ပၢင်ၶေႉၶဵင်ႇ ၼၢင်းႁၢင်ႈလီ Miss Universe Tachileik 2023 ပီၼႆႉ ၼၢင်းၼၼ်ႇတႃႇလိၼ်း (ႁွင်ႉ) ၼၢင်းႁွမ်ငိုၼ်း လႆႈထုၵ်ႇလိူၵ်ႈပဵၼ် တူဝ်တႅၼ်း ၼၢင်းႁၢင်ႈလီ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇသေ မိူဝ်ႈလဵဝ် လႆႈၵႂႃႇ ၶဝ်ႈႁူမ်ႈပၢင်ၶေႉၶဵင်ႇတီႈ ပၢင်ၶေႉၶဵင်ႇ ၼၢင်းႁၢင်ႈလီ မိူင်းႁူမ်ႈတုမ် Miss Universe Myanmar ထႅင်ႈ တီႈတႃႈၵုင်ႈ ။ မၼ်းၼၢင်းလၢတ်ႈဝႃႈ – သင်လႆႈပဵၼ်တၢင်းႁၢင်ႈလီလုမ်ႈၾႃႉ မိူင်းမၢၼ်ႈၸိုင် တေႁဵတ်းပၼ်ႁႂ်ႈသၢဝ်ႁၢင်ႈလီတႆး လႆႈၶိုၼ်ႈၶဵင်ႇ ၶေႉၶဵင်ႇတၢင်းႁၢင်ႈလီၼမ်ၼမ်ဝႃႈၼႆ။
ဢိင်ၼိူဝ်လွင်ႈၼႆႉ ယၢမ်းလဵသ်ၵၢၼ်တူင်ႉၼိုင်မၼ်းၼၢင်းမီးၸိူင်ႉႁိုဝ်၊ ႁၢင်ႈႁႅၼ်းဝႆႉၸၼ်ႉလႂ်ယူႇ ၼႆၼၼ်ႉ ၸၢႆးသႅင်ယွတ်ႈ ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇတွင်ႈထၢမ်ဝႆႉ ၼင်ႇၼႆၶႃႈ ။
ထၢမ် ။ ။ မႂ်ႇသုင်ၶႃႈ ဢွၼ်တၢင်းသုတ်း ယွၼ်းႁႂ်ႈ ၼၢင်းႁၢင်ႈလီႁဝ်း ၵပ်းသိုပ်ႇတူဝ်ပၼ်ၽွင်ႈၶႃႈ။
တွပ်ႇ ။ ။ဢေႃႈၶႃႈ ၸိုဝ်ႈႁွင်ႉ ၼၢင်းၼၼ်ႇတႃႇလိၼ်း (ဢမ်ႇၼၼ်)
ၼၢင်းႁွမ်ငိုၼ်းၼႆၶႃႈ ဢႃယု 19 ၶႃႈ ။ ယူႇပွၵ်ႉသၼ်သၢႆး ( ၵ) ၸႄႈဝဵင်းတႃႈၶီႈလဵၵ်းၶႃႈ။ ပေႃႈပဵၼ် လုင်းၸၢႆးၸၢႆး လွႆၵေႃႇ၊ မႄႈပဵၼ် ပႃႈၼၢင်းသႅင်ဢၢမ်း။ မီးပီႈၼွင်ႉ 3 ၵေႃႉ ။ ၼၢင်းပဵၼ်လုၵ်ႈၵေႃႉယႂ်ႇၶႃႈဢေႃႈ။
