ၸၢႆးလွမ်ႉဝုၼ်း မေႃၵႂၢမ်းတႆး တေႁႃငိုၼ်းၵွင်ၵၢင် ၸွႆႈၵႃႈယူတ်းယႃ ၸၢႆးလၢဝ်သႂ်  

ၸၢႆးလွမ်ႉဝုၼ်း မေႃၵႂၢမ်းတႆး တေႁွင်ႉၵႂၢမ်းႁႃငိုၼ်းၵွင်ၵၢင် ၸွႆႈထႅမ်ၵႃႈယူတ်းယႃပၼ် မေႃတႅမ်ႈၵႂၢမ်း ၸၢႆးလၢဝ်သႂ် ၸဝ်ႈပၢႆး မွၼ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇ ဢၼ်ဢမ်ႇယူႇလီမႃး မီးၶၢဝ်းတၢင်းလိူၼ်ပၢႆယဝ်ႉ။

ပေႃးထိုင်မႃး ဝၼ်းတီႈ 15/7/2023 (ဝၼ်းသဝ်) ယၢမ်းၵၢင်ၶမ်ႈ ၸၢႆးလွမ်ႉဝုၼ်း မေႃၵႂၢမ်းတႆး ၸိုဝ်ႈသဵင်ယႂ်ႇ တေၵႂႃႇႁွင်ႉၽဵင်း ၵႂၢမ်းႁႃငိုၼ်းၵွင်ၵၢင် တီႈႁၢၼ်ႉၶၢႆၶဝ်ႈၽၵ်းတႆး (မိူင်းလႅင်း) ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး တႃႇၸွႆႈထႅမ်ၵႃႈယူတ်းယႃ ၸၢႆးလၢဝ်သႂ် ၸဝ်ႈပၢႆးမွၼ်းတႆး ၵိုၵ်းပိုၼ်း ၸိုဝ်ႈသဵင်ယႂ်ႇ ဢၼ်ပဵၼ်တၢင်းပဵၼ်ယဵဝ်ႈဝၢၼ်၊ တပ်းလႄႈ ပွတ်ႇၵႂ်ႈ ႁိုင်မႃးၶၢဝ်းတၢင်းလိူၼ်ပၢႆယဝ်ႉ။

ၸၢႆးလွမ်ႉဝုၼ်း မေႃၵႂၢမ်းတႆး လၢတ်ႈတီႈၽူႈတွႆႇႁွၵ်ႈဝႃႈ – “ ပၢႆးယူႇလီ ပီႈလၢဝ်သႂ် ဢမ်ႇၶႅမ်ႉ၊ ၶႃႈႁဝ်း ၸင်ႇယိူင်းၸူးဝႃႈ တေဢဝ်ၽဵင်းၵႂၢမ်းပီႈလၢဝ်သႂ်တႅမ်ႈ တီႈဢၼ်ၶႃႈယွၼ်းၶႂၢင်ႉဝႆႉသေလႆႈၶႂၢင်ႉႁွင်ႉမႃး မိူၼ်ၼင်ႇ တၢင်းႁၵ်ႉဢမ်ႇမီးတႃ၊ ႁူဝ်ၸႂ်ၵၢႆႇၶူဝ်၊ ၵေႃႉႁၵ်ႉ ဢႃး ၵၢႆႇ ၸိူဝ်းၼႆႉ ၵႂႃႇႁွင်ႉတီႈၸွမ်းႁၢၼ်ႉၶၢႆၶဝ်ႈၽၵ်းတႆး မိူၼ်ၼင်ႇ ၵဵင်းမႂ်ႇ – မိူင်းၵွၵ်ႇ (ၵုင်းထဵပ်ႈ) – ရယွင်း ၸိူဝ်းၼႆႉ သေ တေလူႇၶၢမ်ႇငိုၼ်း တႃႇသူင်ႇမိူဝ်းၸွႆႈပၼ်ၵႃႈယူတ်းယႃတူဝ် ပီႈလၢဝ်သႂ်။ ယၢမ်းလဵဝ် တီႈႁၢၼ်ႉၶဝ်ႈၽၵ်းတႆး (မိူင်းလႅင်း) မိူင်းၵွၵ်ႇတႄႉ မွၵ်ႇမႃးယဝ်ႉ တေပၼ်ၶၢဝ်းယၢမ်းၶႃႈႁွင်ႉ ၼႂ်းဝၼ်းတီႈ 15 (ဝၼ်းသဝ်) တေထိုင်ၼႆႉ ၶႃႈ”- ဝႃႈၼႆ။

