ၶၼ်ၶဝ်ႈသၢၼ်ၶိုၼ်ႈ ဢမ်ႇမီးၵူၼ်းႁဵတ်းၼႃး လႆႈႁႃၸၢင်ႈၵူၼ်း/ၸၢၵ်ႈမႃးႁဵတ်း ၵႃႈယႂ်ႇၵႃႈပႅင်း

ၸဝ်ႈသူၼ်ႁႆႈၼႃး ဝဵင်းၵဵင်းတွင်း ပီၼႆႉ ထူပ်းတၢင်းယၢပ်ႇၽိုတ်ႇႁႃၵူၼ်းမႃးႁဵတ်းၼႃးဢမ်ႇမီး လႆႈပၼ်ၵႃႈၸၢင်ႈၵႃႈယႂ်ႇၵႃႈပႅင်းသေ ႁႃၵူၼ်းမႃးႁဵတ်းယၢပ်ႇၽိုတ်ႇ ၵမ်ႈၼမ်လႆႈႁႃရူတ်ႉၸၢၵ်ႈမႃးထႆ မႃးသွမ်ႈ ၵႃႈၼမ်ႉမၼ်းၸၢၵ်ႈၵေႃႈလႆႈၸၢႆႇၼမ်။

ၽွင်းၶၢဝ်းလိူၼ်ၵျုႊလၢႆႊ – ဢေႃႊၵတ်ႊသ် 2023 ၼႆႉ ပဵၼ်ၶၢဝ်းထူၺ်ႈၵႃႈ သွမ်ႈၼႃး၊ ၵူၼ်းၼုမ်ႇ ၵူၼ်းႁဵတ်းၵၢၼ်သမ်ႉဢမ်ႇမီး ဢွၼ်ၵၼ်ၵႂႃႇႁႃႁဵတ်းၵၢၼ် ႁႃတၢင်းၶိုၼ်းယႂ်ႇ တၢင်ႇတီႈတၢင်ႇဝဵင်း၊ ၸဝ်ႈသူၼ်ႁႆႈၼႃး ၼႂ်းဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လႆႈႁႃၵူၼ်းတၢင်ႇတီႈ မႃးသွမ်ႈၼႃး လႆႈပၼ်ၵႃႈၸၢင်ႈတေႃႇၵေႃႉ 20,000 ပျႃး ၼႆယဝ်ႉ။

ၸဝ်ႈၼႃး ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “ၵႃႈသွမ်ႈၼႃး ပီၼႆႉ လႆႈပၼ်ၵႃႈၸၢင်ႈ တေႃႇၵေႃႉ ဢေႇသုတ်း 15,000 ပျႃး မၢင်တီႈ 18,000 ပျႃး မၢင်ၵေႃႉ လႆႈၸၢင်ႈထိုင် 20,000 ပျႃးၼႆႉ။ ပီၵၢႆ ၵႃႈသွမ်ႈၼႃးၼၼ်ႉ တေႃႇၵေႃႉ လႆႈ ၸၢင်ႈ 10,000 ပျႃး ထိုင် 12,000 ပျႃး။ ၵႃႈၼမ်ႉမၼ်းၸၢၵ်ႈၵေႃႈ ၶိုၼ်ႈႁႅင်း မိူဝ်ႈၵၢင်လိူၼ်ပူၼ်ႉမႃးၼၼ်ႉ 1 လိတ်ႉလႂ် 2,900 ပျႃး။ ဝၢႆးသေ ငိၼ်းၶၢဝ်ႇ ၶႅပ်းသွင်မိုၼ်ႇတေဢွၵ်ႇမႃးၼႆႉ ၶၼ်မၼ်းပုင်ႈၶိုၼ်ႈ 1 လိတ်ႉ 3,300 ပျႃး။ ၸဝ်ႈၼႃးလႆႈၸၢႆႇၵူႈဢၼ်၊ ၸဵမ်ၵႃႈၸၢင်ႈ၊ ၵႃႈလိၼ်ၾုၼ်ႇ မျေႇဢေႃးၸႃႇ လႄႈၵႃႈၸၢင်ႈၵူႈလွင်ႈလွင်ႈ ။ ”- ဝႃႈၼႆ။

လိူဝ်ၼၼ်ႉ ၵႃႈၸၢင်ႈၵူၼ်းထူၺ်ႈၵႃႈၵေႃႈ လႆႈပၼ်ၼမ် တႄႇဢဝ် 10,000 ပျႃး ၶိုၼ်ႈပဵၼ် 15,000 ပျႃးယဝ်ႉ။  

