မိူဝ်ႈၼႆႉ ဝၼ်းတီႈ 9/8/2023 ယၢမ်းၵၢင်ၼႂ် သိုၵ်းမၢၼ်ႈ ယိုတ်ႈမိူင်း ဢဝ်ၶိူင်ႈမိၼ်တိုၵ်း (ၵျႅတ်ႊၾၢႆႊတိူဝ်ႊ) လမ်းၼိုင်ႈ မႃး ပၼ်ႇလဵပ်ႈ ၼႂ်းဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း 2 ပွၵ်ႈ ၶိူင်ႈမိၼ်ၼႆႉ လုၵ်ႉတၢင်းၼမ်ႉၸၢင်မႃး ဝႃႈၼႆ။

ၽူႈတူင်ႉၼိုင် ၵၢၼ်သိုၵ်း ၼႂ်းဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၼႆႉ ယၢမ်းၵၢင်ၼႂ် သိုၵ်းမၢၼ်ႈ ဢဝ် ၶိူင်ႈမိၼ်တိုၵ်း မႃးပၼ်ႇလဵပ်ႈ တီႈဝဵင်းလၢႆးၶႃႈၼႆႉ 2 ၵမ်းယဝ်ႉ။ ယၢမ်းၵၢင်ၼႂ် 10:26 မူင်းၼၼ်ႉ ၵမ်းၼိုင်ႈ မႃးပၼ်ႇတၢင်း လၢႆးၶႃႈသေ လဵပ်ႈဢွၵ်ႇမႃးတၢင်းၼွင်လႅင် ။ ယဝ်ႉဝၢႆႇပွၵ်ႈမိူဝ်းၶိုၼ်းတၢင်းၼမ်ႉၸၢင်။ ယၢမ်းၵၢင်ဝၼ်း 11:55 မူင်းသမ်ႉ ၶိူင်ႈမိၼ် ၶဝ် လုၵ်ႉတၢင်းၼမ်ႉၸၢင် မိၼ်ပၼ်ႇမႃးတၢင်းၼွင်လႅင် – လဵပ်ႈၵႂႃႇတၢင်းလၢႆးၶႃႈသေ ပွၵ်ႈ ၶိုၼ်းၼမ်ႉၸၢင်။ ၶိူင်ႈမိၼ်ၶဝ်ၼၼ်ႉ မႃးပၼ်ႇလဵပ်ႈလမ်းလဵဝ် ”- ဝႃႈၼႆ။

ယၢမ်းလဵဝ် သိုၵ်းမၢၼ်ႈၼႆႉ ဢဝ်ၶိူင်ႈမိၼ်မႃးပၼ်ႇလဵပ်ႈၵူၺ်းဢမ်ႇၵႃး ထႅမ်ႁႅင်းသိုၵ်းၶိုၼ်ႈပႃးထႅင်ႈၵူႈဝၼ်း ၊ ၵူၼ်းမိူင်းတူၵ်းၸႂ်။

“ပေႃးၶဝ် ၶိုၼ်ႈၸူးမႃးတိၵ်းတိၵ်းတႄႉ သဵင်ၵွင်ႈၸၢင်ႈတႅၵ်ႇထႅင်ႈယူႇ ၊ သင်ဝႃႈ သဵင်ၵွင်ႈတႅၵ်ႇႁၢဝ်ႈႁႅင်းထႅင်ႈၵမ်းၼိုင်ႈတႄႉ ပၢင်တိုၵ်းၼႆႉ တိုၼ်းတေပဵၼ်ၶၢဝ်းယၢဝ်း။ ယၢမ်းလဵဝ် သိုၵ်းမၢၼ်ႈၼႆႉ တၢင်းလိၼ်ၵေႃႈ ၶဝ်ထႅမ်ႁႅင်းသိုၵ်းမႃးထႅင်ႈ မိူဝ်ႈၼႆႉ ဝၼ်း တီႈ 9 ယၢမ်းၵၢင်ၼႂ် ၶဝ်ဢဝ်ၶိူင်ႈမိၼ်မႃးပၼ်ႇထႅင်ႈ။ တင်းႁဝ်းၶႃႈတႄႉ ပႂ်ႉတူၺ်းငဝ်းလၢႆးဝႆႉယူႇ သင်ဝႃႈ ၶဝ်ၶိုၼ်ႈလေႃႇတိုၵ်း ႁဝ်းတႄႉ သဵင်ၵွင်ႈတိုၼ်းတႅၵ်ႇဢမ်ႇႁၢၼ်ႉ”- ၽူႈတူင်ႉၼိုင် ၵၢၼ်သိုၵ်း ၼႂ်းဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈၼႆႉသေ ၵူၼ်းမိူင်းပိုၼ်ႉတီႈ ဢွၼ်ၵၼ်မႆႈၸႂ် ၵူဝ်ပၢင်တိုၵ်း လၢမ်းၽႄႈႁၢဝ်ႈႁႅင်းလႄႈ ၶၢဝ်းယၢဝ်း ယၢမ်းလဵဝ် သမ်ႉ ပဵၼ်ၶၢဝ်းၵၢၼ် ၸိူဝ်းၼႆႉသေ ၵူဝ်ႁၢမ်းၵၢၼ်ၵၼ် ၼႆယဝ်ႉ။  

