ၾၢႆႇႁႅင်းၵၢၼ်မိူင်းႁူမ်ႈတုမ် တေဢွၵ်ႇၶေႃႈသင်ႇ ႁႂ်ႈႁႅင်းၵၢၼ်ယၢၼ်မိူင်း ၸိူဝ်းႁဵတ်းၵၢၼ်ၸွမ်းၼွၵ်ႈမိူင်း လူၺ်ႈ ပိူင်ဢႅမ်ႊဢူဝ်ႊယူႊ (MOU)ၼၼ်ႉ တၵ်းလႆႈသူင်ႇငိုၼ်းပၼ်တၢင်းႁိူၼ်းၶိုၼ်းၵူႈလိူၼ်   25 % ၶွင်ငိုၼ်းလိူၼ် ၸဝ်ႈၵဝ်ႇ လူၺ်ႈလတ်းၽၢၼ်ႇယေးငိုၼ်း ပဵၼ်တၢင်းၵၢၼ်ဝႃႈၼႆ။

သိုဝ်ႇၶၢဝ်ႇ VOA ႁၢႆးငၢၼ်းဝႆႉဝႃႈ – “ ပိူင်ႁႅင်းၵၢၼ် ၸိူဝ်းလူင်းလၢႆးမိုဝ်း MOU သေ ႁဵတ်းၵၢၼ်ၼွၵ်ႈမိူင်း ပဵၼ်တၢင်း ၵၢၼ်ၼႆႉ တႄႇမႃးမိူဝ်ႈ ပီ 2022 လိူၼ်မေႊ။ၵမ်ႈၼမ် ၵူၼ်းမိူင်းႁူမ်ႈတုမ် ၶဝ်ႈႁဵတ်းၵၢၼ်ၼႂ်း မိူင်းၸိုင်ႈထႆး လႄႈ မလေးသျႃး ။ ၼႂ်းၼိုင်ႈပီၵူၺ်း ၵူၼ်းၶဝ်ႈႁဵတ်းၵၢၼ်ၼႂ်းမိူင်းထႆးမီးသႅၼ်ပၢႆ ။ ဢိင်ၼိူဝ်လွင်ႈၼႆႉ ၸၢင်ႈမီးပိူင် ႁႅင်းၵၢၼ်တေလႆႈသူင်ႇငိုၼ်းပၼ်ၶိုၼ်းၵူၼ်းတၢင်းႁိူၼ်း တႃႇ 25 % ၼႂ်းငိုၼ်းလိူၼ် ၸဝ်ႈၵဝ်ႇ။ လွင်ႈၼႆႉ တေတႄႇမိူဝ်ႈလႂ်တႄႉပႆႇႁူႉတႅတ်ႈတေႃး ။ ယၢမ်းလဵဝ်တႄႉတိုၵ်ႉမီးၶၢဝ်ႇဢွၵ်ႇမႃးၸိူင်ႉၼႆၵူၺ်း ” – ဝႃႈၼႆဝႆႉ။

ႁႅင်းၵၢၼ်ယၢၼ်မိူင်း ဢၼ်မီးၼႂ်းၸိုင်ႈထႆး ၊ မလေးသျႃး ၊ ၵျပၢၼ်ႇ ၸိူဝ်းၼႆႉ တႄႇဝၼ်းတီႈ 1/11/2022 ထိုင် ဝၼ်းတီႈ 28/4/2023 ၼႂ်းၶၢဝ်းတၢင်း 6 လိူၼ်  သူင်ႇငိုၼ်းၸူးၵူၼ်းတၢင်းႁိူၼ်း တီႈမိူင်းႁူမ်ႈတုမ် သူင်ႇလၢႆးပဵၼ်တၢင်းၵၢၼ် မီး 1.5 ပီႊလီႊယၼ်ႊ တေႃႊလႃႊၼႆ လုမ်းၽွင်းတၢင်မၢၼ်ႈ ပိုၼ်ၽၢဝ်ႇဝႆႉ ၼင်ႇၼႆ။

ဢူးၺုၼ်ႉဝိၼ်း ၽူႈၶဝ်ႈတူင်ႉၼိုင်ႈၼႂ်းၸုမ်းၸွႆႈႁႅင်းၵၢၼ်မိူင်းႁူမ်ႈတုမ် (မြန်မာအလုပ်သမားရေးဌာနရဲ့ အမြဲတမ်းအတွင်းဝန်) လၢတ်ႈတီႈ VOA ဝႃႈ – “ ပိူင်ဢၼ်ၼႆႉ တေႁဵတ်းႁႂ်ႈ ႁႅင်းၵၢၼ် လႆႈသူင်ႇငိုၼ်း တီႈႁိူၼ်း မီးၶွပ်ႇမီးပိူင်။ၼင်ႇႁိုဝ် ႁႅင်းၵၢၼ် တေဢမ်ႇလႆႈၺႃး ၵၢၼ်လွၵ်ႇလႅၼ်ၵိၼ်ငိုၼ်း။ ယွၼ်ႉၼၼ် လွင်ႈၼႆႉ တေဢုပ်ႇၵုမ်ႁဵတ်းသၢင်ႈႁူဝ်ယွႆႈမၼ်းၵႂႃႇထႅင်ႈယူႇ ” – ဝႃႈၼႆ။

လွင်ႈၼႆႉၸုမ်းၸွႆႈႁႅင်းၵၢၼ်ယၢၼ်မိူင်း တႄႉလၢတ်ႈဝႃႈ ဢၼ်ပဵၼ်လႆႈသုတ်းတႄႉ သိုၵ်းမၢၼ်ႈၶႂ်ႈ လႆႈၶွၼ်ႇတီႈ ၵူၼ်းဢွၵ်ႇႁဵတ်းၵၢၼ်ၼွၵ်ႈမိူင်းလူၺ်ႈ MOU ၊ ၾၢႆႇၼိုင်ႈ ၶႂ်ႈႁူႉသဵၼ်ႈမၢႆၵူၼ်းႁဵတ်းၵၢၼ်တႅတ်ႈတေႃး၊ ၾၢႆႇၼိုင်ႈၵေႃႈ ၶႂ်ႈထတ်းသဵၼ်ႈမၢႆၵူၼ်းႁဵတ်းၵၢၼ်လႄႈသဵၼ်ႈမၢႆငိုၼ်းတွင်းၶဝ်ႈဢွၵ်ႇမိူင်း ၵေႃႈပဵၼ်လႆႈဝႃႈၼႆ။

ယၢမ်းလဵဝ် ၵူၼ်းၸိူဝ်းၵႂႃႇႁဵတ်းၵၢၼ်မိူင်းထႆးမိူင်းမလေးသျႃးၵမ်ႈၼမ် သူင်ႇငိုၼ်းတၢင်းႁိူၼ်းလူၺ်ႈလၢႆး ၵူၼ်းႁဵတ်းၵၢၼ်ဢူၼ်းငိုၼ်းၸွမ်းလႅၼ်လိၼ် ဢမ်ႇၼၼ်လူၺ်ႈလၢႆးၽႂ်မၼ်းၵူၺ်း ။ ဢၼ်သူင်ႇတင်းယေးငိုၼ်းလႄႈပဵၼ်တၢင်းၵၢၼ်ၼႆႉ မီးၵမ်ႈပႃႈၵေႇ။