ၵူၼ်းပၢႆႈၽေးလႅၼ်လိၼ်တႆး – ယၢင်းလႅင် ဢမ်ႇလႆႈႁပ်ႉလွင်ႈၵမ်ႉထႅမ်ၶိုတ်းတၼ်း

ၵူၼ်းပၢႆႈၽေးသိုၵ်း ၸွမ်းလႅၼ်လိၼ်တႆး – ယၢင်းလႅင် ယၢပ်ႇၽိုတ်ႇလွင်ႈယူႇသဝ်းၵိၼ်သၢင်ႈ ဢမ်ႇလႆႈႁပ်ႉလွင်ႈၸွႆႈထႅမ်ၶိုတ်းတၼ်း။

တႄႇဢဝ်မိူဝ်ႈဝၼ်းတီႈ 6/8/2023 ၼၼ်ႉမႃး သိုၵ်းမၢၼ်ႈတင်း PDF ပိုတ်းယိုဝ်းၵၼ်ႁၢဝ်ႈႁႅင်းလႄႈ KNDF B – 02 ပိုၼ်ၽၢဝ်ႇ ပိၵ်ႉသဵၼ်ႈတႃႈသၢႆတၢင်း လွႆၵေႃႇ – မိူင်းပၢႆး  ႁဵတ်းႁႂ်ႈၵၢၼ်ၵမ်ႉၸွႆႈ ဢမ်ႇၶိုတ်းတၼ်းလႄႈ ၵူၼ်းပၢႆႈၽေး ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်  ယႃႈယႃၵႅမ်တူဝ် ။

ၽူႈတူင်ႉၼိုင်ႈၼႂ်ၸုမ်းၸွႆႈၵူၼ်းပၢႆႈၽေးလၢတ်ႈတီႈၽူႈတွႆႇႁွၵ်ႈဝႃႈ – “ ၶၢဝ်းၶိဝ်းၼႆႉ ပၢင်တိုၵ်းၵေႃႈ ၶိုၼ်းၶဵင်ႈၶႅင်မႃး၊  ၸဝ်ႈတႃႇၼ ဢၼ်ၵမ်ႉၸွႆႈၵူၼ်းပၢႆႈၽေးၸိူဝ်းၼၼ်ႉၵေႃႈ ဢမ်ႇၸၢင်ႈၸွႆႈထႅမ်လႆႈတဵမ်တီႈ။ ၶိူင်ႈၶူဝ်းၵမ်ႉၵႅမ် မၢင်မဵဝ်း ၵေႃႈသူင်ႇပၼ် ၵူၼ်းပၢႆႈၽေးၶဝ်ယူႇ ၵူၺ်းၵႃႈ မၢင်ပွၵ်ႈ  ထိုင်ၼႂ်းမိုဝ်းၵူၼ်းပၢႆႈၽေးမူတ်းယူႇ ၊ မၢင်ပွၵ်ႈၵေႃႈ ဢမ်ႇႁွတ်ႈသဵင်ႈ။ ၼႂ်းလိူၼ်ၼႆႉတႄႉ ၸဝ်ႈတႃႇၼၵေႃႈ ပႆႇမႃးသေၸုမ်း။မိူဝ်ႈလိူၼ်ပူၼ်ႉမႃး ယင်းလႆႈ ၼိုင်ႈႁိူၼ်းလႂ် ၶဝ်ႈသၢၼ်ၼိုင်ႈထူင်ယူႇ” – ဝႃႈၼႆ။

ၼိူဝ်သဵၼ်ႈတၢင်းလူင်မိူင်းပၢႆးၸိူဝ်းၼၼ်ႉၵေႃႈ PDF ၶဝ်ႁၢမ်ႈၵႂႃႇမႃးဝႆႉလႄႈ ၸုမ်းၸွႆႈၵူၼ်းပၢႆႈၽေးၶဝ် လႆႈၵႂႃႇမႃးတၢင်းလတ်းလႄႈ မီးလွင်ႈယၢပ်ႇၽိုတ်ႇလၢႆလွင်ႈ ။

ဢိင်ၼိူဝ်လွင်ႈၼႆႉ ၽူႈတူင်ႉၼိုင်ႈၼႂ်ၸုမ်းၸွႆႈၵူၼ်းပၢႆႈၽေး လၢတ်ႈတီႈၽူႈတွႆႇႁွၵ်ႈဝႃႈ – “ သဵၼ်ႈတၢင်းလူင်သမ်ႉ ၶဝ်ႁၢမ်ႈ ဝႆႉလႄႈ လႆႈၵႂႃႇတၢင်းလတ်း။သမ်ႉလႆႈ လတ်းၽၢၼ်ႇ ၵဵတ်ႉလၢၼ်ႇ PNO လႄႈ ယၢပ်ႇဝႆႉ။ ၶဝ်ၵဵပ်းငိုၼ်းလၢႆလၢႆမဵဝ်း မိူၼ်ၼင်ႇ သင်ႇၶႄႇၼိုင်ႈလမ်းလႂ် ၶဝ် 500 ။ယဝ်ႉၵေႃႈ ၼမ်ႉမၼ်းထၢတ်ႇသီႇၸိူဝ်း ၼိုင်ႈပေႇပႃႇလႂ်ၵႃႈႁိုဝ်ၼႆ ၶဝ်ၵဵပ်းဢေႃႈ။တႃႇၶဝ်ႈသၢၼ်သမ်ႉ တိုၼ်းဝႃႈ ဢမ်ႇပၼ်သူင်ႇ” – ဝႃႈၼႆ။

မိူၼ်ၼင်ႇ ပၢင်သဝ်းၵူၼ်းပၢႆႈၽေး ဢၼ်မီးတၢင်းတူၵ်းၾၢႆၶုၼ်ၸိူဝ်းၼၼ်ႉၵေႃႈ ႁူဝ်ၵူၼ်းမီး ဢမ်ႇယွမ်း 6 ႁဵင်  ၼိုင်ႈလိူၼ်လႂ်  ၶဝ်ႈသၢၼ်သဵင်ႈ 200 ထူင် ။

ၵူၼ်းပၢႆႈၽေးတီႈဝဵင်ူၾၢႆၶုၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်တႄႉ  တႃႇၽၵ်းတႄႉ ၽုၵ်ႈသွမ်ႈသေ ၵိၼ်ႁင်းၵွႆးလႆႈယူႇသေတႃႉ တႃႇၶဝ်ႈသမ်ႉ ဢမ်ႇမီးလႄႈ ပဵၼ်ဢၼ်ယၢပ်ႇၽိုတ်ႇ။ၵူၼ်းၵမ်ႉၸွႆႈႁဝ်းၵေႃႈ ဢမ်ႇမႃးၸွႆႈလႆႈ ၶိုတ်းၶၢဝ်းယၢမ်း။ ငိၼ်းဝႃႈ ၵႂႃႇၵမ်ႉၸွႆႈတၢင်း မိူင်းပၢႆးၼမ် ” –  ဝႃႈၼႆ။