မိူဝ်ႈၼႆႉ ဝၼ်းတီႈ 9/8/2023 ယၢမ်းဝၢႆးဝၼ်း 1 မူင်း ယူႇတီႈ လုၵ်ႈလၢင်းၼၢင်းမေး ၸိူဝ်ႉၶိူဝ်းပီႈၼွင်ႉ ႁူမ်ႈလူၺ်ႈ ၸုမ်းတူင်ႉ ၼိုင်တူင်ႇဝူင်းၵူၼ်းလႄႈ ပႃႇတီႇပၢႆးမိူင်း ဢိၵ်ႇတင်း ၸုမ်းပၢႆးမွၼ်းတႆး ႁူမ်ႈၵၼ် ပူၼ်ႉၶၢပ်ႈတူဝ် ၸၢႆးလၢဝ်သႂ် ၵဝိပၢႆးမွၼ်းတႆး (ၶူးမေႃတႅမ်ႈၽဵင်းၵႂၢမ်းတႆး) ၸိုဝ်ႈသဵင်ယႂ်ႇ တီႈပႃႇႁဵဝ်ႈ (ပႃႇၸႃႉ) ၵုင်းပဝ်း ပွၵ်ႉ 21 ဝဵင်းပၢင်ႇဢူႈလူင် (မေႇမဵဝ်ႉ) ၼႆယဝ်ႉ။
ၸၢႆးလၢဝ်ဢွၼ်ႇ လုၵ်ႈၼွင်ႉပွင်ႈပၢႆ ၸၢႆးလၢဝ်သႂ် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်ပူၼ်ႉၶၢပ်ႈတူဝ် သြႃႇႁဝ်းၶႃႈတႄႉ ယဝ်ႉ တူဝ်ႈလီငၢမ်းၵႂႃႇယဝ်ႉၶႃႈ။ မီးပီႈၼွင်ႉၶႅၵ်ႇ တီႈၸမ်ၵႆ ၸုမ်းပၢႆးမွၼ်းတႆး၊ ပႃႇတီႇပၢႆးမိူင်း၊ ၵေႃလိၵ်ႈလၢႆး ဝဵင်းလိူဝ်ႇ၊ ၼွင်ၶဵဝ်လႄႈ ပၢင်ႇဢူႈလူင် ၸိူဝ်းၼႆႉ ၶဝ်ႈႁူမ်ႈမွၵ်ႈ 500 ၵေႃႉ ရူတ်ႉၵႃးဢမ်ႇယွမ်း 100 လမ်းၶႃႈ”- ဝႃႈၼႆ။
ပေႃးထိုင်မႃး ဝၼ်းတီႈ 11/8/2023 ဝၼ်းၽတ်း ယၢမ်းၵၢင်ၼႂ် 8 မူင်းထိုင် 12 မူင်းၵၢင်ဝၼ်းၸိုင် တေဢွၼ်ၵၼ်ႁႅၼ်းလူႇ သွမ်းတၢင်တူဝ်ပၼ် ၸၢႆးလၢဝ်သႂ် တီႈႁိူၼ်းယေး ဝဵင်းပၢင်ႇဢူႈလူင်ၵႂႃႇ ၼႆယဝ်ႉ။
“ပေႃးထိုင်မႃး ဝၼ်းတီႈ 11 တႄႉ ၸိူဝ်းပီႈၼွင်ႉလုၵ်ႈလၢင်းၼၢင်းမေး တေႁူမ်ႈၵၼ် ႁႅၼ်းလူႇတၢၼ်းပၼ် သွမ်းတၢင်တူဝ်ၵႂႃႇ။ ၼႂ်းပၢင်ပူၼ်ႉၶၢပ်ႈတူဝ် သြႃႇႁဝ်းၶႃႈ ဝၼ်းၼႆႉတႄႉ ပီႈသၢႆမၢဝ်း ဢမ်ႇလႆႈမႃးၶဝ်ႈႁူမ်ႈၸွမ်း ယွၼ်ႉပၢႆးယူႇလီ ၶႃႈဢေႃႈ။ ပီႈလႅင်း သႂ်တႄႉ မႃးၶဝ်ႈႁူမ်ႈယူႇၶႃႈ”- ၸၢႆးလၢဝ်ဢွၼ်ႇ သိုပ်ႇလၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 7/8/2023 (ဝၼ်းၸၼ်) ယၢမ်းႁူဝ်ၶမ်ႈ 6:25 မူင်း ၸၢႆးလၢဝ်သႂ် ၵဝိပၢႆးမွၼ်းတႆး လႆႈလူႉသဵင်ႈသုတ်း မုၼ်ၵႂႃႇ တီႈ ႁိူၼ်းယေး မၼ်းၸၢႆး တီႈဝဵင်းပၢင်ႇဢူႈလူင် (မေႇမဵဝ်ႉ) ယွၼ်ႉလူၺ်ႈတၢင်းပဵၼ်ယဵဝ်ႈဝၢၼ်၊ ပွတ်ႇၵႂ်ႈလႄႈ တၢင်း ပဵၼ်တပ်း ၸိူဝ်းၼႆႉ ၽွင်းဢႃယု 82 ပီ ၼႆယဝ်ႉ။
ၸၢႆးလၢဝ်သႂ်ၼႆႉ ပဵၼ်လုၵ်ႈၸၢႆးလူင် လုင်းၸၢႆးပႃႉၶႅင်ႇလႄႈ ပႃႈၼၢင်းဢေႇၸဵင်ႇ ပဵၼ်ၵူၼ်းၸႃႇတိ ဝဵင်းၵူတ်ႉၶၢႆ မီးပီႈ ၼွင်ႉႁူမ်ႈ တွင်ႉၵၼ် 6 ၵေႃႉ။ မိူၼ်ၼင်ႇ – ၸၢႆးလၢဝ်သႂ်၊ ၸၢႆးလိူၼ်ၶမ်း၊ ၸၢႆးဢၢႆႈသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ်လႄႈ ၼၢင်းတဵင်း ႁၢၼ်ႇ ၸိူဝ်းၼႆႉ။
ၸၢႆးလၢဝ်သႂ်ၼႆႉ တႄႇၼႃႈႁိူၼ်း ၵိုၵ်းၸွမ်း ၼၢင်းသီႇတႃႇ ၵူၼ်းပွၵ်ႉဢွင်ႇတေႃႇမူႇ ဝဵင်းလိူဝ်ႇ(မၼ်းတလေး) မီးလုၵ်ႈ ၸၢႆး ႁူမ်ႈၵၼ် 3 ၵေႃႉ – ၸၢႆးသျႅင်ႇဢူးၼွင်ႇ (ၸၢႆးလူင်)၊ ၸၢႆးၽူဝ်းၼွင်ႇ (ၸၢႆးၵၢင်) လႄႈ ၸၢႆးၸွမ်ၶိူဝ်းသႂ် (ၸၢႆးၸွမ်) ၼႆယဝ်ႉ။
ၸၢႆးလၢဝ်သႂ်ၼႆႉ ပဵၼ်ၸဝ်ႈၵဝိပၢႆးမွၼ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇ ၵေႃႉၼိုင်ႈ မၼ်းၸၢႆး တႅမ်ႈၽဵင်းၵႂၢမ်းတႆး – ၵႂၢမ်းမၢၼ်ႈ မႃး ဢမ်ႇယွမ်း 2,000 ႁူဝ်။ ပဵၼ်ၵေႃႉ ၸုင်ၸၼ် ၼွင်ႉၸၢႆး ၸၢႆးသၢႆမၢဝ်း ၸိုဝ်ႈသဵင်ယႂ်ႇမႃး ၼႂ်းတူင်ႇပၢႆးမွၼ်း ၵေႃႈၸႂ်ႈ လိူဝ် ၼၼ်ႉ ၽူႈႁွင်းၵႂၢမ်းတႆးထႅင်ႈ တင်းၼမ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