ထၢမ် ။ ။ မိူဝ်ႈလဵဝ်ၼွင်ႉတူင်ႉၼိုင်ဝႆႉယူႇၼႆႉ ထိုင်ၶၵ်ႉတွၼ်ႈလႂ်ယဝ်ႉ တိုၵ်ႉမႅၼ်ႈၽွင်းတေႁဵတ်းသင်ထႅင်ႈၶႃႈ။
တွပ်ႇ ။ ။ မိူဝ်ႈလဵဝ် တိုၵ်ႉၽိုၵ်းဝႆႉ လၢႆလၢႆလွင်ႈယူႇၶႃႈ မိူၼ်ၼင်ႇ လၢႆးလၢတ်ႈၵႂၢမ်း ၊ လၢႆးပႆ ယဝ်ႉၵေႃႈ တွၼ်ႈတႃႇ လုမ်းလႃးတူဝ်ၶိင်းၵေႃႈ လဵၼ်ႈၵျိမ်ႊ (Gym) ဢွၵ်ႇဢဵၼ်ႈႁႅင်းၸိူဝ်းၼႆႉၶႃႈဢေႃႈ။
ထၢမ် ။ ။ တႃႇၶဝ်ႈၶေႉၶဵင်ႇၼၢင်းႁၢင်ႈလီၼႆႉ ပဵၼ်ၽႂ်တိုၵ်းသူၼ်းႁႂ်ႈၶဝ်ႈၶႃႈ။ၸွင်ႇပေႃႈမႄႈပီႈၼွင်ႉ ႁေႉႁၢမ်ႈၶႃႈႁႃႉ။
တွပ်ႇ ။ ။ ဢမ်ႇမီးၽႂ် တိုၵ်းသူၼ်းၶႃႈ ။ ပႃးဝႃႇသၼႃႇ ၸဵမ်လႂ်မႃးလႂ်ၶႃႈယဝ်ႉ။ ယွၼ်ႉၼၼ်ယွၼ်းၶႂၢင်ႉပေႃႈမႄႈသေ ၸင်ႇၶဝ်ႈၶေႉၶဵင်ႇၶႃႈဢေႃႈ။ဢၼ်ႁေႉႁၢမ်ႈတႄႉ ဢမ်ႇမီးၼင်ႇၵဝ်ႇၶႃႈ။
ထၢမ် ။ ။ ပၢႆးပၺ်ႇၺႃႇၶႃႈလူး ထိုင်ဝႆႉ ၶၵ်ႉတွၼ်ႈလႂ်ယဝ်ႉၶႃႈ။
တွပ်ႇ။ ။ ဢၼ်ၶိုၼ်ႈႁဵၼ်း ယဝ်ႉတူဝ်ႈဝႆႉတႄႉၵေႃ ပၢႆးမၢၵ်ႈမီးၶႃႈဢေႃႈ လႆႈဝႆႉ တီႇပလူဝ်ႇမႃႇဢေႃႈ။တၢင်ႇဢၼ်ၵေႃႈ လဵပ်ႈႁဵၼ်းဝႆႉ မီးယူႇ ။ မိူဝ်ႈလဵဝ်တႄႉ ၵိုတ်းလိုဝ်ႈဝႆႉၸူဝ်ႈၶၢဝ်းၶႃႈ။
ထၢမ် ။ ။ လႆႈႁူႉဝႃႈ ထုၵ်ႇလိူၵ်ႈပဵၼ်ၼၢင်းႁၢင်ႈလီ တႃႈၶီႈလဵၵ်း Miss Universe Tachileik ယဝ်ႉၼႆလႄႈ မိူဝ်ႈလဵဝ် သမ်ႉၶိုၼ်း တေလႆႈၵႂႃႇၶဝ်ႈၶေႉၶဵင်ႇ တီႈလႂ်ထႅင်ႈၶႃႈ။
