PNLO ယွၼ်းငိုၼ်းၵဵပ်းၶွၼ်ႇလိူဝ်ႁႅင်းလႄႈ ၵူၼ်းမိူင်းသီႇသႅင်ႇၵမ်ႈၽွင်ႈ ပေႃးလႆႈလႄႇႁႃၵူႈသၢႆႉယိုမ်ၶႂႃသေသူင်ႇပၼ် ဝႃႈၼႆ။

မိူဝ်ႈဝၼ်းတီႈ 15/7/2023 ပူၼ်ႉမႃးၼႆႉ ၵူၼ်းဝၢၼ်ႈၸိူဝ်းယူႇ ၾၢႆႇဢွၵ်ႇၸႄႈဝဵင်းသီႇသႅင်ႇ ၺႃးသိုၵ်းပဢူဝ်း PNLO တဵၵ်းယွၼ်းငိုၼ်း ၵႃးၼိုင်ႈလမ်းလႂ် 2 သႅၼ် ၊ ထေႃႈၼိုင်ႈလမ်းလႂ် 1 သႅၼ်  ဢမ်ႇပၼ်ဢမ်ႇလႆႈၼႆမႃးလႄႈ  မၢင်ၸိူဝ်း ဢမ်ႇမီးငိုၼ်းတွင်း  ပေႃးလႆႈလႄႇႁႃၵူႈယိုမ်သေပၼ် ဝႃႈၼႆ ။

ၵူၼ်းသီႇသႅင်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵႃးၵေႃႈ 2 သႅၼ်ၼႆၵေႃႈ တိုၼ်းဝႃႈ 2 သႅၼ်ၵူၺ်း ၶဝ်တိုၼ်းဢမ်ႇယွမ်းသေပျႃး ။ ထေႃႈ ၵေႃႈ ၼိုင်ႈသႅၼ်ၼႆ တိုၼ်းဝႃႈ ဢမ်ႇယွမ်းပၼ်လႃးလႃး။ယွၼ်းၼွမ်းၶဝ်သေ ၸူၵ်းပၼ် 5 မိုၼ်ႇၵေႃႈ ၶဝ်ဢမ်ႇၽွမ်ႉ။မိူဝ်ႈလဵဝ် ဢမ်ႇမီးသင်ပၼ်လႄႈ ပေႃးလႆႈ ၵႂႃႇၵူႈယိမ်ပိူၼ်ႈမႃးပၼ်ဢေႃႈ ” – ဝႃႈၼႆ။

ယွၼ်ႉဢမ်ႇပၼ်ဢမ်ႇလႆႈၼႆလႄႈ ၵူၼ်းဝၢၼ်ႈၵမ်ႈၽွင်ႈ လႆႈၵူႈယိမ်ငိုၼ်းသေပၼ် လိူဝ်ၼၼ်ႉ လႆႈၸၢႆႇပႃးၶီႈမၼ်းလႄႈ ဢွၼ်ၵၼ်ယၢပ်ႇၽိုတ်ႇဝႆႉ ႁင်းၽႂ်မၼ်း။

ဢိင်ၼိူဝ်လွင်ႈၼႆႉ ၶုၼ်ဢူၵ်ႉၵႃႇ လၢတ်ႈတီႈၽူႈတွႆႇႁွၵ်ႈ မိူဝ်ႈဝၼ်းတီႈ 11 ၼၼ်ႉဝႃႈ – “ ၾၢႆႇတၢင်း သီႇသႅင်ႇၼႆႉ မီးၸုမ်း PNO/PNA ၶဝ်တူင်ႉၼိုင်ဝႆႉ ။ ၵူၼ်းႁဝ်းတႄႉ ဢမ်ႇပေႃးၵႂႃႇတၢင်းပုၼ်ႉ။ၸုမ်းႁဝ်းၼႆႉ တေတူင်ႉၼိုင် ၾၢႆႇမွၵ်ႇမႆႇၼႆႉ ၵမ်ႈၼမ်။ဢၼ်ၵဵပ်းငိုၼ်းၵူၼ်းမိူင်း မိူဝ်ႈလဵဝ်ၼႆႉ တေမီးလွင်ႈထၢင်ႇၽိတ်းၵၼ်ၽွင်ႈ ၸင်ႇႁၼ်ၵူၼ်းမိူင်းမႃး တိူင်ႇလၢတ်ႈဝႆႉ ၵေႃႈမီးယူႇ” – ဝႃႈၼႆ။

ဝၢၼ်ႈဢၼ်ၺႃး သိုၵ်းပဢူဝ်းသင်ႇႁႂ်ႈပၼ်ၶွၼ်ႇၼႆႉ မီးမွၵ်ႈ 20 ဝၢၼ်ႈၼႆႉသေ ၼႂ်းၼၼ်ႉပႃး ဝၢၼ်ႈလူင်ၸၢမ် ၊ ၼွင်ဝူဝ် ၊ ၼွင်ၵႅဝ်း ၸဵမ်ၸိူဝ်းၼႆႉ။