သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇ ပွႆႇလွတ်ႈပၼ်ၵူၼ်းတူၵ်းၶွၵ်ႈၵၢၼ်မိူင်းတင်းၼမ် လိူဝ်ၼၼ်ႉ ပွႆႇလွတ်ႈပႃး ပႃးလုၵ်ႈၸုမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆၸုမ်း ၼႂ်းၼၼ်ႉပႃး လုၵ်ႈၸုမ်း SSPP/SSA ။
မိူဝ်ႈဝၼ်းတီႈ 1/8/2023 မႅၼ်ႈဝၼ်းၶဝ်ႈဝႃႇ ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇ ပွႆႇၵူၼ်းတူၵ်းၶွၵ်ႈ 7 ႁဵင်ပၢႆ၊ ၼႂ်းၼၼ်ႉပႃးလုၵ်ႈၸုမ်း ၸုမ်းဢူၺ်းလီပွတ်းႁွင်ႇ 3 ၸုမ်း MNDAA ၊ TNLA ၊ SSPP တႃႇ 21 ၵေႃႉပၢႆ၊ လိူဝ်ၼၼ်ႉ ပိုၼ်ၽၢဝ်ႇလူတ်းယွၼ်ႇပၼ် တူတ်ႈတၢမ်ႇၶွၵ်ႈ ၸွမ်ၸိုင်ႈ ဢူးဝိၼ်းမျိၼ်ႉ တႃႇ 4 ပီလႄႈ လူတ်းယွၼ်ႇတၢမ်ႇၶွၵ်ႈ ၽူႈၵိူဝ်းၵုမ်ၸိုင်ႈမိူင်း ဢွင်ႇသၢၼ်းၸူႉၵျီႇ တႃႇ 6 ပီ။
ၸဝ်ႈသိုၵ်းလူင် ၸၢႆးသူႉ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ – “ ၸဵမ်မိူဝ်ႈၶဝ် တီႉၺွပ်းၵႂႃႇၵေႃႈ ၾၢႆႇႁဝ်းၵေႃႈ တႅမ်ႈလိၵ်ႈတၢင်ႇယွၼ်းႁႂ်ႈပွႆႇဝႆႉယူႇယဝ်ႉၼႃႇၼေႃႈ။ ၵူၺ်းၼႃႇ ၶဝ်သမ်ႉဝႃႈ ယိူင်းၸူးတႃႇငမ်းယဵၼ်လႄႈ လွင်ႈၶွတ်ႇလိူတ်ႈၼႆသေ ပွႆႇပၼ်လၢႆၸုမ်းယူႇ။မိူၼ်ၸိူင်ႉၼင်ႇ ၸုမ်းၵဝ်ႈၵၢင်ႉ ၸုမ်းတဢၢင်းၸိူဝ်းၼႆႉ။ ဢၼ်ၶဝ်ပွႆႇပၼ်ၸိူဝ်းၼႆႉၵေႃႈ ဢၼ်ဢမူႉမၼ်းဢမ်ႇပေႃးယႂ်ႇၼၼ်ႉၵူၺ်း ” – ဝႃႈၼႆ။
ၸုမ်းသိုၵ်းၵွင်ႈၵၢင်ႇ ဢၼ်ထုၵ်ႇပွႆႇလွတ်ႈမႃးၼႆႉ ပဵၼ်ၸုမ်း MNDAA ၊ TNLA လႄႈ SSPP ႁူမ်ႈၵၼ်တင်းသဵင်ႈ 21 ၵေႃႉ ၼႂ်းၼၼ်ႉ ပႃးလုၵ်ႈၸုမ်း SSPP 3 ၵေႃႉၼႆယဝ်ႉ။
