မိူဝ်ႈၼႆႉ ဝၼ်းတီႈ 6/8/2023 ယၢမ်းၵၢင်ဝၼ်းမွၵ်ႈ 12 မူင်း မၢၵ်ႇတႅၵ်ႇတီႈလုမ်းၽူႈၵွၼ်းပွၵ်ႉ မၢႆ 1 ဢၼ်ပၵ်းဝႆႉၾၢႆႇလင် ႁူင်း ႁေႃးၵၢင်ဝဵင်း တီႈသဵၼ်ႈတၢင်းလူင်မိူင်းႁူမ်ႈတုမ် ၼႂ်းၵၢင်ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တၢႆ 2 ၵေႃႉ မၢတ်ႇၸဵပ်း 1 ၵေႃႉ ။
ၵူၼ်းဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ မီးၵူၼ်းမႃးပွႆႇမၢၵ်ႇသႂ်ႇသေ ယိုဝ်းၵွင်ႈသႂ်ႇၸွမ်းထႅင်ႈ တီႈလုမ်းၽူႈၵွၼ်းပွၵ်ႉ 1 ။ လႆႈႁူႉဝႃႈ ၽူႈမီးၸၼ်ႉၼႂ်းၾၢႆႇလိူမ်ႈလႆႇ တၢႆ 1 ၵေႃႉ။ ၽူႈမီးၸၼ်ႉ ၾၢႆႇၵၢၼ်ၾႆးၾႃႉ EPC ဝဵင်းၼမ်ႉတူႈ တၢႆၸွမ်းထႅင်ႈ 1 ၵေႃႉလႄႈ ၽူႈၵွၼ်းပွၵ်ႉတႄႉ လႆႈတိူဝ်ႉမၢတ်ႇၸဵပ်း တီႈမိုဝ်း ”- ဝႃႈၼႆ။
လွင်ႈမၢၵ်ႇတႅၵ်ႇၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် ႁဵတ်းတႄႉ ပႆႇႁူႉ ။ မိူဝ်ႈၽွင်းမၢၵ်ႇတႅၵ်ႇၼၼ်ႉ သဵၼ်ႈတႃႈသၢႆတၢင်း ၸွမ်းႁိမ်းႁွမ်းၼၼ်ႉ ထုၵ်ႇပလိၵ်ႈသိုၵ်းမၢၼ်ႈ သင်ႇပိၵ်ႉဢိုတ်း ၵူတ်ႇထတ်းၸႅတ်ႈထၢမ်ၵူၼ်းၵႂႃႇမႃး။ ႁၢၼ်ႉၼမ်ႉ ၼဵင်ႈ ႁိမ်းႁွမ်းၼၼ်ႉၵေႃႈ ၶဝ်သင်ႇပိၵ်ႉမူတ်း ဝႃႈၼႆ။
“ၵႃႈၵွၼ်ႇပူၼ်ႉမႃးၶဝ်ဢမ်ႇႁဵတ်းပၢင်ၵုမ်တီႈလုမ်းၼႆႉ။ မိူဝ်ႈၼႆႉသမ်ႉၶဝ်ႁဵတ်းပၢင်ၵုမ်တီႈလုမ်းၽူႈၵွၼ်းပွၵ်ႉ။ ၽူႈမီးၸၼ်ႉၼႂ်းၾၢႆႇလိူမ်ႇလႆႇၼႆႉသမ်ႉ တိုၵ်ႉၶၢႆႉမႃးမႂ်ႇ ၊ လႆႈငိၼ်းၶၢဝ်ႇဝႃႈ မၼ်းၸၢႆးၼႆႉပဵၼ်ၵူၼ်းၵႆႉႁဵတ်းၵၢၼ်။ မိူဝ်ႈၼႆႉလႅပ်ႈၶဝ်တေဢုပ်ႇၵၼ်တႃႇ ၵၢၼ်ပူၵ်းပွင်ဝၢၼ်ႈဢိူင်ႇ ”- ၵူၼ်းပိုၼ်ႉတီႈ ဝဵင်းၵျွၵ်ႉမႄး သိုပ်ႇလၢတ်ႈၼႄ ၼင်ႇၼႆ။
ယၢမ်းလဵဝ် ၵူၼ်းမၢတ်ႇၸဵပ်းလႄႈ လူႉတၢႆ ၸိူဝ်းၼႆႉတႄႉ လႆႈသူင်ႇယူတ်းယႃဝႆႉတီႈ ႁူင်းယႃ ဝဵင်းၵျွၵ်ႉမႄးဝႆႉမူတ်းယဝ်ႉ ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ သိုၵ်းမၢၼ်ႈ ယိုတ်းမိူင်း၊ သိုၵ်း TNLA သိုၵ်း SSPP လႄႈ သိုၵ်း RCSS ၸိူဝ်းၼႆႉ။