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ယၢမ်းၵၢင်ၼႂ် 10 မူင်းပၢႆ သိုၵ်းမၢၼ်ႈ ဢဝ်ၶိုၼ်ႈမိၼ် မႃး လဵပ်ႈ တီႈဝဵင်းလၢႆးၶႃႈၼႆႉ ထႅင်ႈယဝ်ႉ။ မိူဝ်ႈၼႆႉ ၾႃႉဝူတ်းလႄႈ ၶိူင်ႈမိၼ်ၶဝ် ဢမ်ႇပေႃးမိၼ်သုင် ႁၼ်ၶဝ်မိၼ် ဢမ်ႇပူၼ်ႉမွၵ်ႇ ၵုမ်ႇၶႃႈ ပဵၼ်ၶိူင်ႈမိၼ်တိုၵ်း မႃးပၼ်ႇလမ်းၼိုင်ႈၶႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 6/8/2023 ယၢမ်းၵၢင်ၼႂ် 6 မူင်းပၢႆ သိုၵ်းမၢၼ်ႈ တပ်ႉၶမယ 278 ဢဵၼ်ႁႅင်း 70 ၵေႃႉ ၶိုၼ်ႈလေႃႇ တိုၵ်းတပ်ႉပၢင်သဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA တီႈၶၢႆးၽၵ်းၼၢမ် ၾၢႆႇဢွၵ်ႇဝၢၼ်ႈၼမ်ႉပွၵ်ႉ တီႈပၢင်တိုၵ်းၼၼ်ႉ ၾၢႆႇ SSPP ၸၼ်ႉသိုၵ်းႁၢၼ် တူၵ်းသုမ်းၵေႃႉၼိုင်ႈ။

ၼႂ်းဝၼ်းၼၼ်ႉၵူၺ်း ယၢမ်းၵၢင်ၼႂ် 7 မူင်းၶိုင်ႈ SSPP ႁႅၼ်းသိုၵ်းလေႃႇတိုၵ်း သိုၵ်းမၢၼ်ႈ တပ်ႉၶမယ 573 ဢဵၼ်ႁႅင်းသိုၵ်း မၢၼ်ႈမွၵ်ႈ 60 ၵေႃႉ တၢင်းၾၢႆႇဢွၵ်ႇဝၢၼ်ႈမၢၵ်ႇလၢင်း ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ မၢတ်ႇၸဵပ်း 6 ၵေႃႉ တီႉလႆႈတူဝ်လိပ်း 2 ၵေႃႉ ၵွင်ႈ 2 လဝ်းလႄႈ ၵႃး 1 လမ်း။

တႄႇဢဝ် ဝၼ်းတီႈ 7/8/2023 ၼႆႉမႃး သိုၵ်းမၢၼ်ႈ ဢွၵ်ႇၶေႃႈႁၢမ်ႈ ၵူၼ်းမိူင်း ယႃႇႁႂ်ႈဢွၵ်ႇႁိူၼ်းယေးၵၼ် ယၢမ်းၵၢင်ၶမ်ႈ – ၵၢင်ၶိုၼ်း တႄႇဢဝ် ယၢမ်းၵၢင်ၶမ်ႈ 6 မူင်း – 6 မူင်းၵၢင်ၼႂ် မိူၼ်ၼင်ႇ ဝဵင်းပၢင်လူင်၊ လၢႆးၶႃႈ၊ မိူင်းၼွင်လႄႈ မိူင်းၵိုင် ၸိူဝ်း ၼႆႉ။ ယဝ်ႉၵေႃႈ တီႈၸႄႈဝဵင်းမူႇၸေႊ ၸိူဝ်းၼႆႉထႅင်ႈ။