တွပ်ႇ ။ ။ မိူဝ်ႈလဵဝ် ပေႉတီႈတႃႈၶီႈလဵၵ်းယဝ်ႉလႄႈ ပဵၼ်တူဝ်တႅၼ်းၼၢင်းႁၢင်ႈလီတႃႈၶီႈလဵၵ်းဝႆႉသေ တေလႆႈသိုပ်ႇ ၵႂႃႇ ၶႅင်ႇတီႈတႃႈၵုင်ႈထႅင်ႈၶႃႈဢေႃႈ။တီႈၼၼ်ႈ ပဵၼ်ပၢင်ၶေႉၶဵင်ႇ ၼၢင်းႁၢင်ႈလီ မိူင်းႁူမ်တုမ် Miss Universe Myanmar ၶႃႈဢေႃႈ။
ထၢမ် ။ ။ ဢေႃႈၶႃႈ ပၢင်လိူၵ်ႈၼၢင်းႁၢင်ႈလီ တီႈတႃႈၶီႈလဵၵ်းၼႆႉ တၢင်းသဵင်ႈမီးလၢႆၵေႃႉၶႃႈ ။ ယဝ်ႉၵေႃႈ တႃႇတေၵႂႃႇၶႅင်ႇ တီႈတႃႈၵုင်ႈၶႃႈလူး တေမီးလၢႆၵေႃႉၶႃႈ။တေပဵၼ်ၵူၼ်းမိူင်းလႂ် လၢႆလၢႆၶႃႈ။
တွပ်ႇ ။ ။ ဢေႃႈၶႃႈ တီႈတႃႈၶီႈလဵၵ်းၼႆႉ ဢၼ်ၶဝ်ႈၶႅင်ႇ ၼႂ်းပၢင်လိူၵ်ႈၼၢင်းႁၢင်ႈလီတႃႈၶီႈလဵၵ်းၼႆႉ တင်းသဵင်ႈ မီး 14 ၵေႃႉၶႃႈဢေႃႈ ။ တီႈတႃႈၵုင်ႈတႄႉ ၵေႃႈ လႅပ်ႈတေမီးမွၵ်ႈ 30 ၼႆႉၶႃႈ။တေပႃးၼၢင်းႁၢင်ႈလီ လႃႈသဵဝ်ႈ ၊ တူၼ်ႈတီး ၊မူႇၸေႊ ၊ ဝဵင်းလိူဝ်ႇ၊ ၽႃၵၢၼ်ႉ ၸိူဝ်းၼႆႉ တေပဵၼ်မိူင်းႁူမ်တုမ်ပတ်းပိုၼ်ႉယဝ်ႉၶႃႈ။
ထၢမ် ။ ။ ဢၼ်မႃးၶႅင်ႇၼၢင်းႁၢင်ႈလီၼႆႉ တၢင်းယိူင်းဢၢၼ်း မီးဝႆႉသင်ၽွင်ႈၶႃႈ ။ၶႂ်ႈထိုင်ၶၵ်ႉတွၼ်ႈလႂ် ၼႂ်းပၢင်လိူၵ်ႈၼၢင်းႁၢင်ႈလီ မိူင်းႁူမ်တုမ်ၼႆႉ။
တွပ်ႇ ။ ။ ဢေႃႈၶႃႈ ၼႆႉတႄႉ တေၶတ်းၸႂ်ႁဵတ်းႁႂ်ႈလီတီႈသုတ်းၶႃႈ။ ယိူင်းဢၢၼ်းသုင်သုတ်းတႄႉၵေႃႈ ပေႃးလႆႈတီႈယူႇ Miss Universe Myanmar ယိင်ႈၶႅၼ်းလီၶႃႈၵႂႃႈၼေႃႈ။ တေလႆႈတၢင်တူဝ်မိူင်းတႆးႁဝ်း။
ထၢမ် ။ ။တႃႇၶဝ်ႈၶေႉၶဵင်ႇၼၢင်းႁၢင်ႈလီၼႆႉ လူဝ်ႇလႆႈမီး ၼမ်ႉၵတ်ႉသင် လၢႆလၢႆၶႃႈ။ယဝ်ႉၵေႃႈ တၢင်ႇဢၼ် ဢၼ်မၵ်းၶၢၼ်းဝႆႉ ၸွင်ႇမီး။