“မိူဝ်ႈပီၵၢႆၼၼ်ႉ ႁဝ်းၶႃႈ လႆႈၸၢင်ႈၵူၼ်းထူၺ်ႈၵႃႈ 1 ၵေႃႉ ပေႃးမၼ်းထူၺ်ႈလႆႈ 100 ၸွၵ်း လႆႈပၼ် 10,000 ပျႃး။ ပီၼႆႉ ဢမ်ႇၸၢင်ႈၸိူင်ႉၼၼ်လႆႈယဝ်ႉ 100 ၸွၵ်း လႆႈပၼ် 15,000 ပျႃး။ ယွၼ်ႉၵႃႈၸၢင်ႈ၊ ၵႃႈၼမ်ႉမၼ်း၊ ၵႃႈၾုၼ်ႇထၢတ်ႈၶိုၼ်ႈ ၸိူင်ႉၼႆသေ တီႈဝဵင်းၵဵင်းတွင်းၼႆႉ ႁူဝ်ပၢၵ်ႇလႂ် 30 % ၼႆႉ ပွႆႇၼႃးႁၢမ်းယဝ်ႉ။ ယွၼ်ႉၵႃႈၸႂ်ႉၸၢႆႇ ၶိုၼ်ႈႁႅင်းဢေႃႈ”- ၸဝ်ႈၼႃး သိုပ်ႇလၢတ်ႈၼႄၼင်ႇၼႆ။

မိူဝ်ႈလဵဝ် ၶၼ်ၶဝ်ႈသၢၼ် တီႈဝဵင်းၵဵင်းတွင်း ၼိုင်ႈၶႂၢႆး 35,000 ပျႃး၊ ပေႃးၶဝ်ႈၶႅမ်ႉၸိုင် လႆႈၶၢႆ 38,000 ပျႃး ၼႆယဝ်ႉ။

ၼွၵ်ႈလိူဝ်ၼၼ်ႉ မိူၼ်ၼင်ႇ တၢင်းၸႄႈဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်းၵေႃႈ လႆႈပၼ်ၵူၼ်းၵိၼ်ၸၢင်ႈႁဵတ်း ၼႃးၼမ်  ယွၼ်ႉငိုၼ်းၶႄႇၶိုၼ်ႈ တေႃႇၵေႃႉ လႆႈၸၢင်ႈငိုၼ်းမၢၼ်ႈမွၵ်ႈ 40,000 ပျႃး ၼႆယဝ်ႉ။

ၸဝ်ႈၼႃး ဝဵင်းမိူင်းယၢင်း လၢတ်ႈတီႈၽူႈတွႆႇႁွၵ်ႈဝႃႈ – “ၵႃႈၸၢင်ႈၵူၼ်းသွမ်ႈၼႃး တီႈမိူင်းယၢင်းၼႆႉ လႆႈၸၢင်ႈ (ငိုၼ်း ၶႄႇ) တေႃႇၵေႃႉ 60 ယႂၼ် 70 ယႂၼ်လႄႈ 80 ယႂၼ်ၶႃႈ။ ပေႃးမႃးသွၼ်ႇငိုၼ်းမၢၼ်ႈ 30,000 ပျႃး 40,000 ပျႃးၼႆႉ။ ယွၼ်ႉငိုၼ်း ၶႄႇၶိုၼ်ႈ။ ႁဝ်းၶႃႈတႄႉ ဢွၼ်ၵၼ်ၶၢင်းပေႇၸႂ်ယဝ်ႉ ယွၼ်ႉလႆႈၸၢင်ႈၵႃႈၶၼ်သုင် ။ သင်ဝႃႈ ၶဝ်ႈဢွၵ်ႇမႃး မိူင်းၶႄႇသမ်ႉ ဢမ်ႇႁပ်ႉသိုဝ်ႉ  သင်ၶဝ်ႁပ်ႉသိုဝ်ႉ သမ်ႉလႆႈၶၼ်ထုၵ်ႇ ၸိူင်ႉၼႆတႄႉ ႁဝ်းၶႃႈၸဝ်ႈၼႃး တေဢွၼ်ၵၼ်တုၵ်ႉၶမူတ်းယဝ်ႉ။ ၶဝ်ႈၼႆႉ ၵမ်ႈၼမ် တေ သူင်ႇၶၢႆတၢင်းမိူင်းၶႄႇ တေဢဝ်ၶဝ်ႈၵႂႃႇတၢင်းၼႃႈလိၼ်ၶိုၵ်ႉတွၼ်းမၢႆ 2 တင်း မၢႆ 4 ၸိူဝ်းၼႆႉသေ သူင်ႇၸူးၶၢႆမိူင်းၶႄႇ”- ဝႃႈ ၼႆ။

ပေႃးထိုင် ၶၢဝ်းၼႃးၸိုင် ၵူၼ်းတၢင်းပွတ်းဢွၵ်ႇၶူင်း ၵမ်ႈၼမ် တေဢွၼ်ၵၼ်ၵႂႃႇၵိၼ်ၸၢင်ႈ တၢင်းမိူင်းယၢင်းၼမ် ယွၼ်ႉလႆႈၵႃႈႁႅင်းၼမ်။ ၼႂ်းၸႄႈဝဵင်းမိူင်းယၢင်းၼႆႉ ၼႃးတင်းမူတ်းမီး 2,000 ဢေႊၶိူဝ်ႊပၢႆ ႁႆႈသမ်ႉ မီးၸမ် 3,000 ဢေႊၶိူဝ်ႊ ၼႆယဝ်ႉ။