မေႃႁွင်ႉၵႂၢမ်း ၸၢႆးလွမ်ႉဝုၼ်း ယိူင်းဢၢၼ်းဝႆႉဝႃႈ တေၵႂႃႇႁွင်ႉၵႂၢမ်း ၼိုင်ႈတီႈမွၵ်ႈ 2-3 ဝၼ်း၊ ငိုၼ်းသူး တီႈလႆႈမႃး တင်းမူတ်းတေသူင်ႇပၼ် ပီႈလၢဝ်သႂ် ။ ၽႅၼ်ၵၢၼ်ဝႆႉဝႃႈတေၵႂႃႇႁွင်ႉၵႂၢမ်းတီႈဝဵင်းၵဵင်းမႂ်ႇ – မိူင်းၵွၵ်ႇလႄႈ ရယွင်း ဝႃႈၼႆ။

“လွင်ႈၶႃႈ တေ ၵႂႃႇႁႃႁွင်ႉၽဵင်းၵႂၢမ်းတႆး ၸွမ်းႁၢၼ်ႉၶဝ်ႈၽၵ်းတႆးၼႆႉ ၶႃႈၶိုင်ဝႆႉဝႃႈ တေဢမ်ႇမီးလွင်ႈၸွင်းတူဝ်ႉ(ၸွင်းတီႈၼင်ႈ) သင်ၶႃႈ။ ၵွပ်ႈၼႆလႄႈ ႁပ်ႉ တွၼ်ႈပီႈၼွင်ႉ ၽူႈပၼ်ႁႅင်းႁဝ်းၶႃႈ မႃးၶဝ်ႈႁူမ်ႈ ပၼ်ႁႅင်းၼမ်ၼမ်။ ႁဝ်းၶႃႈႁူမ်ႈၵၼ်သေၶိုၼ်းၸွႆႈထႅမ်ပၼ်ပီႈလၢဝ်သႂ်ႁဝ်းၶႃႈ ။ ”- ၸၢႆးလွမ်ႉဝုၼ်း မေႃ ၵႂၢမ်းတႆး သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉဢၼ်ႁဵတ်းၵိၼ်တၢင်းယူႊထုပ်ႉ ဢၼ်လႆႈတၢင်ႇ/ၸႂ်ႉၽဵင်းၵႂၢမ်းၸၢႆးလၢဝ်သႂ် ဝႆႉၸိူဝ်းၼၼ်ႉၵေႃႈ မၼ်းၸၢႆးတုၵ်းယွၼ်းႁႂ်ႈဢွၼ်ၵၼ် ၸွႆႈပၼ်ၶိုၼ်းၸၢႆးလၢဝ်သႂ် ၵေႃႉဢိတ်းၵေႃႉဢွတ်းဝႃႈၼႆ။

ၸၢႆးလွမ်ႉဝုၼ်းလၢတ်ႈဝႃႈ -“ယၢမ်းလဵဝ် ၶႃႈၵေႃႈ ၶဝ်ႈၸူး တႆးၵေႃႉၶႃႈ ၵူၼ်းႁဵတ်း ၵၢၼ်တီႈ ယူႊထုပ်ႉသေလၢတ်ႈဝႃႈ ၸိူဝ်းဢဝ်ၽဵင်းၵႂၢမ်း ၸၢႆးလၢဝ်သႂ် တၢင်ႇၵႂႃႇ ၸိူဝ်းၼၼ်ႉ ႁႂ်ႈႁူမ်ႈၵမ်ႉၸွႆႈ တႃႇၵႃႈယူတ်းယႃတူဝ် ပီႈလၢဝ်သႂ်ၼႆလႄႈ ယၢမ်းလဵဝ်ၵေႃႈ လႆႈဝႆႉ ငိုၼ်းမၢၼ်ႈ 3 သႅၼ်ပျႃးယဝ်ႉ။ ” – ဝႃႈၼႆ။

