ပေႃးထိုင်မႃး ဝၼ်းတီႈ 12/8/2023 ယၢမ်းဝၢႆးဝၼ်း 3 မူင်း ထိုင် 9 မူင်းၵၢင်ၶမ်ႈ သင်ၶၸဝ်ႈလႄႈ ၼုမ်ႇႁၢႆးၸၢႆးယိင်း ႁႅင်း ၵၢၼ်တႆး တေႁူမ်ႈၵၼ် ၸတ်းပၢင်တႆႈတဵၼ်း တိူင်ႇၵၢဝ်ႇယွၼ်းသူးပၼ် ၸဝ်ႈၼၢင်းႁေႃၶမ်းထႆး တူၼ်ထီႉ 9 ၽွင်း ဢႃယုလႆႈ 91 ပီ တီႈဝတ်ႉပႃႇပဝ်ႈ ဢိူင်ႇသီၽုမ်း ဝဵင်းၵဵင်းမႂ်ႇ ၸိုင်ႈထႆး။
ၸဝ်ႈၶူး မႁႃႇသႅင်ၾႃႉ ၽူႈဢွၼ်ႁူဝ်ၸတ်း ပၢင်တႆႈတဵၼ်း ယွၼ်းသူး ၼႂ်းဝၼ်းမႄႈ ၸိုင်ႈထႆးၼႆႉ လၢတ်ႈတီႈၽူႈတွႆႇ ႁွၵ်ႈဝႃႈ – “ၼင်ႇႁိုဝ် ပီႈၼွင်ႉတႆးႁဝ်း ပေႃးတေလႆႈ ၼႄၾၢင်ႁၢင်ႈၼမ်ႉၸႂ်ဝႃႈ ႁဝ်းၵေႃႈ ႁူႉၸၵ်းၵုင်ႇမုၼ်ငဝ်းၸဝ်ႈမႄႈ ၼၢင်းႁေႃၶမ်း ႁဝ်းယူႇ ထႅင်ႈလွင်ႈၼိုင်ႈၵေႃႈ ၼင်ႇႁိုဝ် ပေႃးတေပဵၼ် လွင်ႈၶုၵ်ႉၶူၼ်ႉဝူၼ်ႉထိုင်မႄႈၾၢႆႇမႄႈမၼ်း ႁႂ်ႈလႆႈဢဝ်တိုဝ်းတၢင်းၼႆႉ သေ ႁႂ်ႈလႆႈႁဵတ်းၵုသူလ်တၢင်းလီပၼ်ပႃး တင်းသွင်ပႃႈသွင်ၾၢႆႇ”- ဝႃႈၼႆ။
လိူဝ်ၼၼ်ႉ တေဢွၼ်ၵၼ် သုတ်ႇမုၼ်း ယိူင်းၸူးထိုင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ႁႂ်ႈယူႇလီသုင်းဝၢၼ်။
လွင်ႈတူင်ႉၼိုင် ၼႂ်းပၢင်တႆႈတဵၼ်း တိူင်ႇၵၢဝ်ႇယွၼ်းသူးထိုင် ၼႂ်းဝၼ်းၵိူတ်ႇၼၢင်းႁေႃၶမ်းထႆး တူၼ်ထီႉ 9 ဢႃယု 91 ပီၼႆႉ တေယူႇတီႈ သင်ၶၸဝ်ႈ ၼုမ်ႇႁၢႆးၸၢႆးယိင်း ႁႅင်းၵၢၼ်တႆး ႁူမ်ႈၵၼ် လွတ်ႈဢၢၼ်ႇထမ်မၸၵ်ႈၵျႃႇ လင်ႇၵႃႇၾၢႆႇတႆး၊ ႁူမ်ႈၵၼ် သုတ်ႇ မုၼ်းဝႆႈၽြႃး လမ်ႇၶူးဝႃးဝုၼ်းၸုမ်ႉ၊ ထွမ်ႇတြႃး ၼႂ်းႁူဝ်ၶေႃႈ “ၵုင်ႇမုၼ်ငဝ်ႈပေႃႈမႄႈ လုၵ်ႈလၢင်းထုၵ်ႇလီၶုၵ်းၶူၼ်ႉဝူၼ်ႉထိုင်”၊ ၼင်ႈတြႃး လွင်ႈသွမ်းသၢၼ် သင်ႇၶႃႇသႃႇမၼေႇ ၸဝ်ႈ (33) တူၼ် လူႇတၢၼ်းၸႃႇၵ ၶူဝ်းလူႇ ယိူင်းၸူးထိုင် ပေႃႈမႄႈၽႂ် မၼ်း ယၢတ်ႇၼမ်ႉၶွမ်ႈတဝ်ႈၵႂႃႇ ၸိူဝ်းၼႆႉ။
ဝတ်ႉပႃႇပဝ်ႈ ဝဵင်းၵဵင်းမႂ်ႇၼႆႉ ပေႃးထိုင်မႃးဝၼ်းၵိူတ်ႇၶုၼ်ႁေႃၶမ်း (ဝၼ်းပေႃႈ) လႄႈ ဝၼ်းၵိူတ်ႇၶုၼ်ႁေႃၶမ်း (ဝၼ်းမႄႈ) ၸိုင် တေၸတ်းႁဵတ်းပၢင်တႆႈတဵၼ်း တိူင်ႇၵၢဝ်ႇယွၼ်းသူးထိုင် မႃးမီးလၢႆပီယဝ်ႉ။ ပီၼႆႉ တိုၵ်းသူၼ်းထိုင် ၼုမ်ႇ ႁၢႆးၸၢႆးယိင်း ႁႅင်းၵၢၼ်တႆး မႃးၶဝ်ႈႁူမ်ႈတႆႈတဵၼ်းယွၼ်းသူးပၼ်သေၵမ်း – ၸဝ်ႈၶူးမႁႃႇသႅင်ၾႃႉလၢတ်ႈ။
ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈၵဝ်ႈတႄႉၸၢမ်ႇပူႈၼွၼ်းၽေးၵႂႃႇလႆႈ 7-8 ပီယဝ်ႉသေတႃႉ ပေႃးထိုင်မႃးဝၼ်းၵိူတ်ႇမၼ်းၸဝ်ႈ ဝၼ်းတီႈ 5 တီႊသႅမ်ႊပိူဝ်ႊ ၵေႃႈ ၵူၼ်းမိူင်းထႆးတိုၵ်ႉၸတ်းႁဵတ်းပၢင်ၶုၵ်းၶူၼ်ႉတႆႈတဵၼ်းယွၼ်းသူးပၼ်ယူႇ။
ၸဝ်ႈၼၢင်းႁေႃၶမ်းတူၼ်ထူၼ်ႈၵဝ်ႈ တႄႉ ပၢႆးယူႇလီဢမ်ႇၶႅမ်ႉလႅပ်ႈ၊ ဢႃယုယႂ်ႇယဝ်ႉလႄႈ လႆႈယူတ်းယႃတူဝ်ဝႆႉ။
