မိူဝ်ႈၼႆႉ ဝၼ်းတီႈ 6/8/2023 ယၢမ်းၵၢင်ၼႂ် 6:15 မူင်း သိုၵ်းမၢၼ်ႈ ယိုတ်းမိူင်း ဢဵၼ်ႁႅင်း 70 ၵေႃႉ ႁႅၼ်းသိုၵ်းလေႃႇတိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တီႈတပ်ႉပၢင်သဝ်းၶၢႆးၽၵ်းၼၢမ် ႁိမ်းဝၢၼ်ႈၼမ်ႉပွၵ်ႉ ၾၢႆႇၸၢၼ်း ဝၢၼ်ႈမၢၵ်ႇလၢင်း ၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶိုၼ်ႈလေႃႇတိုၵ်းႁဝ်းၶႃႈ တီႈၶၢႆးၽၵ်း ၼၢမ် ႁိမ်းဝၢၼ်ႈၼမ်ႉပွၵ်ႉ ဢွၼ်တၢင်း ။ တေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ပႆႇယဵၼ်။ ၵူၼ်း သိုၵ်း SSPP ထႅင်ႈၸုပ်ႈၼိုင်ႈ ၶဝ်ႈလူမ်ႇယိုဝ်းၶိုၼ်းတပ်ႉမၢၼ်ႈ တီႈၵွင်းမၢၵ်ႇလၢင်း ဢၼ်ပၵ်းဝႆႉတီႈၶူဝ်ၼမ်ႉတဵင်း မိူဝ်ႈ ယၢမ်းၵၢင်ၼႂ် 7:30 မူင်း။ ယၢမ်းလဵဝ် သဵင်ၵွင်ႈတႅၵ်ႇၾၢႆႇဢွၵ်ႇဝဵင်းလၢႆးၶႃႈဝႆႉ 2-3 တီႈ။ ဢၼ် ပဵၼ်ႁႅင်းတႄႉ တီႈၶၢႆးၽၵ်းၼၢမ် ႁိမ်းဝၢၼ်ႈၼမ်ႉပွၵ်ႉ ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 4-5/8/2023 ၼၼ်ႉ သိုၵ်းမၢၼ်ႈ ယိုတ်းမိူင်း ဢၼ်ပၵ်းဝႆႉတီႈဝၢၼ်ႈၸႅၼ်ႇၼၼ်ႉ ယိုဝ်းၵွင်ႈလူင်ၸူး တပ်ႉပၢင်သဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ဢမ်ႇယွမ်း 4 ပွၵ်ႈ ၼႆယဝ်ႉ။

“မိူဝ်ႈဝႃး – မိူဝ်ႈသိုၼ်း ၶၢဝ်းတၢင်း 2 ဝၼ်းမႃးၼႆႉ သိုၵ်းမၢၼ်ႈ ယူႇတီႈဝၢၼ်ႈၸႅၼ်ႇသေ ယိုဝ်းၵွင်ႈလူင်မႃးတၢင်း တပ်ႉပၢင်သဝ်း ႁဝ်းၶႃႈ တၢင်းၾၢႆႇဢွၵ်ႇဝဵင်းၼႆႉ ဢမ်ႇယွမ်း 3-4 ပွၵ်ႈၶႃႈ။ 1 ပွၵ်ႈလႂ် ၶဝ်ယိုဝ်းမၢၵ်ႇလူင်သႂ်ႇႁဝ်း 4-5 လုၵ်ႈၶႃႈ ဢေႃႈ။ မိူဝ်ႈၼႆႉ ၶဝ်ႁႅၼ်းသိုၵ်း ဢဵၼ်ႁႅင်း 70 ၵေႃႉသေ ၶိုၼ်ႈမႃးတီႈတပ်ႉပၢင်သဝ်းႁဝ်းၶႃႈ တီႈၶၢႆးၽၵ်းၼၢမ်သေယဝ်ႉ ၶဝ်ၽႃႇၺႃးၵူၼ်းႁဝ်း ၶႃႈသေ လႆႈပဵၼ်ပၢင်တိုၵ်းၵၼ်ၶႃႈဢေႃႈ”- ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈ သိုပ်ႇလၢတ်ႈ ၼႄၼင်ႇၼႆ။

ယၢမ်းလဵဝ် သဵင်ၵွင်ႈတင်းသွင်ၾၢႆႇၼႆႉ လၢမ်းထိုင်ၽႅဝ်ဝၢၼ်ႈၵွင်းမၢၵ်ႇလၢင်း ၾၢႆႇဢွၵ်ႇဝဵင်းလၢႆးၶႃႈဝႆႉယဝ်ႉ လွင်ႈသိုၵ်းတင်းသွင် ၾၢႆႇ လူႉတၢႆမၢတ်ႇၸဵပ်းတႄႉ ပႆႇႁူႉ ဝႃႈၼႆ။

“လွင်ႈတၢင်းမၼ်းၼႆႉ ၶဝ်ၶႂ်ႈႁႂ်ႈႁဝ်းၶႃႈ သုတ်ႉထွႆဢွၵ်ႇ ၾၢႆႇႁွင်ႇတၢင်းၵႃးလူင် လွႆလႅမ် – မိူင်းၼွင် ၸွမ်းၼင်ႇၶဝ် တုၵ်းယွၼ်း ႁႂ်ႈႁဝ်း ထွႆဢွၵ်ႇမႃးလၢႆပွၵ်ႈလၢႆၵမ်းၼၼ်ႉလႄႈ ႁဝ်းၶႃႈ ဢမ်ႇထွႆ ယွၼ်ႉဝႃႈ ဢိင်ၼိူဝ် လွင်ႈႁူမ်ႇလူမ်ႈငဝ်ႈငုၼ်း ႁဝ်းၶႃႈလႄႈ ၶဝ်ႁႃလၢႆးတၢင်း တႃႇတေဢီးႁဝ်းၶႃႈဢွၵ်ႇၼႆႉ။ ၼင်ႇႁိုဝ် သဵင်ၵွင်ႈပေႃးတေတႅၵ်ႇၼၼ်ႉ ၶဝ်ႁႃတၢင်းမၼ်းသေ ပွႆႇမၢၵ်ႇလူင် ၸူးၵူၼ်းႁဝ်းၶႃႈ သွင်ဝၼ်းထပ်းၵၼ်မႃး တႃႇသဵင်ၵွင်ႈတေတႅၵ်ႇမႃးမိူဝ်ႈၼႆႉ”- ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈလၢတ်ႈ။

သိုၵ်းမၢၼ်ႈ ယိုတ်းမိူင်း ဢၼ်ၶိုၼ်ႈလေႃႇတိုၵ်း SSPP/ SSA မိူဝ်ႈၼႆႉ ပဵၼ်တပ်ႉသိုၵ်းမၢၼ်ႈ တႂ်ႈတိူင်းသိုၵ်းၶူဝ်လမ် ၵုမ်းၵမ် ၼႆယဝ်ႉ။