ၸဝ်ႈသိုၵ်းလူင် ၸၢႆးသူႉ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၸုမ်းႁဝ်း ၺႃးၺွပ်းတႄႉ ယွၼ်ႉဝႃႈ ဢမ်ႇၾၢင်ႉမႅၼ်ႈသေ ၵႂႃႇၽႃႇၺႃးၵၼ်သေ ၺႃးၺွပ်းၵႂႃႇၸိူဝ်းၼႆႉ ၼၼ်ႉၼႃႇ ။ ၵမ်ႈၼမ် ဢၼ်ၺႃးၺွပ်းၼႆႉတႄႉၵေႃႈ ပဵၼ်ၾၢႆႇ ၵဵပ်းၶွၼ်ႇႁႃႉ သင်ႁႃႉၼႆၸိူဝ်းၼႆႉ ၺွပ်းလႆႈ ၼိူဝ်တၢင်းၵႃးလူင်ဝႃႈ ၸွမ်းၵဵတ်ႉၸွမ်းလၢၼ်ႇဝႃႈ ၸဵမ်ၸိူဝ်းၼႆႉ။မၼ်းပႃးၵွင်ႈပႃးၵၢင်ႇလႄႈ ၺွပ်းၵႂႃႇၼၼ်ႉၼႃႇ ။ ဢၼ်ၺႃး မၼ်းဢမ်ႇၸႂ်ႈ ၸၼ်ႉယႂ်ႇ မၼ်းပဵၼ်ၸၼ်ႉႁူဝ်သိုၵ်းႁူဝ်ႁၢၼ်ဢွၼ်ႇၸိူဝ်းၼႆႉၵူၺ်း ” – ဝႃႈၼႆ။
ၵူၼ်းတူၵ်းၶွၵ်ႈၵၢၼ်မိူင်း ဢၼ်ထုၵ်ႇပွႆႇလွတ်ႈဢွၵ်ႇပွၵ်ႈၼႆႉ တင်းသဵင်ႈ မီး 7749 ၵေႃႉ ၵမ်ႈၼမ် ပဵၼ်ၵူၼ်းဢၼ်ၶတ်းၶႂၢင်ၸဝ်ႈဢႃႇၼႃႇ လႄႈ ပဵၼ်ၵူၼ်း ၺႃးဢဝ်လိူင်ႈ မၢႆမီႈ ၶတီး 505 (ၵ) ဝႆႉ ။
ၸဝ်ႈသိုၵ်းလူင် ၸၢႆးသူႉ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶဝ်ပွႆႇလွတ်ႈပၼ်ၼႆႉတႄႉ မၼ်းပဵၼ်လွၵ်းဢွၵ်ႇၶဝ်ၵူၺ်း။ ၶွင်ႇသီႇသိုၵ်းမၢၼ်ႈၼႆႉၼႆ ၶႂ်ႈတေႃႇဢႃယုၶဝ်ၵႂႃႇထႅင်ႈ ယွၼ်ႉၼၼ်လႄႈ ၼင်ႇႁိုဝ်ပိူၼ်ႈတေႁၼ်လီၶဝ် ယဝ်ႉၵေႃႈ တႃႇမႄးလၢင်ႉလွင်ႈဢမ်ႇလီၶဝ် ဢၼ်ၶဝ်ယၢမ်ႈႁဵတ်းမႃးၸိူဝ်းၼၼ်ႉၼႃႇ ။ ၶဝ်သိုပ်ႇဢႃယု မႃး တႃႇၶၢဝ်းတၢင်း 6 လိူၼ်ၼႆ ပေႃးမီးလၢႆပွၵ်ႈယဝ်ႉၼႃႇ။ဢိင်ၼိူဝ်လွင်ႈၼႆႉ ၶဝ်ၸင်ႇပွႆႇၼၼ်ႉၼႃႇ ။ၶႂ်ႈႁႂ်ႈၸုမ်းယိပ်းၵွင်ႈၵၢင်ႇၶဝ် ႁၼ်လီၼိူဝ်ၶဝ်ၵေႃႈပႃးၼၼ်ႉၼႃႇ” – ဝႃႈၼႆ ။
