ပၢင်တိုၵ်း သိုၵ်းမၢၼ်ႈတင်း SSPP တီႈႁိမ်းဝၢၼ်ႈမၢၵ်ႇလၢင်း ဝဵင်းလၢႆးၶႃႈ ၼႂ်းဝၼ်းမိူဝ်ႈၼႆႉ ၾၢႆႇသိုၵ်းမၢၼ်ႈ မၢတ်ႇၸဵပ်းလူႉတၢႆၼမ် SSPP ယိုတ်းလႆႈရူတ်ႉၵႃးသိုၵ်းမၢၼ်ႈလႄႈတင်းၵူၼ်းတၢႆဢိၵ်ႇၵူၼ်းလိပ်းၶွင်သိုၵ်းမၢၼ်ႈတင်းၼမ် ၊ တီႈတပ်ႉပၢင်သဝ်းသိုၵ်းမၢၼ်ႈ ၵိုတ်းၵူၼ်းပႂ်ႉတပ်ႉ 3-4 ၵေႃႉၵူၺ်းဝႃႈၼႆ။

ပၢင်တိုၵ်းၼႆႉပဵၼ်ၼႂ်းၵႄႈဝၢၼ်ႈမၢၵ်ႇလၢင်းလႄႈဝၢၼ်ႈၼမ်ႉပွၵ်ႉ ၾၢႆႇဢွၵ်ႇဝၢၼ်ႈမၢၵ်ႇလၢင်း ၸႄႈဝဵင်းလၢႆးၶႃႈ၊ ဝၼ်းမိူဝ်ႈၼႆႉဝၼ်းတီႈ 6/8/2023 တႄႇယၢမ်းၵၢင်ၼႂ် 7 မူင်းၶိုင်ႈထိုင်ယၢမ်းဝၢႆးဝၼ်း သွင်ၾၢႆႇယိုဝ်းယိုဝ်းၵိုတ်းၵိုတ်း ၊ SSPP ဝႃႈသိုၵ်းမၢၼ်ႈတၢႆ 1 ၵေႃႉမၢတ်ႇၸဵပ်း 6 ၵေႃႉ ၊ SSPP တီႉလႆႈတူဝ်လိပ်းသိုၵ်းမၢၼ်ႈ 2 ၵေႃႉ ၵွင်ႈ 2 လဝ်းလႄႈ ၵႃး 1 လမ်း ဝႃႈၼႆ။

ၽူႈတူင်ႉၼိုင်ၵၢၼ်သိုၵ်း SSPP ၼႂ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ ၾၢႆႇ SSPP တႄႉ ဢမ်ႇမီးလွင်ႈမၢတ်ႇၸဵပ်းလူႉတၢႆ ။ ယၢမ်းလဵဝ် တီႈတပ်ႉမၢၼ်ႈတီႈၶူဝ်ၼမ်ႉ တဵင်းၼၼ်ႉ မီးၵူၼ်းသိုၵ်းမၢၼ်ႈ ပႂ်ႉတပ်ႉ 3-4 ၵေႃႉၵူၺ်းယဝ်ႉ။ ႁိမ်းႁွမ်းတပ်ႉမၢၼ်ႈၼၼ်ႉ တိုၵ်ႉမီးၵူၼ်းဝၢၼ်ႈယူႇလႄႈလႆႈၾၢင်ႉသေယိုဝ်း၊ တေႃႇထိုင်ယၢမ်းလဵဝ်တိုၵ်ႉၶဵင်ႈၶႅင် ၵၼ်ဝႆႉယူႇ ၊ ယၢမ်းၵၢင်ၶမ်ႈၼႆႉ သဵင်ၵွင်ႈတႄႉ ယဵၼ်ဝႆႉ”- ဝႃႈၼႆ။

