သိုၵ်းမၢၼ်ႈ ယိုတ်းမိူင်း လမ်းလိမ်း ယိုဝ်းၵွင်ႈလူင် တူၵ်းသႂ်ႇ ႁိူၼ်းမႄႈလုၵ်ႈဢွၼ်ႇ တီႈဝဵင်းၵူတ်ႉၶၢႆ လင်ၼိုင်ႈ လူႉၵွႆၼမ် ယၢမ်းလဵဝ် သၢမ်မႄႈလုၵ်ႈ လႆႈႁၢမ်းတီႈယူႇတီႈၵိၼ်ဝႆႉ။
ဝၼ်းတီႈ 24/7/2023 ယၢမ်းၵၢင်ၶိုၼ်း 11 မူင်းပၢႆ ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉၶလယ 123 ဢၼ်ပၵ်းဝႆႉ ၾၢႆႇ ႁွင်ႇဝၢၼ်ႈမႆႇသွင်ၵူင်း ၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇၼၼ်ႉ လမ်းလိမ်း ယိုဝ်းၵွင်ႈလူင်ၵွင်ႈဢွၼ်ႇ သႂ်ႇႁိူၼ်းယေးၵူၼ်းဝၢၼ်ႈမႆႇသွင်ၵူင်း တိူဝ်ႉၺႃး ၽႃႁိူၼ်း၊ လင်ၶႃး ၸိူဝ်းၼႆႉ ယွၵ်းပွင်ႇလူႉၵွႆ 2 လင် ၼႆယဝ်ႉ။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼႆႉ လမ်းလိမ်းယိုဝ်းၵွင်ႈၶဝ် သဵင်ပေႃး ပၼ်းလူင်ဝႆႉ။ ယွၼ်ႉသင်လႄႈ ယိုဝ်းတႄႉ ဢမ်ႇႁူႉ။ သဵင်ၵွင်ႈၼႆႉ တႅၵ်ႇမွၵ်ႈ 11 မူင်း တေႃႇထိုင်ၵၢင်ၶိုၼ်းလိုၵ်း 1 မူင်း။ ၶဝ်ယိုဝ်းၼမ်ဢေႃႈ ယိုဝ်းလၢႆၵမ်းတႄႉ ဢမ်ႇလႆႈၼပ်ႉၶႃႈ။ ဢၼ်မႃးတူၵ်းတႅၵ်ႇ ၼႂ်းဝၢၼ်ႈတႄႉ လုၵ်ႈလဵဝ်ၵူၺ်း။ တိူဝ်ႉၺႃး ႁိူၼ်းၵူၼ်းဝၢၼ်ႈ 2 လင်။ ၼႂ်းၼၼ်ႉ တိူဝ်ႉၺႃး ႁိူၼ်းမႄႈလုၵ်ႈဢွၼ်ႇ လူႉၵွႆလင်ၼိုင်ႈ ၸဵမ်ၶူဝ်းႁိူၼ်း ၽိူၼ်ဝၢၼ်ႇ ၸိူဝ်း ၼႆႉတႄႉ ဢမ်ႇမီးတီႈလီဢဝ်ယဝ်ႉ။ ယၢမ်းလဵဝ် ၸဵမ်မႄႈၸဝ်ႈႁိူၼ်းလႄႈ ႁူမ်ႈတင်း လုၵ်ႈဢွၼ်ႇလဵၵ်ႉ 2 ၵေႃႉတႄႉ လႆႈၵႂႃႇ ပိုင်ႈယူႇဝႆႉ တီႈၵျွင်းမုၼ်ၸဝ်ႈ ၸူဝ်ႈၶၢဝ်း” – ဝႃႈၼႆ။