ပေႃးပႃးၵူၼ်းၸုမ်းသိုၵ်းရၶၢႆႇ AA ၸိုင်တင်းမူတ်း ၵူၼ်းသိုၵ်းၶွင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လွတ်ႈဢွၵ်ႇမႃး 22 ၵေႃႉ။ ၵူၼ်းဢၼ်ၺႃးတီႉယွၼ်ႉၵဵဝ်ႇၶွင်ႈၵၼ်တင်းၸုမ်းယိပ်းၵွင်ႈၸၢင်ႇၸၢဝ်းၶိူဝ်းသမ်ႉလွတ်ႈဢွၵ်ႇမႃး 72 ၵေႃႉ ၵူၼ်းၼွၵ်ႈမိူင်း 100 ပၢႆ။
ပွၵ်ႈၼႆႉသိုၵ်းမၢၼ်ႈ ယွၼ်ႇယွမ်းပၼ်တူတ်ႈတၢမ်ႇၶွၵ်ႈ ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ 6 ပီ လုၵ်ႉတီႈတၢမ်ႇၶွၵ်ႈ 33 ပီ ယၢမ်းလဵဝ် တေလႆႈသိုပ်ႇယူႇၼႂ်းၶွၵ်ႈ 27 ပီ ၊ လူတ်းယွၼ်ႇပၼ် ၸွမ်ၸိုင်ႈ ဢူးဝိၼ်းမျိၼ့် 4 ပီ ၊ လုၵ်ႉတီႈ တၢမ်ႇၶွၵ်ႈ 12 ပီသေ တေလႆႈယူႇၼႂ်းၶွၵ်ႈထႅင်ႈ 8 ပီ။ လွင်ႈၼႆႉ NUG ပိုၼ်ၽၢဝ်ႇဝႃႈ ၸိူဝ်းၶဝ် ဢမ်ႇၸႂ်ႈၵူၼ်းမီးတၢင်းၽိတ်းလႄႈ ၸိူဝ်းၶဝ်ထုၵ်ႇလႆႈပူတ်းပွႆႇတူတ်ႈတၢမ်တင်းပိုၵ်း ဝႃႈၼႆ။
ၼႂ်းၼၼ်ႉ ၼႂ်းမိူင်းတႆးတႄႉ ပွႆႇပၼ်ၵူၼ်းတူၵ်းၶွၵ်ႈတီႈ တွင်ႇလေးလူင်း ယွင်ႁူၺ်ႈ 143 ၵေႃ့ ၊ ၶွၵ်ႈ လႃႈသဵဝ်ႈ 96 ၵေႃ့ ၊ ၶွၵ်ႈၵဵင်းတုင် 62 ၵေႃ့ ။ ၼႂ်းၼၼ့်ၵူၼ်းႁဵတ်းၵၢၼ်မိူင်း ပႃးၵမ်ႈဢႄႇၵူၺ်းၼႆ သိုဝ်ႇ RFA ႁၢႆးငၢၼ်းဝႆ့ၼင်ႇၼႆ။
ၵဵဝ်ႇၵပ်းလွင်ႈၼႆ့သေ ၽူႈလဵပ်ႈႁဵၼ်းၵၢၼ်မိူင်း မိူင်းတႆး ထတ်းသၢင်ႈဝႃႈ – သိုၵ်းမၢၼ်ႈၶႂ်ႈလူတ်းယွမ်းပၢင်တိုၵ်း တင်းၸုမ်းဢူၺ်းလီပွတ်းႁွင်ႇ ၊ ယွၼ့်ပိူဝ်ႈ လႆႈႁႅၼ်းသိုၵ်း တိုၵ်းၵၼ်တင်းၸုမ်းလုၵ့်ၽိုၼ့် ၸုမ်းသိုၵ်းၵူၼ်းၼုမ်ႇ ဢၼ်မီးမႃးဝၢႆးလင်သိုၵ်းမၢၼ်ႈယိုတ်းမိူင်း ၼႆႉဝႃႈၼႆ ။
