၼွင်ႉၸၢႆး ၸၢႆးလႅင်းသႂ် ၵေႃႈမႃးႁူပ်ႉထူပ်း။
မေႃၵႂၢမ်း ၸၢႆးသၢႆမၢဝ်းၼႆႉ ပဵၼ်တၢင်းပဵၼ်တႂ်သေ လႆႈၶဝ်ႈၽႃႇတတ်း တီႈႁူင်းယႃသူႇၶုမ်ဝိတ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး မိူဝ်ႈၼႂ်းလိူၼ်ဢေႊပရိူဝ်ႊ 2018 ပူၼ်ႉမႃး ။
ၸၢႆးသၢႆမၢဝ်းၼႆႉ ပဵၼ်လုၵ်ႈၸၢႆး လုင်းပႃႉၶႅင်ႇ ပႃးၼၢင်းဢေးၸဵင်ႇ၊ ၵိူတ်ႇမိူဝ်ႈပီ 1949 လိူၼ်မၢတ်ႊၶျ် ဝၼ်းတီႈ 18 ဝၼ်း ဢၢင်းၵၢၼ်း။ တီႈၵိူတ်ႇ ပဵၼ်ဝဵင်းမူႇၸေႊ ၸိုင်ႈတႆးပွတ်းႁွင်ႇ။ တႄႇႁွင်ႉၵႂၢမ်းမႃး ၽွင်းပီၶရိတ်ႉ 1960 ပၢႆ။ ၸၢႆးသၢႆမၢဝ်း မီးပီႈၼွင်ႉႁူမ်ႈတွင်ႉ 6 ၵေႃႉ ပဵၼ်ၸၢႆးလၢဝ်သႂ်၊ ၸၢႆးလိူၼ်ၶမ်း၊ ၸၢႆးသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ် (မေႃၵႂၢမ်း ၵေႃႉၼိုင်ႈ) လႄႈ ၼၢင်းတဵင်းႁၢၼ်ႇ ။ ယၢမ်းလဵဝ်ၵိုတ်း ၸၢႆးလၢဝ်သႂ်၊ ၸၢႆးသၢႆမၢဝ်းလႄႈ ၸၢႆးလႅင်းသႂ် 3 ၵေႃႉၵူၺ်း လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