သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပိုတ်းယိုဝ်းၵၼ် တီႈဝဵင်းမူႇၸေႊ ၾၢႆႇသိုၵ်းမၢၼ်ႈ ယိုဝ်းၵွင်ႈလူင် ၸႂ်ႉ ၶိူင်ႈမိၼ်ယိုဝ်းၸွႆႈ ႁၢဝ်ႈႁႅင်း ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း လႆႈလူႉတၢႆ 2 ၵေႃႉ မၢတ်ႇၸဵပ်း 3 ၵေႃႉ။

ဝၼ်းတီႈ 25/7/2023 ယၢမ်းၵၢင်ၼႂ် ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်ပၵ်းဝႆႉတီႈ 105 လၵ်းတင်း ၼမ်ႉၽၵ်းၵႃ ၼၼ်ႉ ယိုဝ်းၵွင်ႈလူင် ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ တၢင်းဝၢၼ်ႈၼမ်ႉဢုမ်၊ မၢၼ်ႈႁွင်းလႄႈ ဝၢၼ်ႈသၢႆးၶၢဝ် ၼႂ်းၸႄႈဝဵင်းမူႇၸေႊ ၸိုင်ႈ တႆးပွတ်းႁွင်ႇ လႅၼ်လိၼ်တႆး – ၶႄႇ ႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ၸႂ်ႉမၢၵ်ႇလူင် ၸႂ်ႉၶိူင်ႈမိၼ်ယိုဝ်းၸွႆႈသေ မၢၵ်ႇလူင် တူၵ်းသႂ်ႇႁိူၼ်းၵူၼ်းဝၢၼ်ႈသၢႆၶၢဝ်း လူႉတၢႆထင်တီႈၵေႃႉၼိုင်ႈ။ ယဝ်ႉၵေႃႈ မႄႈပႃႈ ၵေႃႉၼိုင်ႈ ဝၢၼ်ႈသၢႆးၶၢဝ် တိူဝ်ႉၺႃးၸၢၵ်ႇ မၢၵ်ႇသေ လႆႈလူႉတၢႆထႅင်ႈၵေႃႉၼိုင်ႈ။ လိူဝ်ၼၼ်ႉ ၵူၼ်းဝၢၼ်ႈသၢႆးၶၢဝ် တိူဝ်ႉၺႃးၸၢၵ်ႇမၢၵ်ႇၸွမ်း ႁၢဝ်ႈႁႅင်းထႅင်ႈ 3 ၵေႃႉ ၼၼ်ႉတႄႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃယဝ်ႉ။ ၼွၵ်ႈလိူဝ်ၼၼ်ႉ ၵူၼ်းၼုမ်ႇၸၢဝ်းလွႆ 2 ၵေႃႉ ထုၵ်ႇသိုၵ်းမၢၼ်ႈ ယိုဝ်း တၢႆ ႁိမ်းဝၢၼ်ႈၵွင်းဝဵင်း ယွၼ်ႉႁၼ်ၶဝ်ယိပ်းၵွင်ႈၵႅတ်ႉသ်ၼႆဝႃႇ ပေႃးႁူမ်ႈၵၼ်တင်းမူတ်း တၢႆ 4 မၢတ်ႇ 3 ၶႃႈဢေႃႈ”- ဝႃႈၼႆ။

သိုၵ်းတဢၢင်း TNLA ၼႆႉသမ်ႉ မူၵ်းယူႇဝႆႉ တီႈဝၢၼ်ႈသၢႆးၶၢဝ်၊ ဝၢၼ်ႈၵွင်းဝဵင်းလႄႈ တီႈလွႆၵႅၼ်း ၸိူဝ်းၼႆႉသေ သိုၵ်းမၢၼ်ႈ ဢဝ်ၶိူင်ႈမိၼ်လမ်းၼိုင်ႈ မႃးယိုဝ်းၸွႆႈ ပွႆႇမၢၵ်ႇသႂ်ႇ ၸွမ်းႁိမ်းႁွမ်း ၸိူဝ်းၼၼ်ႉ ႁၢဝ်ႈႁႅင်း။

