သိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈဢဝ်တီႈယူႇ ၸွမ်းၼႂ်းပွၵ်ႉၼႂ်းယွမ်ႇတီႈဝဵင်းပၢင်လႃႈ(ပၢင်းတရ) လႄႈ ႁဵတ်းႁႂ်ႈၵူၼ်းမိူင်း ဢမ်ႇထၢင်ႇႁၢင်ႈၵႂႃႇမႃး။
တႄႇဢဝ်မိူဝ်ႈ ၸၢဝ်းထၼူႉပိုၼ်ၽၢဝ်ႇၶွတ်ႇၽွတ်ႈ တပ်ႉၸုမ်းလွတ်ႈလႅဝ်းၵူၼ်းမိူင်းထၼူႉ (ဓနုပြည်သူ့လွတ်မြောက်ရေးတပ်ဦး(DPLA)) ၼႂ်းႁၢင်လိူၼ်ၵျူႊလၢႆႊမႃးသေ ၾၢႆႇသိုၵ်းမၢၼ်ႈယိုတ်းမိူင်း ထႅမ်ႁႅင်းသိုၵ်း ဢဝ်တီႈယူႇၸွမ်းပွၵ်ႉၸွမ်းယွမ်ႇ တီႈၸႄႈဝဵင်းပၢင်လႃႈ ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်း ၵႂႃႇမႃးယၢပ်ႇၽိုတ်ႇတူၵ်းၸႂ်ၵူဝ်ႁႄ။
ၵူၼ်းၼႂ်းပိုၼ်ႉတီႈ ဝဵင်းပၢင်လႃႈ (ပင်းတယ) လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈ ၵူတ်ႇထတ်းႁၢဝ်ႈႁႅင်းၼႆႉ တေပဵၼ်ၸွမ်း တၢင်းၶဝ်ႈတၢင်းဢွၵ်ႇဝဵင်း ။ လိူဝ်ၼၼ်ႉတႄႉ သိုၵ်းမၢၼ်ႈလႄႈ ပလိၵ်ႈၵုမ်းရူတ်ႉ မေႃႇတေႃႇပီႇၵႄႇ သမ်ႉပႂ်ႉၸွမ်းသဵၼ်ႈတႃႈသၢႆတၢင်း ။ ပေႃးတိုဝ်းမၢၵ်ႇႁူဝ်ရူတ်ႉၶိူင်ႈသေၶပ်းရူတ်ႉတႄႉ ဢမ်ႇပေႃးထဵတ်ႈထၢမ်ၼမ်။ မၢင်ၵေႃႉတႄႉ ၺႃးထၢမ်ႁၢဝ်ႈႁႅင်း ၊ ဢမ်ႇမိူၼ်မိူဝ်ႈၵူႈပွၵ်ႈ၊ ပဵၼ်ဢၼ်ယူႇယၢပ်ႇၵိၼ်းၸႂ် ” -ဝႃႈၼႆ။
ယွၼ်ႉသိုၵ်းမၢၼ်ႈၶဝ်ႈ ယူႇၸွမ်းပွၵ်ႉၸွမ်းယွမ်ႇလႄႈ မိူဝ်ႈလဵဝ် ၵူၼ်းႁိူၼ်းယူႇၵိၼ်ၸမ်ၵၼ်ၵေႃႈ ဢမ်ႇႁတ်းၶဝ်ႈဢွၵ်ႇၵႂႃႇမႃးတေႃႇၵၼ် ။
ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈ ဝဵင်းပၢင်လႃႈ လၢတ်ႈတီႈၽူႈတွႆႇႁွၵ်ႈဝႃႈ – “ ႁၼ်ၶဝ် တူင်ႉၼိုင်ၵႂႃႇမႃးၼမ်ၵေႃႈ ၵႃႈလႆႈယူႇမိူၼ်ပိူင်ၵဝ်ႇ ၊ ပေႃးဢမ်ႇၼၼ်ၵူဝ်ၶဝ်ထၢင်ႇပိူင်ႈဝႃႈပဵၼ်ၵူၼ်းၸုမ်းၼၼ်ႉၸုမ်းၼႆႉၼႆသေဢဝ်လိူင်ႈတီႉၺွပ်း။ ပေႃးဢမ်ႇလမ်ႇလွင်ႈ ဢမ်ႇၵႂႃႇလႂ် တေႃႈၼင်ႇ ႁိူၼ်းၸမ်ၵၼ်ၵေႃႈ ဢမ်ႇႁတ်းၶဝ်ႈဢွၵ်ႇႁႃၵၼ် ” – ဝႃႈၼႆ။
ၼႂ်းဝဵင်းယႂႃႇငၢၼ်ႇၼၼ်ႉၵေႃႈ မိူဝ်ႈဝၼ်းတီႈ 31/7/2023 သိုၵ်းမၢၼ်ႈ မၢပ်ႇၼႄးဝႃႈ ၵဵဝ်ႇၶွင်ႈၸွမ်း ၸုမ်းသိုၵ်း DPLA ၼႆသေ ၶဝ်ႈသွၵ်ႈတီႉၺွပ်းၵူၼ်းမိူင်း 4 ၵေႃႉ လႆႈႁူႉၼင်ႇၼႆ။
ၸႄႈဝဵင်းပၢင်လႃႈလႄႈယႂႃႇငၢၼ်ႇၼႆႉ ၵမ်ႈၼမ် ၵူၼ်းမိူင်းႁဵတ်းၵိၼ်ၵၢၼ် ၽုၵ်ႇၼဵင်ႈ ၊ ပိတ်းၼဵင်ႈ လႄႈ ၽုၵ်ႇသွမ်ႈၵေႃႇၾီႇ ၸဵမ်ၸိူဝ်းၼႆႉ မိူဝ်ႈလဵဝ် ယွၼ်ႉသိုၵ်းသိူဝ်တူင်ႉၼိုင်ႈၵႂႃႇမႃးၼမ်လႄႈ ၵမ်ႈၼမ် ၵၢတ်ႈၵၢၼ်ၵၢတ်ႈငၢၼ်းဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