သိုၵ်းမၢၼ်ႈ တင်ႈၸႂ်ဝၢႆႇပၢၵ်ႇၵွင်ႈယိုဝ်းသႂ်ႇဝၢၼ်ႈလႄႈ ၵူၼ်းမိူင်းၼႂ်းၸႄႈဝဵင်းၵူတ်ႉၶၢႆ မီးလွင်ႈမၢတ်ႇၸဵပ်းလူႉတၢႆ ။
မိူဝ်ႈဝႃး ဝၼ်းတီႈ 18/7/2023 ႁူဝ်ၶမ်ႈ 4 မူင်းၼၼ်ႉ သိုၵ်းမၢၼ်ႈတင်းသိုၵ်းၶၢင် KIO/KIA ပဵၼ်ပၢင်တိုၵ်းၵၼ်သေ ၾၢႆႇသိုၵ်းမၢၼ်ႈ တင်ႈၸႂ်ယိုဝ်းၵွင်ႈလူင်သႂ်ႇဝၢၼ်ႈလႄႈ ၾႆးမႆႈႁိူၼ်းလူႉၵွႆလင်ၼိုင်ႈ ၊ ၵူၼ်းမိူင်း တၢႆ 1 မၢတ်ႇ 4 ၵေႃႉ ။
ၵူၼ်းၼႂ်းၸႄႈဝဵင်းၵူတ်ႉၶၢႆၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်း ပဵၼ်ၵႂႃႇမွၵ်ႈ 2 ၸူဝ်ႈမူင်း။မိူဝ်ႈမွၵ်ႈ 6 မူင်းႁူဝ်ၶမ်ႈၼၼ်ႉ သိုၵ်းမၢၼ်ႈ တပ်ႉၶလယ 123 ယိုဝ်းၵွင်ႈလူင် သႂ်ႇၼႂ်းဢိူင်ႇၼမ်ႉၽၵ်းၵႃလႄႈ တိူဝ်ႉမႅၼ်ႈႁိူၼ်း လင်ၼိုင်ႈ ၾႆးမႆႈလူႉၵွႆၵႂႃႇပႅတ်ႈ ” – ဝႃႈၼႆ။
ၼႂ်းႁိူၼ်းဢၼ်ၺႃးမၢၵ်ႇသိုၵ်းမၢၼ်ႈတူၵ်းသႂ်ႇၼၼ်ႉ မီးၵူၼ်းပၢႆႈသွၼ်ႈယူႇသဝ်းဝႆႉ 5 ၵေႃႉ တိူဝ်ႉၸၢၵ်ႇမၢၵ်ႇမၢတ်ႇၸဵပ်းႁၢဝ်ႈႁႅင်းသေ တၢႆ ၵေႃႉၼိုင်ႈၼႆယဝ်ႉ။
ဢိင်ၼိူဝ်လွင်ႈၼႆႉ ၼၢင်းယိင်း ၵူၼ်းၼမ်ႉၽၵ်းၵႃၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းႁိူၼ်းၼၼ်ႉ တင်းသဵင်ႈဢၼ်တိူဝ်ႉၸၢၵ်ႇမၢၵ်ႇၼႆႉ မီး 5 ၵေႃႉ။ၵေႃႉၼိုင်ႈတႄႉ မၢတ်ႇၸဵပ်းလိူဝ်ႁႅင်းသေ ၵႂႃႇတၢႆတီႈႁူင်းယႃ ” – ဝႃႈၼႆ။
ၵေႃႉဢၼ်လူႉတၢႆၼႆႉ ၸိုဝ်ႈမွင်ႇၽွင်ႇယမ်ၼေႃႇ ဢႃယု 17 ပီ ။ ၵူၼ်းမၢတ်ႇၸဵပ်းမီးလၢႆလၢႆၵေႃႉ ၼႂ်းၼၼ်ႉ တေႃႇၵတူဝ်း ဢႃယု 47 ၊ မွင်ႇၽရၢၼ်ႇၸိတ်ႉ ဢႃယု 16 ၊ မွင်ႇၽရၢၼ်ႇသၢၼ်ႇ ဢႃယု 9 ၶူပ်ႇ လႄႈ မေႇရီႇသၢႆး ၸဵမ်ၸိူဝ်းၼႆႉ။
ၸဝ်ႈသိုၵ်းလူင်ၼေႃႇပူႇ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၶမ်ႈဝႃး 4 မူင်းၼၼ်ႉ ၸုမ်းႁဝ်းယိုတ်းသိမ်းလႆႈ တပ်ႉပၢင်သဝ်းသိုၵ်းမၢၼ်ႈဢၼ်ၼိုင်ႈ တီႈၼမ်ႉၽၵ်းၵႃ ။ ၼႂ်းၼၼ်ႉ တေမီးၵူၼ်း သၢမ်သီႇၵေႃႉၵူၺ်း ” – ဝႃႈၼႆ။
ၼႂ်းလိူၼ်ၵျူႊလၢႆႊၼႆႉ သိုၵ်းမၢၼ်ႈတင်းသိုၵ်းၶၢင် ပဵၼ်ပၢင်တိုၵ်း ၾၢႆႇတၢင်းၸိုင်ႈတႆးပွတ်းႁွင်ႇမႃး ၶိူဝ်းယႂ်း ။ လိူဝ်ၼၼ်ႉ တီႈႁိမ်းတပ်ႉငဝ်ႈငုၼ်း KIO/KIA တီႈလၢႆႊၸႃႊၼၼ်ႉၵေႃႈ သိုၵ်းမၢၼ်ႈတင်းသိုၵ်းၶၢင် KIA ၵႆႉပိုတ်းယိုဝ်းၵၼ်။
