တီႈဝဵင်းပၢင်လူင် မီးပၢင်တေႃႇလွင်းဢမ်ႇၵိုတ်းဢမ်ႇထၢတ်ႇ ၽူႈၸၢႆးပေႃႈၵႃႉမၢၵ်ႇၵဵင်ၵေႃႉၼိုင်ႈ ၵူၼ်းဝဵင်းပၢင်လူင် ၺႃးၵူၼ်းဢမ်ႇႁူႉၾၢႆႇၶႃႈႁႅမ်တၢႆၽွင်းၵႂႃႇသူင်ႇမၢၵ်ႇၵဵင်။
ဝၼ်းတီႈ 24/07/2023 ၸၢႆးၼုမ်ႇ ဢႃယု 30 ပီၵူၼ်းပၢင်လူင် ၵႂႃႇသူင်ႇမၢၵ်ႇၵဵင်သေ ဢမ်ႇပွၵ်ႈမႃးထိုင်ႁိူၼ်းၶိုၼ်း။ ထိုင်ထႅင်ႈဝၼ်းၼိုင်ႈ ဝၼ်းတီႈ 25/07/2023 ၸင်ႇႁၼ်တူဝ်တၢႆမၼ်းၸၢႆး တီႈတၢင်းၼွၵ်ႈဝဵင်း။ ရူတ်ႉၵႃးလႄႈ ငိုၼ်းတွင်းၶူဝ်းၶွင်ဢၼ်ပႃးၵႂႃႇၸွမ်း ႁၢႆမူတ်း ဝႃႈၼႆ။
“တီႈတူဝ်တၢႆၼၼ်ႉ မီးႁွႆးတႅင်းတီႈဢူၵ်း တီႈၵွင်းလင် ။ တီႈႁူဝ်ၵေႃႈၺႃးပေႃႉဝႆႉ။ ၶူဝ်းၶွင်ရူတ်ႉၵႃးမၼ်းၸိူဝ်းၼႆႉတႄႉ ႁၢႆမူတ်း ႁၼ်တူဝ်တၢႆမၼ်းလၢႆလၢႆ ” ၵူၼ်းပၢင်လူင်ၵေႃႉၼိုင်ႈလၢတ်ႈၼင်ႇၼႆ။
တီႈဝဵင်းပၢင်လူင်ၼႆႉ ယၢမ်းလဵဝ် မီးပၢင်တေႃႇလွင်းၵူၺ်းဢမ်ႇၵႃး မီးပႃးပွႆးၵၢတ်ႇၶၢႆၶူဝ်း ။ ၵူၼ်းမိူင်းဢမ်ႇလႆႈၸႂ် ႁၢမ်ႈပၢင်တေႃႇလွင်းယူႇသေတႃႉ ၵူၼ်းၸတ်းပၢင်တေႃႇလွင်း ဢမ်ႇထွမ်ႇသိုပ်ႇႁဵတ်းပၢင်တေႃႇလွင်းမႃးတေႃႇထိုင်ယၢမ်းလဵဝ်။
“ၸူဝ်ႈမီးပွႆးၶၢႆၶူဝ်းလႄႈ ပၢင်တေႃႇလွင်းၼႆႉ ၽူႈလၵ်ႉၵေႃႈလိူင်ႇ။ ရူတ်ႉၶိူင်ႈၵမ်းၵမ်းႁၢႆ။ ၼႂ်းလိူၼ်ၼႆႉၵူၺ်း ရူတ်ႉၶိူင်ႈႁၢႆ တီႈၵၢတ်ႇ 3-4 လမ်းယဝ်ႉ။ ရူတ်ႉၶိူင်ႈမႃးသိုဝ်ႉၽၵ်းတီႈၵၢတ်ႇ၊ ၽူႈလၵ်ႉၼႆႉ ဢဝ်ၽၵ်းမီႇမၢၵ်ႇၶိူဝ်သူမ်ႈၼိူဝ်ရူတ်ႉၼၼ်ႉလူင်းဝႆႉပၼ်သေ ဢဝ်ရူတ်ႉၶိူင်ႈၵႂႃႇၵွႆး ။ ႁၢႆႉထၢၼ်ႇၼၼ်ႉဢေႃႈ ” ၵူၼ်းၼုမ်ႇဝဵင်းပၢင်လူင် လၢတ်ႈထႅင်ႈၼင်ႇၼႆ။
ယွၼ်ႉပိူဝ်ႈပၢင်တေႃႇလွင်းလႄႈ ပွႆးၶၢႆၶူဝ်း ဢၼ်ပဵၼ်မႃးၼႂ်းၸိုင်ႈတႆးပွတ်းၸၢၼ်းလၢႆလၢႆၸႄႈဝဵင်းၼႆႉသေ ၵူၼ်းၵိၼ်ယႃႈမဝ်းၵမ်ၵေႃႈလိူင်ႈ ၽူႈလၵ်ႉၵူၼ်းၸူၼ်ၵေႃႈလိူင်ႇ။ သိုၵ်းမၢၼ်ႈ ပလိၵ်ႈမၢၼ်ႈ ဢမ်ႇမီးလွင်ႈၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ မီးလွင်ႈလၵ်ႉၸၵ်ႉၶုတ်ႈမႃးၵေႃႈ ဢမ်ႇတွၼ်ႉလမ်းတီႉၺွပ်း ၵႄႈလိတ်ႈပၼ်သေပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