“ဝၢႆးၶိူင်ႈမိၼ်သိုၵ်းမၢၼ်ႈ မိူဝ်းၵႂႃႇယဝ်ႉ ၶဝ်ၶိုၼ်းဢဝ်မၢၵ်ႇလူင် ပွႆႇသႂ်ႇၵၼ်ထႅင်ႈၵမ်ႉ သိုၵ်းတဢၢင်းသမ်ႉ ၶဝ်ႈမႃးၼႂ်းဝၢၼ်ႈၵွင်း ဝဵင်းသေ သိုၵ်းမၢၼ်ႈ ၸွမ်းၶဝ်ႈၵူတ်ႇထတ်း တီႉၺွပ်းလႆႈ ဢွၼ်ႇၸၢႆးၼုမ်ႇ ၸၢဝ်းတႆး ၼႂ်းဝၢၼ်ႈၵွင်းဝဵင်း ၼၼ်ႉၵႂႃႇ 4 ၵေႃႉ ယဝ်ႉၵေႃႈ ၵူၼ်းၼုမ်ႇၸၢဝ်းတဢၢင်းထႅင်ႈ လၢႆၵေႃႉ သိုၵ်းမၢၼ်ႈတီႉၺွပ်းၵႂႃႇၸႅတ်ႈထၢမ် တၢင်းဝၢၼ်ႈၼမ်ႉဢုမ်ပုၼ်ႉၶႃႈဢေႃႈ တေႃႇထိုင်ယၢမ်းလဵဝ် ပႆႇပွႆႇတူဝ်”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ပၢင်တိုၵ်းသိုၵ်းမၢၼ်ႈတင်း သိုၵ်းတဢၢင်း TNLA ၼႆႉ တႄႇဢဝ် ဝၼ်းတီႈ 24 ယၢမ်းၵၢင်ၶိုၼ်း 11:30 မူင်း တေႃႇထိုင် ဝၼ်း တီႈ 25 ယၢမ်းၵၢင်ၼႂ် 5 မူင်း သိုၵ်းမၢၼ်ႈ ၸႂ်ႉၵွင်ႈလူင် ယိုဝ်းသႂ်ႇႁၢဝ်ႈႁႅင်း ဝၢႆးၼၼ်ႉ ၸႂ်ႉၶိူင်ႈမိၼ်ယိုဝ်းၸွႆႈထႅင်ႈ ၸၢၵ်ႇမၢၵ်ႇ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလႄႈ ၼႂ်းၵၢတ်ႇၼမ်ႉဢုမ် ၸိူဝ်းၼႆႉ လူႉၵွႆၸွမ်းတင်းၼမ် ၼႆယဝ်ႉ။

ၵဵဝ်ႇၵပ်းလွင်ႈၼႆႉ ယွၼ်ႉသိုၵ်းတဢၢင်း TNLA ၶဝ်ႈယူႇထင်သဝ်းၸွမ်း ႁိူၼ်းၵူၼ်းဝၢၼ်ႈ၊ ၵမ်ႈၽွင်ႈ ပႂ်ႉၵဵပ်းၶွၼ်ႇရူတ်ႉၵႃး လႄႈ ၵူၼ်းၵႂႃႇမႃးၸွမ်း သဵၼ်ႈတႃႈသၢႆတၢင်း။ ထုင်ႉတၢင်းသိုၵ်း TNLA  တူင်ႉၼိုင်ယူႇသဝ်းၼၼ်ႉသမ်ႉမီး သိုၵ်းမၢၼ်ႈတူင်ႉ ၼိုင်ႈၵႂႃႇမႃးလႄႈ ၵွပ်ႈၼႆ တင်းသွင်ၾၢႆႇ ၸင်ႇမီးလွင်ႈတုမ်ႉတိူဝ်ႉ ပိုတ်းယိုဝ်းၵၼ် မႃးႁၢဝ်ႈႁႅင်း ၼႆယဝ်ႉ။