ပျီႇတူႉၸိတ်ႉမၢၼ်ႈပၢင်ႇ ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၺႃးမၢၵ်ႇႁၢင်ႈၵၢင်သႂ်ႇ တၢႆ 2 ၵေႃႉ၊ ၽူႈမီးၸၼ်ႉၵေႃႉၼိုင်ႈ မၢတ်ႇၸဵပ်း။
မိူဝ်ႈဝႃး ဝၼ်းတီႈ 30/7/2023 ယၢမ်းႁူဝ်ၶၢမ်ႈ 4 မူင်းၼၼ်ႉ ပျီႇတူႉၸိတ်ႉမၢၼ်ႈပၢင်ႇ ၺႃးမၢၵ်ႇႁၢင်ႈၵၢင်ဝႆႉ တီႈတၢင်းၶဝ်ႈ ဝၢၼ်ႈမႂ်ႇတိုၼ်းလီ ႁိမ်းဝၢၼ်ႈၸလၢႆးၶုမ်ႇ ၸႄႈဝဵင်းလၢႆးၶႃႈ တၢႆ 2 ၵေႃႉ မၢတ်ႇၸဵပ်းၵေႃႉၼိုင်ႈ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ထႅဝ်ၵႃး ပျီႇတူႉၸိတ်ႉမၢၼ်ႈပၢင်ႇၶဝ် ဢၼ်ၸဝ်ႈတ ဢွၼ်ႁူဝ် လုၵ်ႉမၢၼ်ႈပၢင်ႇ ၵႂႃႇတၢင်းၼမ်ႉႁူးၽြႃးထမ်ႈၼၼ်ႉ ၵႂႃႇၺႃးမၢၵ်ႇပိူၼ်ႈၵၢင်ဝႆႉ ၼႆဢေႃႈ။ ပႆႇလႆႈႁူႉဝႃႈ ပဵၼ်ႁွႆးမိုဝ်းၽႂ် ” – ဝႃႈၼႆ။
ၵႃးပျီႇတူႉၸိတ်ႉ ဢၼ်ၽႃႇၺႃး မၢၵ်ႇႁၢင်ႈၵၢင်ဝႆႉၼၼ်ႉ မီးၵူၼ်း 3 ၵေႃႉၶီႇမႃးပႃးၸွမ်း။ ၼႂ်းၼၼ်ႉ ပႃးၽူႈမီးၸၼ်ႉၵေႃႉၼိုင်ႈ ၸိုဝ်ႈႁွင်ႉ ၸၢႆးၽူၺ်း တိူဝ်ႉၸၢၵ်ႇမၢၵ်ႇမၢတ်ႇၸဵပ်းသေ ဢၼ်ပဵၼ်လုၵ်ႈၸုမ်း 2 ၵေႃႉတႄႉ တၢႆထင်တီႈ ။
ၵူၼ်းၼႂ်းပိုၼ်ႉတီႈၵေႃႉၼိုင်ႈ သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ တၢင်းပွတ်းၼႆႉတႄႉ ၸုမ်းယိပ်းၵွင်ႈၵၢင်ႇလိူင်ႇၼႃႇ။ၸုမ်းလႂ်ႁဵတ်းတေႃႇ ၸုမ်းလႂ် ဢမ်ႇႁူႉ။ၵူၺ်းၼႃႇ ဢၼ်ႁၢင်ႈၵၢင်မၢၵ်ႇ ၸွမ်းတႃႈၸွမ်းတၢင်းႁဵတ်းၼႆတႄႉ ဢမ်ႇလီပဵၼ် ” – ဝႃႈၼႆ။
ၼႂ်းၸႄႈဝဵင်းလၢႆးၶႃႈၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃး မီးလၢႆၸုမ်း မိူၼ်ၼင်ႇ ၸုမ်းသိုၵ်းမၢၼ်ႈယိုတ်းမိူင်း ၊ ၸုမ်း သိုၵ်း SSPP ၊ ၸုမ်းသိုၵ်း RCSS လႄႈ ၸုမ်းသိုၵ်း ပျီႇတူႉၸိတ်ႉ ၸဵမ်ၸိူဝ်းၼႆႉ။