တွပ်ႇ။ ။ ဢေႃၶႃႈ ပိူင်လူင်မၼ်းတႄႉ လူဝ်ႇလႆႈ မီးလွင်ႈယုမ်ႇယမ်တူဝ်ၸဝ်ႈၵဝ်ႇၼၼ်ႉယဝ်ႉၶႃႈ။ ယဝ်ႉၵေႃႈ တေလႆႈပဵၼ် ဢႃယု 27 လူင်းတႂ်ႈၶႃႈ။ ၵမ်ႈၼမ်တႄႉ တေပဵၼ် သႅၼ်းပၢၼ် 18 – 19 ၶိုၼ်ႈယဝ်ႉၶႃႈ ။
ထၢမ် ။ ။ တႃႇၶေႉၶဵင်ႇၼၢင်းႁၢင်ႈလီၼႆႉ မိူဝ်ႈလဵဝ် မီးဝႆႉ တၢင်းယၢပ်ႇၽိုတ်ႇသင်ၽွင်ႈၶႃႈ။
တွပ်ႇ။ ။ ၼၢင်းသမ်ႉ တိုၵ်ႉ ပဵၼ်ၵူၼ်းမႂ်ႇၵူၺ်းလႄႈ မၼ်းၵေႃႈ လႆႈၾိုၵ်းတႄႉတႄႉ ဝႃႈဝႃႈၶႃႈဢေႃႈ ။ ယုမ်ႇယမ်ဝႃႈ တေၶတ်းၸႂ်ႁႂ်ႈလီလႄႈ တေႇလႆႈလွင်ႈလီယူႇၶႃႈ။
ထၢမ် ။ ။ပေႃးလႆႈဢွင်ႇပေႉ ထုၵ်ႇလိူၵ်ႈပဵၼ်ၼၢင်းႁၢင်ႈလီ မိူင်းႁူမ်တုမ် Miss Universe Myanmar ၵႂႃႇၼႆ တႃႇမိူဝ်းၼႃႈ ၽႅၼ်ၵၢၼ်ဝႆႉ ၸိူင်ႉႁိုဝ်ၽွင်ႈၶႃႈ။
တွပ်ႇ။ ။ ႁဵတ်းႁႂ်ႈတႆးႁဝ်း ႁူႉၸၵ်းလွင်ႈပၢင်ၶေႉၶဵင်ႇလၢႆလၢႆဢၼ်၊ ၶႂ်ႈႁႂ်ႈတႆးႁဝ်း ၶဝ်ႈႁူမ်ႈလႆႈ ၼမ်ၼမ်ဢေႃႈ။မိူၼ်ၼင်ႇ ၸၢဝ်းရၶႅင်ႇၶဝ်ၼႆ ၶဝ်မေႃပၼ်ႁႅင်းၸိူဝ်ႉၶိူဝ်းၶဝ် တႆးႁဝ်းၵေႃႈ ၶႂ်ႈႁႂ်ႈမီးတိုဝ်ႉတၢင်းလီသေ ၶႂ်ႈႁႂ်ႈမေႃပူၵ်းပွင်ၵၼ် ႁႂ်ႈၶဝ်ႈထိုင်လႆႈ ၵူႈတီႈၸိူင်ႉၼႆၶႃႈ။
ထၢမ် ။ ။ ၵမ်းလိုၼ်း ၶႂ်ႈၾၢၵ်ႇၶေႃႈၵႂၢမ်းသင်ပၼ် ၽူႈပၼ်ႁႅင်းၽွင်ႈၶႃႈ။
တွပ်ႇ ။ ။ ဢေႃႈၶႃႈ ႁႂ်ႈၽွမ်ႉၵၼ် ပၼ်ႁႅင်းယႂ်ႇၼမ်သေၵမ်းၶႃႈ။ ၼၢင်းတေႁဵတ်းႁႂ်ႈလီတီႈသုတ်းၶႃႈ။
Facebook Page -https://www.facebook.com/profile.php?id=100094064072196
