သိုၵ်းမၢၼ်ႈဢၼ်တူင်ႉၼိုင်ပၵ်းသဝ်းတီႈဝဵင်းၾၢႆၶုၼ် လၢမ်းလိမ်းယိုဝ်းၵွင်ႈလူင် တူၵ်းသႂ်ႇႁိမ်းဝၢၼ်ႈ ၵူၼ်းမိူင်း တူၵ်းၸႂ်ၵူဝ်ႁႄ။
မိူဝ်ႈဝႃး ဝၼ်းတီႈ 7/8/2023 ယၢမ်းႁူဝ်ၶမ်ႈ သိုၵ်းမၢၼ်ႈ ဝၢႆႇပၢၵ်ႇၵွင်ႈလူင် ယိုဝ်းသႂ်ႇ ႁိမ်းဝၢၼ်ႈလွႆလႅမ်ဢွၼ်ႇ ၸႄႈဝဵင်း ၾၢႆၶုၼ် ဢမ်ႇယွမ်း 10 လုၵ်ႈ ႁဵတ်းႁႂ်ႈၵူၼ်းမိူင်းမႆႈၸႂ် ဢမ်ႇထၢင်ႇႁၢင်ႈၵႂႃႇမႃးလွတ်ႈလႅဝ်း။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈ ယိုဝ်းၵွင်ႈထႅင်ႈမိူဝ်ႈဝႃးၼႆႉ ဢမ်ႇယွမ်း 10 လုၵ်ႈ ။ ၶဝ်ယိုဝ်းၵႂႃႇတၢင်းဝၢၼ်ႈလွႆလႅမ်ဢွၼ်ႇ ။ လွင်ႈတုမ်ႉတိူဝ်ႉမၢတ်ႇၸဵပ်းတႄႉ ဢမ်ႇမီးၼင်ႇၵဝ်ႇ ။ ၵူၺ်းၵႃႈၵူၼ်းမိူင်းတူၵ်းၸႂ်ဢေႃႈ။ ၶဝ်ယိုဝ်းယွၼ်ႉသင်တေႉတေႉ ဢမ်ႇႁူႉ ။ ပေႃးယိုဝ်းသမ်ႉ ယိုဝ်းၶဝ်ႈဝၢၼ်ႈလၢႆလၢႆ လီမႆႈၸႂ်ၼႃႇ ” – ဝႃႈၼႆ။
သိုၵ်းမၢၼ်ႈ ၵမ်းၵမ်းယိုဝ်းၵွင်ႈလူင် သႂ်ႇဝၢၼ်ႈသႂ်ႇဝဵင်းလႄႈ ၵူၼ်းမိူင်းၾၢႆၶုၼ် ၸိူဝ်းလူဝ်ႇ ၵႂႃႇႁႆႈၼႃးသူၼ် ဢမ်ႇထၢင်ႇႁၢင်ႈၵႂႃႇမႃး ၊ ပၢႆလိူဝ်ၾူၼ်တူၵ်းထပ်းၵၼ်လၢႆဝၼ်းဢမ်ႇထၢတ်ႇ ၵမ်ႈၽွင်ႈလႆႈပၢႆႈသွၼ်ႈယူႇသဝ်းဝႆႉ ၸွမ်းႁိူၼ်းယေးပီႈၼွင်ႉလႄႈၸွမ်းပိၵ်ႇထိူၼ်ႇႁၢင်ၶိူဝ်း တီႈလွတ်ႈၽေး ပဵၼ်ဢၼ်ယၢပ်ႇၵိၼ်းၶၢၼ်ၸႂ်လူင်လၢင် ဝႃႈၼႆ။
ၵူၼ်းၼႂ်းပိုၼ့်တီႈ ၸႄႈဝဵင်းၾၢႆၶုၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၽွင်းၵူၼ်းၼုမ်ႇၵူၼ်းၵမ် ၵႂႃႇႁဵတ်းသူၼ် ႁဵတ်းၼႃး၊ သမ်ႉမီးလုၵ်ႈဢွၼ်ႇ ဢမ်ႇၼၼ်ၵူၼ်းထဝ်ႈပႂ်ႉႁိူၼ်းၵူၺ်း၊ ၽွင်းၼၼ်ႉ ပေႃးသိုၵ်းမၢၼ်ႈယိုဝ်းၵွင်ႈၶဝ်ႈဝၢၼ်ႈ ၸိုင် ပဵၼ်ဢၼ်မႆႈၸႂ်လိူဝ်ႁႅင်း။ ၵွပ်ႈၼႆ မၢင်ဝၢၼ်ႈဢၼ်သဵင်ၵွင်ႈၵႆႉတႅၵ်ႇၼၼ်ႉ ၵမ်ႉပၢႆႈၵႂႃႇယူႇၼႂ်းထိူၼ်ႇ ၵမ်ႉပွၵ်ႈ ၶိုၼ်း တီႈဝၢၼ်ႈ ၼႆသေပၼ်ႇၵႂႃႇပၼ်ႇမႃးယူႇတင်းပီယဝ်ႉ ”- ဝႃႈၼႆ။
ဝၢႆးသိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း သွင်ပီပၢႆ သိုၵ်းမၢၼ်ႈတၢင်း ၸုမ်းသိုၵ်း PDF ပဵၼ်ပၢင်တိုၵ်းၵၼ် ၸွမ်းလႅၼ် လိၼ်တႆး – ယၢင်းလႅင် တေႃႇထိုင်ဝၼ်းမိူဝ်ႈၼႆ့ ။ ၾၢႆႇသိုၵ်းမၢၼ်ႈယိုတ်းမိူင်း ၸႂ်ႉၶိူင်ႈမိၼ်လေႃႇတိုၵ်းလႄႈသင် ပိုတ်းယိုဝ်းမၢၵ်ႇၵွင်ႈလူင်လႄႈ လႄႈသင် ႁဵတ်းႁႂ်ႈၵူၼ်းမိူင်းလူႉၵွႆၼမ် မိူၼ်ၼင်ႇ ႁူင်းယႃလႄႈ ဢွင်ႇတီႈသႃႇသၼႃႇ ၸိူဝ်းၼႆႉၵေႃႈ လူႉၵွႆၼမ်။
တႄႇဢဝ်ႁူဝ်လိူၼ်ၵျုၼ်ႊၼၼ်ႉမႃး သိုၵ်းမၢၼ်ႈတင်းသိုၵ်းၵႅတ်ႇၶႄၵူၼ်းမိူင်းပီႊတီႊဢႅပ်ႉၾ် ပိုတ်းယိုဝ်းၵၼ် တီႈၸႄႈဝဵင်းၾၢႆၶုၼ် ၾၢႆႇၸုမ်းသိုၵ်းမၢၼ်ႈ တၢႆ 19 ၵေႃႉ သေ ၾၢႆႇၸုမ်းသိုၵ်း PDF မၢတ်ႇၸဵပ်း 3 ၵေႃႉ လူႉတၢႆ 1 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