သိုၵ်းမၢၼ်ႈပိုၼ်ၽၢဝ်ႇ ႁၢမ်ႈဢွၵ်ႇၼွၵ်ႈႁိူၼ်း ယၢမ်းၵၢင် ၶိုၼ်း လၢႆလၢႆၸႄႈဝဵင်းၼႂ်းမိူင်းတႆး

ၼႂ်းလိူၼ် ဢေႃႊၵတ်ႉသ်ၼႆႉ   သိုၵ်းမၢၼ်ႈ ပိုၼ်ၽၢဝ်ႇႁၢမ်ႈဢွၵ်ႇၼွၵ်ႈႁိူၼ်းယေးယၢမ်းၵၢင်ၶမ်ႈ ၵၢင်ၶိုၼ်း ၼႂ်းလၢႆလၢႆ ၸႄႈဝဵင်းၼႂ်းမိူင်းတႆး မိူၼ်ၼင်ႇၸႄႈဝဵင်းတူၼ်ႈတီး ၊ မိူင်းၵိုင်၊ လၢႆးၶႃႈ၊ သီႇပေႃႉ ၊ ၵျွၵ်ႉမႄး ၸဵမ်ၸိူဝ်းၼႆႉသေ   ပိုၼ်ၽၢဝ်ႇဝႆႉပႃးဝႃႈ တေဢမ်ႇလႆႈ ၶွၼ်ႈတုမ်ၵၼ် 5 ၵေႃႉ ၶိုၼ်ႈၼိူဝ်ဝႃႈၼႆ။

ၵူၼ်းၼုမ်ႇ ဝဵင်းတူၼ်ႈတီးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “    ယွၼ်ႉမီးၵူၼ်း ၽိတ်းမေႃး ၶႃႈႁႅမ် ၵၼ်တၢႆလႄႈ ႁၢမ်ႈၵူၼ်းမိူင်းဢွၵ်ႇၼွၵ်ႈႁိူၼ်းယၢမ်းၵၢင်ၶိုၼ်း – ၾၢႆႇသိုၵ်းမၢၼ်ႈတႄႉပိုၼ်ၽၢဝ်ႇၼင်ႇၼႆ။ ဝၢႆးလင် ၶေႃႈပိုၼ်ၽၢဝ်ႇႁၢမ်ႈဢွၵ်ႇႁိူၼ်းၼႆႉ သိုၵ်းမၢၼ်ႈၵေႃႈပႂ်ႉတူၺ်းႁၢၼ်ႉၵိၼ်ၵျေႃႇႁွင်ႉၵႂၢမ်း KTV ၸိူဝ်းၼႆႉလၢႆလၢႆႁၢၼ်ႉ။ ယွၼ်ႉၼႆႉသေ ၵူၼ်းၼုမ်ႇၸိူဝ်းၵႆႉဢွၵ်ႇႁိူၼ်းၵႂႃႇဢႅဝ်ႇၵိၼ်ၵျေႃႇၵၢင်ၶမ်ႈၵၢင်ၶိုၼ်းတႄႉယၢပ်ႇၸႂ်တႄႉယဝ်ႉ”- ဝႃႈၼႆ။

ၼႂ်းၶေႃႈပိုၼ်ၽၢဝ်ႇႁၢမ်ႈဢွၵ်ႇၼၼ်ႉ ပႃးဝႆႉဝႃႈ ပိူင်လူင်ပဵၼ် တႃႇလွင်ႈႁူမ်ႇလူမ်ႈၼႆသေတႃႉ သမ်ႉႁၢမ်ႈၵူၼ်းမိူင်းၶွၼ်ႈတုမ်ၵၼ် 5 ၵေႃႉၶိုၼ်ႈၼိူဝ်ပႃးထႅင်ႈ။ ၼႂ်းၸႄႈဝဵင်းၵျွၵ်ႉမႄးၵေႃႈ ၺႃးသိုၵ်းမၢၼ်ႈ ပိုၼ်ၽၢဝ်ႇႁၢမ်ႈ ဢွၵ်ႇတၢင်းၼွၵ်ႈၵၢင်ၶမ်ႈၶိုၼ်း မိူၼ်ၵၼ်။