ႁိူၼ်းမႄႈလုၵ်ႈဢွၼ်ႇ တီႈဝၢၼ်ႈမႆႇသွင်ၵူင်း ဢၼ်ၺႃးၸၢၵ်ႇမၢၵ်ႇသိုၵ်းမၢၼ်ႈသေ လူႉၵွႆၵႂႃႇၼၼ်ႉ။ ၼႂ်းမုင်ႉႁေႃႁိူၼ်း ၼၼ်ႉ မီး 4 ၵေႃႉ ပေႃႈမႄႈလုၵ်ႈ မီးဝႆႉလုၵ်ႈဢွၼ်ႇလဵၵ်ႉ ဢႃယု 5 လိူၼ် ၵေႃႉၼိုင်ႈ၊ ဢႃယု 4 ၶူပ်ႇ ၵေႃႉၼိုင်ႈလႄႈ တႃႇပေႃႈၸဝ်ႈႁိူၼ်းသမ်ႉ ဢွၵ်ႇတၢင်းၵႂႃႇႁဵတ်းၵၢၼ်ဝႆႉ တၢင်းဝဵင်းမူႇၸေႊ ၼႆယဝ်ႉ။
“ပေႃးပဵၼ်လႆႈတႄႉ ၶႂ်ႈႁႂ်ႈၶဝ် ၵိုတ်းလွင်ႈပိုတ်းယိုဝ်း ၸိူဝ်းၼႆႉပႅတ်ႈ ဝႆးဝႆးဢေႃႈ မိူဝ်ႈလဵဝ်ၼႆႉ ၵူၼ်းဝၢၼ်ႈ ၵႂႃႇႁဵတ်းၵၢၼ် ငၢၼ်းၵေႃႈ လႆႈၵူဝ်ႁႄသေ ၵႂႃႇႁဵတ်းလႄႈ သင်ဢမ်ႇၵႂႃႇႁဵတ်းၵၢၼ်ၵေႃႈ ဢမ်ႇမီးတႃႇၵိၼ်ယႅမ်ႉယဝ်ႉ ယၢပ်ႇၽိုတ်ႇၶႃႈ ဢေႃႈ။ ႁိူၼ်းယေး ဢၼ်ၺႃးၸၢၵ်ႇမၢၵ်ႇသိုၵ်းမၢၼ်ႈ တိူဝ်ႉသႂ်ႇ လႆႈလူႉၵွႆဝႆႉၼၼ်ႉ တေႃႇထိုင်ယၢမ်းလဵဝ် ပႆႇလႆႈႁပ်ႉၵႃႈသၢႆႈ တႅၼ်း လွင်ႈၵမ်ႉထႅမ်သင်”- ၵူၼ်းပိုၼ်ႉတီႈ ဝဵင်းၵူတ်းၶၢႆ သိုပ်ႇလၢတ်ႈၼႄၼင်ႇၼႆ။
ဝၢၼ်ႈမႆႇသွင်ၵူင်းၼႆႉ ယူႇၼႂ်းဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ပဵၼ်ဝၢၼ်ႈဢွၼ်ႇ မီးလင်ႁိူၼ်းမွၵ်ႈ 30 လင် ႁူဝ် ၵူၼ်း မီးဢမ်ႇယွမ်း 100 ၵမ်ႈၼမ် ၵူၼ်းဝၢၼ်ႈ ႁဵတ်းၵိၼ်ၵၢၼ်ၽုၵ်ႇသွမ်ႈသူၼ်ႁႆႈၼႃး ႁႃၵိၼ်လဵင်ႉတွင်ႉ ၼႆယဝ်ႉ။
မိူဝ်ႈဝၼ်းတီႈ 18/7/2023 ၼၼ်ႉၵေႃႈ သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈ ဢိူင်ႇၼမ်ႉၽၵ်းၵႃၼႆႉသေ ၾၢႆႇသိုၵ်းမၢၼ်ႈ ယိုဝ်းၵွင်ႈလူင် တူၵ်းသႂ်ႇၼႂ်းဝၢၼ်ႈ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလင် ၼိုင်ႈ ထုၵ်ႇၾႆးမႆႈ။ ယဝ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ မၢတ်ႇၸဵပ်း 4 ၵေႃႉ။ ၼႂ်းၼၼ်ႉ ၼုမ်ႇၸၢႆး ဢႃယု 16 ၵေႃႉၼိုင်ႈ လူႉတၢႆထင်တီႈ လိူဝ်ၼၼ်ႉ လႆႈသူင်ႇယူတ်းယႃတူဝ် ဝႆႉတီႈႁူင်းယႃဝဵင်းလိူဝ်ႇ ၼႆယဝ်ႉ။
