ၶၢဝ်းတၢင်း 7 လိူၼ်မႃးၼႆႉ ရူတ်ႉၶိူင်ႈၵူၼ်းမိူင်းၵဵင်းတွင်းႁၢႆ ဢမ်ႇယွမ်း 3 လမ်းယဝ်ႉ ၸူဝ်ႈသိုၵ်းမၢၼ်ႈ ယိုတ်းမိူင်းမႃး ၼႆႉ ႁဵတ်း ႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်။
ႁူဝ်လိူၼ်ၵျုႊလၢႆႊ 2023 ၼႆႉ ရူတ်ႉၶိူင်ႈ ပႃႈၼွတ်း ဝၢၼ်ႈၵုၼ်ၼႃး ပွၵ်ႉ 3 ဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ႁၢႆလမ်းၼိုင်ႈ ၽွင်းၵိုတ်းဝႆႉ တီႈၼႂ်းဝၢင်းႁိူၼ်း၊ ပဵၼ်ရူတ်ႉၶိူင်ႈမိူင်းၶႄႇ တေတူၵ်းမႅၼ်ႈငိုၼ်းယူႇ 7 သႅၼ်ပျႃး ။
ၵူၼ်းပိုၼ်ႉတီႈ ဝဵင်းၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းလၵ်ႉၶဝ်ႈႁိူၼ်း မႄႈပႃႈၼွတ်း ဝၢၼ်ႈၵုၼ်ၼႃးသေ ၶဝ်ႈမႃး လၵ်ႉဢဝ်ရူတ်ႉၶိူင်ႈ ၶဝ်ၵႂႃႇလမ်းၼိုင်ႈ။ ရူတ်ႉၶိူင်ႈၼၼ်ႉ ၵိုတ်းဝႆႉၼႂ်းဝၢင်းႁိူၼ်း ၵူၼ်းလၵ်ႉၼၼ်ႉ တၼ်းၶဝ်ႈဝၢင်းမႃးမိူဝ်ႈလႂ် ဢမ်ႇ ႁူႉ။ တၼ်းလၵ်ႉဢဝ်ၵႂႃႇ ရူတ်ႉၶိူင်ႈၼၼ်ႉ မိူဝ်ႈလႂ်ၵေႃႈ ဢမ်ႇႁူႉ ၽိူဝ်ႇၸဝ်ႈႁိူၼ်း လူဝ်ႇၸႂ်ႉရူတ်ႉမႃး ရူတ်ႉၶိူင်ႈၼၼ်ႉ ဢမ်ႇမီးယဝ်ႉ ”- ဝႃႈၼႆ။
ဝဵင်းၵဵင်းတွင်းၼႆႉ တင်းမူတ်းမီး 7 ပွၵ်ႉ 3 ဢိူင်ႇ ႁူဝ်ၵူၼ်းမီး 8,000 ပၢႆ ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီပၢႆၼႆႉ ပၢင်တေႃႇလွင်း ၼႂ်းမိူင်းတႆး ယိုင်ႈၶႅၼ်း လိူင်ႇၼမ်ႁႅင်း သိုၵ်းမၢၼ်ႈ ပၼ်ၶႂၢင်ႉၸတ်းႁဵတ်း ထၢင်ႇႁၢင်လွတ်ႈလႅဝ်း ၸွမ်းၼင်ႇပွႆးလၢမ်းၾိင်ႈႁိၵ်ႈႁွႆး(ၶႅၵ်ႇလီပၢင်ၸႃႉ) ၸိူဝ်းၼႆႉ ႁဵတ်း ႁႂ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း။
ပူၼ်ႉမႃး မိူဝ်ႈဝၼ်းတီႈ 11/7/2023 ယၢမ်းၶမ်ႈ 7 မူင်းၼၼ်ႉ ၽူႈလၵ်ႉၸၵ်ႉၶုတ်ႈ 4 ၵေႃႉ ၶီႇရူတ်ႉၶိူင်ႈမႃးၸွမ်းၵၼ် ၸူၼ်ရူတ်ႉၶိူင်ႈ ထဝ်ႈၸၢႆး ဢႃယုမွၵ်ႈ 60 ပီ တီႈပွၵ်ႉ 10 ဝဵင်းလႃႈသဵဝ်ႈ မၼ်းၸၢႆးထုၵ်ႇ ၽူႈလၵ်ႉ ဢဝ်မိတ်းၽၼ်းသႂ်ႇ လႆႈမၢတ်ႇၸဵပ်း ႁၢဝ်ႈႁႅင်းသေ လႆႈသူင်ႇယူတ်းယႃတီႈႁူင်းယႃလူင် ၼႆယဝ်ႉ။