ၵူၼ်းၼႂ်းပိုၼ်ႉတီႈၵျွၵ်ႉမႄးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်တႄႇႁၢမ်ႈၸဵမ်မိူဝ်ႈ မၢၵ်ႇတႅၵ်ႇ တီႈလုမ်း ၽူႈၵွၼ်းပွၵ်ႉ ၼၼ်ႉမႃး။  ၶဝ်ပိုၼ်ၽၢဝ်ႇႁၢမ်ႈဢွၵ်ႇႁိူၼ်းယၢမ်းၵၢင်ၶမ်ႈ 7 မူင်းတေႃႇထိုင် 4 မူင်းၵၢင်ၶမ်ႈ ၼႆဢေႃႈ။ ဢမ်ႇ ႁူႉၶဝ် တေပူတ်းပႅတ်ႈမၢႆႈမီႈၼႆႉမိူဝ်ႈလႂ် ”-  ဝႃႈၼႆ။

မိူဝ်ႈ ဝၼ်းတီႈ 6/8/2023 ယၢမ်းၵၢင်ဝၼ်းၼၼ်ႉ မၢၵ်ႇတႅၵ်ႇတီႈလုမ်းၽူႈၵွၼ်းပွၵ်ႉ မၢႆ 1 ဢၼ်ပၵ်းဝႆႉၾၢႆႇလင် ႁူင်း ႁေႃးၵၢင်ဝဵင်း တီႈသဵၼ်ႈတၢင်းလူင်မိူင်းႁူမ်ႈတုမ် ၼႂ်းၵၢင်ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တၢႆ 2 ၵေႃႉ မၢတ်ႇၸဵပ်း 1 ၵေႃႉ ။ ယွၼ်ႉလွင်ႈၼႆႉသေ သိုၵ်းမၢၼ်ႈ ၸင်ႇဢဝ်လွင်ႈႁူမ်ႈလူမ်ႇ ႁၢဝ်ႈႁႅင်း  ။

လိူဝ်ၼၼ်ႉ ပိုၼ်ႉတီႈဢၼ်ပဵၼ်ပၢင်တိုၵ်းသိုၵ်းသိူဝ် မိူၼ်ၼင်ႇ မိူင်းၵိုင် ၊ လၢႆးၶႃႈ၊ မူႇၸေႊ ၸိူဝ်းၼႆႉၵေႃႈ သိုၵ်းမၢၼ်ႈႁၢမ်ႈဢွၵ်ႇၼွၵ်ႈႁိူၼ်းၶၢဝ်းယၢမ်းၵၢင်ၶမ်ႈၵၢင်ၶိုၼ်း – ဝႃႈၼႆဝႆႉ။

ၾၢႆႇၼိုင်ႈၵူၼ်းပၵ်းတႃၵၢၼ်မိူင်း ထတ်းသၢင်ဝႃႈ – မၼ်းပဵၼ်ၶၢဝ်း 8 သီႇတူဝ်ၵေႃႈၸႂ်ႈ၊ သိုၵ်းမၢၼ်ႈသၢင်ႈလွင်ႈတၢင်း တႃႇႁႂ်ႈလုမ်ႈၾႃႉႁၼ်လီၵမ်ႉယၼ်ပၼ်ႁႅင်းဢၼ်မၼ်းပိုၼ်ၽၢဝ်ႇတေႃႇဢႃယု ငဝ်းလၢႆးၶိုၵ်ႉၶၢၵ်ႉ ၼၼ်ႉၵေႃႈပဵၼ်လႆႈ ဝႃႈၼႆ။

လွင်ႈသိုၵ်းမၢၼ်ႈ ဢွၵ်ႇလိၵ်ႈႁႄႉႁၢမ်ႈၵူၼ်းမိူင်း မႃးၵူႈလွၵ်းၵူႈလၢႆးၼႆႉ ပဵၼ်ၾိင်ႈသိုၵ်းမၢၼ်ႈယိုတ်းမိူင်းၶဝ် ႁဵတ်းမႃးပၢၼ်သိုပ်ႇပၢၼ်လႄႈ လႆႈဝႃႈ ပဵၼ်ၵၢၼ်ၶီႇၼဵၵ်းတဵၵ်းတဵင်ႇၵူၼ်းမိူင်းၵူၺ်းယဝ်ႉၼႆ ၵူၼ်းမိူင်းတူၼ်ႈတီး ၵေႃႉၼိုင်ႈ လၢတ်ႈတၢင်းႁၼ်ထိုင်မၼ်းၼင်ႇၼႆ။