ၼၢင်းယိင်းၵူၼ်းမူႇၸေႊၵေႃႉၼိုင်ႈ ၺႃးပေႃႉ မၢတ်ႇၸဵပ်းႁၢဝ်ႈႁႅင်းသေတၢႆၵိုၵ်းႁိူၼ်း ။

မၼ်းၼၢင်းယူႇႁိမ်းသူၼ်မွၵ်ႇ (ထွယ် ပန်းခြံ) ၼႂ်းပွၵ်ႉၸၢၵ်ႈ ၸႄႈဝဵင်းမူႇၸေႊ၊ မီးၵူၼ်းၶဝ်ႈမႃးပေႃႉမၼ်းၼၢင်းထိုင်ၼႂ်းႁိူၼ်း တိူဝ်ႉတီႈႁူဝ် တၢႆထင်တီႈ။

ၸုမ်းၸွႆႈတူင်ႇဝူင်းၵူၼ်းဝဵင်းမူႇၸေႊ(နှလုံးလှလူမှုကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ –  “ၵူၼ်းႁိူၼ်းမၼ်း တိူင်ႇလၢတ်ႈဝႆႉ တီႈပလိၵ်ႈသေ ၸင်ႇလၢတ်ႈၸုမ်းႁဝ်းမႃး။ မိူဝ်ႈၵႂႃႇထိုင်ႁိူၼ်းၼၼ်ႉ လႆႈႁၼ် တူဝ်တၢႆ ဢိူၵ်ႇလိူတ်ႈ ဝႆႉယူႇ။ ၵွၵ်းႁူဝ်မၼ်းၵေႃႈ လႅဝ်ၽႅဝ်ႉ။ ႁိမ်းၼၼ်ႉ လႆႈႁၼ်မီးဝႆႉ ၶွၼ်ႉလဵၵ်းဝႆႉ ဢၼ်ၼိုင်ႈ။ ဢဝ်ဢၼ်ၼၼ်ႉသေ ပေႃႉႁိုဝ်ၼႆ ဢွၼ်ၵၼ်ဝူၼ်ႉၼင်ႇၼႆ ” – ဝႃႈၼႆ။

ပဵၼ်ၽႂ်ၶဝ်ႈမႃးပေႃႉမၼ်းၼၢင်းတႄႉဢမ်ႇႁူႉ ၽႂ်ၵေႃႈဢမ်ႇႁၼ်ၸွမ်း။ ပလိၵ်ႈတႄႉ ဝူၼ်ႉဝႃႈပဵၼ်ၽူဝ်ၵဝ်ႇမၼ်းၼၢင်းၼႆသေ ႁွင်ႉထဵတ်ႈထၢမ်ဝႆႉယူႇဝႃႈၼႆ။

ၵူၼ်းမူႇၸေႊၵေႃႉၼိုင်ႈလၢတ်ႈတီႈတွႆႇၽူႈႁွၵ်ႈဝႃႈ – “ မိူဝ်ႈလဵဝ် တီႈမူႇၸေႊၼႆႉ လႆႈဝႆႉသတိ ဝိရိယသေ ၵႂႃႇမႃး။ပေႃးဢွၵ်ႇၵၢင်ၶမ်ႈၵၢင်ၶိုၼ်း ဢမ်ႇထုၵ်ႇလီဢွၵ်ႇၵေႃႉလဵဝ် ။ယဝ်ႉၵေႃႈ တီႈလပ်ႉလပ်ႉ မိူၼ်ၼင်ႇၵႆၵူၼ်း တီႈလပ်းသိင်ႇၸိူဝ်းၼၼ်ႉ ဢမ်ႇထုၵ်ႇလီၵႂႃႇ။မိူဝ်ႈလဵဝ် ပေႃးၶီႇလူတ်ႉၶိူင်ႈမႂ်ႇမႂ်ႇၼႆ လႆႈၵူဝ်ပႃး ၵူၼ်းၸူၼ်ၶဝ်ထႅင်ႈၵွၼ်ႇ “ – ဝႃႈၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ၼႆႉ ၼႂ်းမိူင်းတႆး ၵမ်ႈၼမ် မီးၽူႈလၵ်ႉၸၵ်ႉၶုတ်ႈလိူင်ႇ ၶီႈယႃႈၶီႈၾိၼ်ႇၼမ် မိူၼ်ၼင်ႇတီႈလႃႈသဵဝ်ႈၼၼ်ႉၵေႃႈ ၼႂ်းၶၢဝ်းတၢင်းၼိုင်ႈလိူၼ်ၵူၺ်း ၵူၼ်းၺႃးၽၼ်း မီး 2 ၵေႃႉ ။