ၼၢင်းယိင်းၵူတ်ႉၶၢႆ 2 ၵေႃႉ ၺႃးလုၵ်ႈၸုမ်းသိုၵ်းမၢၼ်ႈ 2 ၵေႃႉ ၵၼ်ႉၸၼ်လူလၢႆ။
မိူဝ်ႈဝၼ်းတီႈ 30/7/2023 ယၢမ်းၶမ်ႈ 10 မူင်းၼၼ်ႉ ၼၢင်းယိင်း 2 ၵေႃႉ ဢၼ်ယူႇဝၢၼ်ႈသူၼ်လူင် ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၺႃးသိုၵ်းမၢၼ်ႈ 2 ၵေႃႉ ဢၼ်မႃးယူႇဝႆႉ ၼႂ်းသူၼ်ဢွႆႈလႄႈၼႂ်းဝတ်ႉၵျွင်းႁိမ်းဝၢၼ်ႈၼၼ်ႉ ၵၼ်ႉၸၼ်လူလၢႆ ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈ 2 ၵေႃႉၼႆႉ ၵၼ်ႉၸၼ်ၼၢင်းယိင်းဢၼ် ပႃး တွင်ႉ ဝႆႉ ၼႂ်းႁိူၼ်းလင်ၼိုင်ႈၼၼ်ႉဢေႃႈ။ လိုပ်ႈၽူဝ်မၼ်းဢွၵ်ႇႁိူၼ်း သေၵၼ်ႉၸၼ်ၼႆဢေႃႈ ၊ ယဝ်ႉၵေႃႈ ၵႂႃႇထႅင်ႈ ႁိူၼ်းၼိုင်ႈ ၵႂႃႇတဵၵ်းၸႂ်ႉပိူၼ်ႈပိုတ်ႇၽၵ်းတူႁိူၼ်းသေ ဢဝ်ၵွင်ႈငႃပေႃႈလုၵ်ႈဢွၼ်ႇသေ ၵၼ်ႉၸၼ် မႄႈလုၵ်ႈဢွၼ်ႇ ၼၼ်ႉ ။ မႄႈလုၵ်ႈဢွၼ်ႇၼၼ်ႉ ၵႂႃႇႁိမ်ဢဝ်ၵွင်ႈလႄႈ သိုၵ်းမၢၼ်ႈ ဢဝ်ၵွင်ႈၽတ်ႉပၼ် မႄႈလုၵ်ႈဢွၼ်ႇၼၼ်ႉ” – ဝႃႈၼႆ။
ၼၢင်းယိင်း 2 ၵေႃႉ ဢၼ်ၺႃးသိုၵ်းမၢၼ်ႈ ၵၼ်ႉၸၼ်လူလၢႆၼႆႉ ဢႃယု 30 ပီ ပဵၼ်မႄႈလုၵ်ႈဢွၼ်ႇ ၵေႃႉၼိုင်ႈ လႄႈ ၵၼ်ၸၼ်ၼၢင်းယိင်းပႃးတွင်ႉၵေႃႉၼိုင်ႈ ၊ ပဵၼ်ၼႂ်းၼမ်ႉၽၵ်းၵႃ တင်း 2 ၵေႃႉ ၸႄႈဝဵင်းၵူတ်ႉၶၢႆ။
ၵူၼ်းတူင်ႉၼိုင်ၼႂ်းၸုမ်းၼၢင်းယိင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈ- “ မိူဝ်ႈလဵဝ်ၼႆႉ ၽႂ်ၵေႃႈ ဢမ်ႇႁတ်းလၢတ်ႈႁတ်းၸႃ ။ မိူဝ်ႈပီပူၼ်ႉမႃးၵေႃႈ ယၢမ်ႈၸွႆးတြႃးမႃးယူႇ လွင်ႈၵၼ်ႉၸၼ်ၵၼ်ၼႆႉ။ပိူင်ပဵၼ်ၸိူဝ်းၼႆႉ ႁဵတ်းႁႂ်ႈၼၢင်းယိင်းၶဝ် တုမ်ႉတိူဝ်ႉပၢႆးၸႂ်ႁႅင်းဝႆႉ။ တေႃႈၼင်ႇ တူဝ်ႁဝ်းၵူၺ်းၵေႃႈ ပေႃးဢမ်ႇၶႂ်ႈႁတ်းၵႂႃႇတၢင်းလႂ်ယဝ်ႉ ယွၼ်ႉၼၼ်လႄႈ ၶႂ်ႈႁႂ်ႈၾၢႆႇတပ်ႉသိုၵ်းမၢၼ်ႈၶဝ် ဢဝ်လိူင်ႈပၼ် လွင်ႈၸိူဝ်းၼႆႉယူႇ ” – ဝႃႈၼႆ။
ၼႂ်းလိူၼ်ၵျူႊလၢႆႊၼႆႉၵူၺ်းၵေႃႈ သိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင်တူၵ်းသႂ်ႇႁိူၼ်းယေးၵူၼ်းမိူင်းလႄႈ မီးၵူၼ်းလူႉတၢႆ လၢႆၵေႃႉ မိူၼ်ၼင်ႇ ၼႂ်းဢိူင်ႇၼမ်ႉၽၵ်းၵႃၼၼ်ႉ ၼၢင်းယိင်းၵေႃႉၼိုင်ႈလႄႈ ၵူၼ်းၼုမ်ႇ ၵေႃႉၼိုင်ႈ ။ မိူၼ်ၼင်ႇတီႈဝၢၼ်ႈသၢႆးၶၢဝ် ၼႂ်းဢိူင်ႇၼမ်ႉဢုမ်ၼၼ်ႉၵေႃႉၼိုင်ႈ။ တီႈမၢၼ်ႈၼွင် ၼႂ်းၸႄႈဝဵင်းၵူတ်ႉၶၢႆၼၼ်ႉၵေႃႈ ၵေႃႉၼိုင်ႈ လႆႈလူႉတၢႆယွၼ်ႉမၢၵ်ႇလူင်သိုၵ်းမၢၼ်ႈ။