တီႈႁိမ်းဝၢၼ်ႈမၢၵ်ႇလၢင်းၼႆႉ သိုၵ်းမၢၼ်ႈလႄႈ SSPP တႄႇယိုဝ်းၵၼ် ယၢမ်းၵၢင်ၼႂ် 7:30 မူင်း တေႃႇထိုင် 8 မူင်းပၢႆ ၵမ်ႉၼိုင်ႈ၊ ယၢမ်းၵၢင်ဝၼ်း 10 မူင်း ပဵၼ်ထႅင်ႈၵမ်းၼိုင်ႈ ၊ ၵၢင်ဝၼ်းတဵင်ႈ 12 မူင်းတေႃႇထိုင်ယၢမ်းဝၢႆးဝၼ်းမွၵ်ႈ 2 မူင်း ပဵၼ် ထႅင်ႈၵမ်ႉၼိုင်ႈသေ တေႃႇထိုင်ယၢမ်းလဵဝ်ၶၢဝ်းယၢမ်းတဵင်ႈၶိုၼ်းၽွင်းတႅမ်ႈၶၢဝ်ႇဝႆႉယူႇၼႆႉတႄႉ သဵင်ၵွင်ႈယဵၼ်ဝႆႉ – လႆႈႁူႉၼင်ႇၼႆ။

“ပၢင်တိုၵ်း တီႈဝဵင်းလၢႆးၶႃႈ မိူဝ်ႈၼႆႉ သဵင်ၵွင်ႈတႅၵ်ႇလၢႆလၢႆတီႈ။ ၶၢဝ်ႇပိုၼ်ႉတီႉပွင်ႇမႃးဝႃႈ ၾၢႆႇသိုၵ်းမၢၼ်ႈတၢႆဢမ်ႇယွမ်း 20။ ၾၢႆႇSSPP ၺႃးသိုၵ်းမၢၼ်ႈငွႆးယိုဝ်းၽွင်းပႂ်ႉယၢမ်း တီႈတပ်ႉပၢင်သဝ်းၶၢႆးၽၵ်းၼၢမ် ႁိမ်းဝၢၼ်ႉၼမ်ႉပွၵ်ႉၼၼ်ႉ တၢႆၵေႃႉၼိုင်ႈ။ ”- ၽူႈတူင်ႉၼိုင်ၵၢၼ်သိုၵ်း SSPP ၼႂ်းပိုၼ်ႉတီႈ သိုပ်ႇလၢတ်ႈၼႄၼင်ႇ ၼႆ။

ယွၼ်ႉပၢင်တိုၵ်းၼႆႉသေ ၵူၼ်းဝၢၼ်ႈတၢင်းၾၢႆႇဢွၵ်ႇဝဵင်းလၢႆးၶႃႈ ဢွၼ်ၵၼ်ပၢႆႈၽေးသိုၵ်း ၶဝ်ႈသွၼ်ႈႁိူၼ်းယေး ပီႈၼွင်ႉၽႂ် မၼ်းလႄႈ ၸွမ်းဝတ်ႉမုၼ်ၸဝ်ႈထႅင်ႈတင်းၼမ်။ ယဝ်ႉၵေႃႈ ႁိူၼ်းယေး ၵူၼ်းဝၢၼ်ႈ ၺႃးၸၢၵ်ႇမၢၵ်ႇတိူဝ်ႉသႂ်ႇၸွမ်းထႅင်ႈ တင်း ၼမ်။(ၵူၺ်းၵႃႈပႆႇႁူႉႁူဝ်ယွႆႈတႅတ်ႈတေႃး)။

ဝၼ်းတီႈ 6/8/2023 မိူဝ်ႈၼႆႉယၢမ်းၵၢင်ၼႂ်ၸဝ်ႉ သိုၵ်းမၢၼ်ႈ ဢဵၼ်ႁႅင်း 70 ၵေႃႉ ၶိုၼ်ႈလေႃႇတိုၵ်း SSPP တီႈတပ်ႉပၢင်သဝ်း ၶၢႆး  ၽၵ်းၼၢမ် ႁိမ်းဝၢၼ်ႈၼမ်ႉပွၵ်ႉၼၼ်ႉ ဢွၼ်တၢင်းသေ ပၢင်တိုၵ်း ၸင်ႇသိုပ်ႇ လၢမ်းၽႄႈထႅင်ႈ ၵႂႃႇပဵၼ် 3 တီႈ ၾၢႆႇဢွၵ်ႇဝဵင်း တေႃႇထိုင်တီႈၶူဝ်ၼမ်ႉတဵင်း ႁိမ်းဝၢၼ်ႈမၢၵ်ႇလၢင်း။