ၽူႈမီးၸၼ်ႉ ၼႂ်းတပ်ႉသိုၵ်းမၢၼ်ႈယိုတ်းမိူင်း တီႈၸႄႈဝဵင်းၵူတ်ႉၶၢႆ မီးလွင်ႈပိုတ်းယိုဝ်းၵၼ်ၶိုၼ်း။
မိူဝ်ႈဝႃး ဝၼ်းတီႈ 23/7/2023 ၼႆႉ ၽူႈမီးၸၼ်ႉ ၼႂ်းတပ်ႉသိုၵ်းမၢၼ်ႈ တီႈၸႄႈဝဵင်းၵူတ်ႉၶၢႆ ၵိၼ်လဝ်ႈၵုမ်းၵၼ်သေ ၽိတ်းမေႃးၵၼ် ထိုင်တီႈ ပိုတ်းယိုဝ်းၵၼ်ၶိုၼ်း ။
ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်ၵိၼ်လဝ်ႈၵုမ်းၵၼ် ၊ လုၵ်ႈသိုၵ်းၵေႃႉၼိုင်ႈသမ်ႉ ၵႂႃႇယဵပ်ႇၺႃးတိၼ် ဢၼ်ၶႃၵိၼ်လဝ်ႈၸွမ်းၵၼ်ၼၼ်ႉၵေႃႉၼိုင်ႈ။ႁဵတ်းၼၼ်သေ ၽိတ်းမေႃးၵၼ် ထိုင်တီႈလၢၵ်ႈၵွင်ႈ ယိုဝ်းၵၼ် ။ ၵေႃႉၼိုင်ႈၺႃးယိုဝ်းတီႈတိၼ်မၼ်း ” – ဝႃႈၼႆ။
ၵေႃႉၺႃးယိုဝ်းၼႆႉ လုပ်ႇၶႃႁၢၵ်းသေ ယူတ်းယႃတူဝ်ဝႆႉ တီႈႁူင်းယႃ ။ ၵေႃႉပူၼ်ႉပႅၼ်ၼၼ်ႉၵေႃႈ မီးလွင်ႈတီႉၺွပ်းၵုမ်းၶင်ဝႆႉ ပႆႇပၼ်ထူပ်းၵၼ်တင်း ၵူၼ်းႁိူၼ်း မၼ်းဝႃႈၼႆ။
တီႈၵူတ်ႉၶၢႆၼႆႉ ၸုမ်းသိုၵ်းမၢၼ်ႈ ၵႆႉလၢမ်းလိမ်း ယိုဝ်း ၵွင်ႈဢွၼ်ႇ ၵွင်ႈလူင် သႂ်ႇၼႂ်းမိူင်းလႄႈ ၵူၼ်းမိူင်းမၢတ်ႇၸဵပ်း လူႉတၢႆၵေႃႈယၢမ်ႈမီး။
မိူဝ်ႈဝၼ်းတီႈ 16/7/2023 ၼၼ်ႉ သိုၵ်းမၢၼ်ႈယိုတ်းမိူင်း ၼမ်းၼႃႈသိုၵ်း မႃးထိုင်တီႈႁိမ်းဝၢၼ်ႈၶူဝ်မုင်း ၸႄႈဝဵင်းၵူတ်ႇၶၢႆၼၼ်ႉသေ တုမ်ႉၺႃး ၸုမ်းသိုၵ်းၶၢင် KIA လႆႈပဵၼ်ပၢင်တိုၵ်းၵၼ် ။ ထိုင်မႃးဝၼ်းတီႈ 18/7/2023 ၼၼ်ႉၵေႃႈ သိုၵ်းမၢၼ်ႈတင်းသိုၵ်းၶၢင် KIO/KIA ပဵၼ်ပၢင်တိုၵ်းၵၼ်သေ ၾၢႆႇသိုၵ်းမၢၼ်ႈ တင်ႈၸႂ်ယိုဝ်းၵွင်ႈလူင်သႂ်ႇဝၢၼ်ႈလႄႈ ၾႆးမႆႈႁိူၼ်းလူႉၵွႆလင်ၼိုင်ႈ ၊ ၵူၼ်းမိူင်း တၢႆ 1 မၢတ်ႇ 4 ၵေႃႉ။