ၵႃးလမ်းၼိုင်ႈ ပဵၼ်ၽေးၵိုင်ႉၵၢင်ႉ ပိၼ်ႈၶွမ်ႈတူၵ်းတၢင်း ၼႂ်းၵႄႈ မိူင်းၽျၢၵ်ႈ – ၵဵင်းတုင် မီးၵူၼ်းမၢတ်ႇၸဵပ်းၸွမ်း 3 ၵေႃႉ ၼႂ်းၼၼ်ႉ တႃႇၵေႃႉၼိုင်ႈ လႆႈတိူဝ်ႉမၢတ်ႇၸဵပ်းႁႅင်း။
မိူဝ်ႈဝႃး ဝၼ်းတီႈ 25/7/2023 ယၢမ်းႁူဝ်ၶမ်ႈ 5 မူင်းၶိုင်ႈ ၵႃးလမ်းၼိုင်ႈ လုၵ်ႉတၢင်းမိူင်းယွင်းမႃး တေၵႂႃႇၵဵင်းတုင်ၼႆ သေ လႆဢဝ်ၵႃးပိၼ်ႈၶွမ်ႈ တူၵ်းတၢင်း တီႈ 28 လၵ်း ႁိမ်းဝၢၼ်ႈသူပ်းယွႆး ၼိူဝ်သဵၼ်ႈတၢင်းလူင် ၵဵင်းတုင် – မိူင်းၽျၢၵ်ႈ ၼႂ်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။
ၽူႈၶဝ်ႈၸုမ်းၸွႆႈထႅမ် ၶႅၵ်ႇလီပၢင်ၸႃႉ တႆးၼိူဝ် လၢတ်ႈတီႈၽူႈတွႆႇႁွၵ်ႈဝႃႈ – “ၵႃးၼႆႉ ၶဝ်လုၵ်ႉတၢင်းမိူင်းယွင်းမႃး တေ ဢၢၼ်ႈၵႂႃႇၵဵင်းတုင် ယွၼ်ႉၶဝ်တေႁေႃႈဝႆးသေ ဢမ်ႇၵုမ်းလႆႈတင်းဝႆးရူတ်ႉလႄႈ လႆႈဢဝ်ၵႃးၶဝ် ပိၼ်ႈငူပ်ႉၵႂႃႇ ပဵၼ်လၢႆ ၵမ်း ၶႃႈဢေႃႈ။ ၵႃးတႄႉ လူႉၵွႆၼမ်ဢေႃႈ။ ၼႂ်းၵႃးၼၼ်ႉ မီးၵူၼ်းၶီႇမႃးၸွမ်းၵၼ် 3 ၵေႃႉ ၼႂ်းၼၼ်ႉ လႆႈတိူဝ်ႉမၢတ်ႇ ၸဵပ်းႁၢဝ်ႈ ႁႅင်းၵေႃႉၼိုင်ႈ ထႅင်ႈ 2 ၵေႃႉတႄႉ လႆႈတိူဝ်ႉမၢတ်ႇၸဵပ်းၸွမ်းဢိတ်းဢွတ်း ဢမ်ႇထိုင်တီႈမႆႈၸႂ်ၶႃႈ”- ဝႃႈၼႆ။
ၵူၼ်းၶီႇမႃးၸွမ်းၼႂ်းၵႃးၼၼ်ႉ ပဵၼ်ၽူႈၸၢႆး တင်းသၢမ် ဢႃယုသႅၼ်းပၢၼ် တေမီးၼႂ်းၵႄႈ 30 – 40 ပီၼႆႉ ယၢမ်းလဵဝ် ၸုမ်းၸွႆႈထႅမ် ၶႅၵ်ႇလီပၢင်ၸႃႉ တႆးၼိူဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃလူင် ၵဵင်းတုင် မူတ်းယဝ်ႉ။
“တီႈ 28 လၵ်း ႁိမ်းဝၢၼ်ႈသူပ်းယွႆးၼၼ်ႉ ဢမ်ႇသူႈယၢမ်ႈပဵၼ်ၽေးၵိုင်ႉၵၢင်ႉသင်မႃးၶႃႈ ယၢမ်းလဵဝ်ၼႆႉ ပဵၼ်ၶၢဝ်း ၾူၼ်လႄႈ သဵၼ်ႈတၢင်းတေမိုၼ်ႈၵေႃႈ ပိူင်ၼိုင်ႈ၊ ၶဝ်ႁေႃႈဝႆးၵေႃႈ ပိူင်ၼိုင်ႈ ၵွပ်ႈၼႆလႄႈ ၶဝ်တေဢမ်ႇၵုမ်းလႆႈႁႅင်းရူတ်ႉသေ ပိၼ်ႈၶွမ်ႈၵႂႃႇ ၵၢမ်ႇလီၶႃႈဢေႃႈ ဢမ်ႇထိုင်တၢႆ” – ၽူႈၶဝ်ႈၸုမ်းၸွႆႈထႅမ် ၶႅၵ်ႇလီပၢင်ၸႃႉ တႆးၼိူဝ် သိုပ်ႇလၢတ်ႈ ၼင်ႇၼႆ။
ၼႂ်းဝၼ်းတီႈ 25 ၼႆႉၵူၺ်းၼင်ႇၵဝ်ႇ ယၢမ်းႁူဝ်ၶမ်ႈ 6 မူင်းပၢႆ ၵႃးလမ်းၼိုင်ႈ ပဵၼ်ၽေးၵိုင်ႉၵၢင်ႉ ပိၼ်ႈၶွမ်ႈ တီႈႁိမ်းတူဝ်းလ်ၵဵတ်ႉ ၼိူဝ်သဵၼ်ႈတၢင်းလူင် သႅၼ်ဝီ – ၵူတ်ႉၶၢႆ ၼၼ်ႉၵေႃႈ မီးၵူၼ်းမၢတ်ႇၸဵပ်း ႁၢဝ်ႈႁႅင်းၸွမ်းၵေႃႉၼိုင်ႈ။
မိူဝ်ႈဝၼ်းတီႈ 19/7/2023 ပူၼ်ႉမႃးၼၼ်ႉၵေႃႈ ၵႃးလမ်းၼိုင်ႈၽႃႇၺႃး ၵူၼ်းၵိၼ်ၼွၼ်းၸွမ်းၶၢင်ႈတၢင်း 3 ၵေႃႉ တီႈ တၢင်းၶဝ်ႈ ဝဵင်းတႃႈၶီႈလဵၵ်း ႁိမ်းၵွင်းပိဝ်ႇႁႃႇ ၼၼ်ႉၵေႃႈ မၢတ်ႇၸဵပ်းႁၢဝ်ႈႁႅင်း 1 ၵေႃႉ တၢႆ 2 ၵေႃႉ။ ၵူၼ်းႁေႃႈၵႃးတႄႉ ပၢႆႈ လွတ်ႈဝႆႉ ၼႆယဝ်ႉ။