ၸၢႆးလၢဝ်သႂ် ၽူႈတႅင်ႇတႅမ်ႈၽဵင်းၵႂၢမ်းတႆး ၼႆႉပဵၼ် ပီႈဢၢႆႈလူင် မေႃႁွင်ႈၵႂၢမ်း ၸၢႆးသၢႆမၢဝ်း ၸဝ်းပၢႆးမွၼ်း ၵိုၵ်းပိုၼ်း ၸိုဝ်ႈ သဵင်ယႂ်ႇ။ ယၢမ်းလဵဝ် ၸွမ်းၼင်ႇဢႃယုယႂ်ႇယဝ်ႉလႄႈဢမ်ႇယူႇလီတင်းပီႈတင်းၼွင်ႉ။ ၸၢႆးလၢဝ်သႂ် လႆႈလုမ်းလႃးတူဝ်ဝႆႉတီႈႁိူၼ်းယေး ဝဵင်းပၢင်ႇဢူးလူင် (မေႇမဵဝ်ႉ) ဝႆႉ မီးၶၢဝ်းတၢင်း လိူၼ်ပၢႆယဝ်ႉ။ ၸၢႆးသၢႆမၢဝ်းတႄႉ လုၵ်ႈလၢင်းမေးၼၢင်းလုမ်းလႃးယူတ်းယႃတူဝ်ပၼ်မီးဝႆႉတီႈဝဵင်းလူင်တႃႈၵုင်ႈ ၼၼ်ႉၵေႃႈဢမ်ႇယူႇလီ လႆႈမွၵ်ႈ 2 ပီယဝ်ႉ။

ၸၢႆးလၢဝ်သႂ်ၼႆႉ မီးဢႃယု 81 ပီ မၼ်းၸၢႆး ပဵၼ်လုၵ်ႈၸၢႆး လုင်းပႃႉၶႅင်ႇ ပႃႈၼၢင်းဢေးၸဵင်ႇ ပဵၼ်ၵူၼ်းၸႃတိ ဝဵင်းမူႇၸေႊ ၸိုင်ႈတႆးပွတ်းႁွင်ႇ။ မီးပီႈ ၼွင်ႉ ႁူမ်ႈတွင်ႉ 6 ၵေႃႉ ၸၢႆးလၢဝ်သႂ်ၼႆႉ ပဵၼ်ပီႈဢၢႆႈလူင် လိူဝ်ၼၼ်ႉ ၸၢႆးလိူၼ်ၶမ်း၊ ၸၢႆးသၢမ်၊ ၸၢႆးသၢႆမၢဝ်း၊ ၸၢႆးလႅင်းသႂ် (မေႃၵႂၢမ်း ၵေႃႉၼိုင်ႈ)လႄႈ ၼၢင်းတဵင်းႁၢၼ်ႇ။ ယၢမ်းလဵဝ် ၵိုတ်းၸၢႆးလၢဝ်သႂ်၊ ၸၢႆးသၢႆ မၢဝ်းလႄႈ ၸၢႆးလႅင်းသႂ် 3 ၵေႃႉ ၵူၺ်းယဝ်ႉ။ ၸၢႆးလၢဝ်သႂ်ၼႆႉ ယၢမ်းလဵဝ် မီးဝႆႉ လုၵ်ႈၸၢႆး 3 ၵေႃႉ လႆႈႁူႉၼင်ႇၼႆ။

ၸၢႆးလၢဝ်သႂ်ၼႆႉ ပဵၼ်ၽူႈတႅမ်ႈၽဵင်းၵႂၢမ်းတႆး ၸိုဝ်ႈသဵင်ယႂ်ႇ ၵိုၵ်းပိုၼ်းတႆးမႃး ၵေႃႉၼိုင်ႈ ယဝ်ႉၵေႃႈ ပဵၼ်ပႃးၽူႈႁွင်ႉၽဵင်းၵႂၢမ်း တႆးထႅင်ႈ။ ၽဵင်းၵႂၢမ်း ဢၼ်မၼ်းၸၢႆးၵႆႉႁွင်ႉသေ ၵူၼ်းမိူင်းတႆး တေႁူႉၸတ်းၵၼ်ၼမ်မႃးတႄႉ တေပဵၼ်ၽဵင်းၵႂၢမ်း “ႁူဝ်ၸႂ် ၵၢႆႇၶူဝ်” ၼႆယဝ်ႉ။