ပလိၵ်ႈမၢၼ်ႈ ၾၢႆႇၵုမ်းထိင်းရူတ်ႉၵႃး (မႃႇတေႃႇပီႇၵေႇ) တီႈဝဵင်းၵဵင်းတုင် ပႂ်ႉၵူတ်ႇထတ်းရူတ်ႉၶိူင်ႈ – ၵႃးၵူၼ်းမိူင်းႁၢဝ်ႈ ႁႅင်း သင်ရူတ်ႉၵႃး ဢမ်ႇမီးဝႂ်ၶွၼ်ႇ ဢမ်ႇမီးဝႂ်ၶပ်းၶီႇ(ႁေႃႈရူတ်ႉ) ၸိုင် ပၢႆလွၵ်ႈငိုတ်ႈယွၼ်းငိုၼ်းၼပ်ႉသႅၼ်။

တႄႇဢဝ် ႁူဝ်လိူၼ်ၵျုႊလၢႆႊ 2023 ၼႆႉမႃး ပလိၵ်ႈမၢၼ်ႈ ၾၢႆႇၵုမ်းထိင်းရူတ်ႉၵႃး တႂ်ႈသိုၵ်းမၢၼ်ႈ ယိုတ်းမိူင်း ၵုမ်းၵမ် ပႂ်ႉၵူတ်ႇထတ်း ရူတ်ႉၶိူင်ႈ – ၵႃး ၵူၼ်းပိုၼ်ႉတီႈ ၸွမ်းတၢင်းၶဝ်ႈဢွၵ်ႇဝဵင်း၊ ၵၢင်ဝဵင်း ၼႂ်းဝဵင်းၵဵင်းတုင် ၸိုင်ႈတႆး ပွတ်း ဢွၵ်ႇၶူင်း ႁဵတ်းႁႂ်ႈၵူၼ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ လွင်ႈၵႂႃႇမႃး ႁၢဝ်ႈႁႅင်း။  

ၵူၼ်းပိုၼ်ႉတီႈ ဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ ပလိၵ်ႈၶဝ်ၼႆႉ တေပႂ်ႉၵူတ်ႉထတ်းဝႆႉ တၢင်းၶဝ်ႈဢွၵ်ႇဝဵင်းလႄႈ ၼႂ်းၵၢင်ဝဵင်း ၸိူဝ်းၼႆႉ။ ဢၼ်ၶဝ်ၵူတ်ႇထတ်းၼႆႉ တေယွၼ်းတူၺ်းဝႂ်ၶပ်းၶီႇဢွၼ်တၢင်း၊ ပေႃးဢမ်ႇမီးဝႂ်ၶပ်းၶီႇ၊ ဝႂ်ၶပ်းၶီႇ မူတ်းဢႃယု ၸိူဝ်းၼႆႉ ပေႃးဢမ်ႇၼႄလႆႈၶဝ်ၸိုင် ၶဝ်ထၢင်ႇႁၢင်ႈၸႅတ်ႈထၢမ်။ ယဝ်ႉၵေႃႈ ပၢႆႉရူတ်ႉၵႃး ဢၼ်ၶဝ်ၸႂ်ႉသႂ်ႇမႂ်ႇ ၸိူဝ်းၼႆႉထႅင်ႈ။ ပေႃးဢမ်ႇမီးၸိုင် ၶဝ်တေသိမ်းၵႃး။ ပေႃးဢမ်ႇသိမ်းၵႃးၵေႃႈ တေလႆႈပၼ်ငိုၼ်း 1 သႅၼ်၊ ပေႃးဢမ်ႇပၼ် လႆႈၵေႃႈ ႁဝ်းၶႃႈ တေလႆႈၵႂႃႇၸႅင်ႈတီႈလုမ်းၶဝ်”- ဝႃႈၼႆ။

ၾၢႆႇပလိၵ်ႈၵုမ်းထိင်း ရူတ်ႉၵႃးၼၼ်ႉ ၶဝ်တေႁႄႉရူတ်ႉၶိူင်ႈ – ၵႃး ၸိူဝ်းၼႆႉ ၵိုတ်းၵူႈလမ်းသေ ၵူတ်ႇထတ်းဝႂ်ၶပ်းၶီႇ၊ ဝႂ်ၶွၼ်ႇ ရူတ်ႉ၊ ပၢႆႉရူတ်ႇမႂ်ႇ (ဢၼ်ၾၢႆႇလုမ်းၶဝ်မၵ်းမၼ်ႈဢွၵ်ႇမႂ်ႇ) ၸိူဝ်းၼႆႉ သင်ဝႃႈ ၸဝ်ႈၶွင်ရူတ်ႉ ဢမ်ႇမီး၊ ဢမ်ႇပႃးမႃးတဵမ်ထူၼ်ႈ ၸိုင် သင်ၵူတ်ႇထတ်းၺႃး တၵ်းတေလႆႈၵႂႃႇၵႄႈလိတ်ႈပၼ်ႁႃၼႆႉ ထိုင်တီႈလုမ်းၶဝ်သေဢမ်ႇၵႃး တၵ်းတေထုၵ်ႇမၢပ်ႇမႂ်ႇ ငိုၼ်းထႅင်ႈ။

“ပေႃးႁဝ်းၶႃႈ ဢမ်ႇမီးဝႂ်တဵမ်ထူၼ်ႈ သင်ပလိၵ်ႈၶဝ်ၵူတ်ႇထတ်းၺႃးၸိုင် ၶဝ်တေႁႂ်ႈႁဝ်းၵႂႃႇတီႈလုမ်းၶဝ် ႁႂ်ႈၵႂႃႇၵႄႈလိတ်ႈ တီႈၼၼ်ႈ။ ၵမ်ႈၼမ် ၵူၼ်းပိုၼ်ႉတီႈသမ်ႉ ဢမ်ႇၶႂ်ႈၵႂႃႇလုမ်းၵႂႃႇၸႆးၵၼ်လႄႈ သင်ပလိၵ်ႈၶဝ် ယွၼ်းတီႈၼိူဝ်တၢင်းၼၼ်ႉ ၵႃႈႁိုဝ်ၵေႃႈ တိုၼ်းလႆႈပၼ်ၵႃႈၼၼ်ႉယဝ်ႉ။ ပေႃးႁဝ်းၶႃႈ ၵႂႃႇလုမ်း တေလႆႈသဵင်ႈ 5 မိုၼ်ႇပျႃး။ မၢင်ၵေႃႉ ဢမ်ႇၶႂ်ႈၵႂႃႇလုမ်း ယွၼ်ႉသဵင်ႈၶၢဝ်းယၢမ်းၼမ်လႄႈ ႁႂ်ႈလိူင်ႈမၼ်းယဝ်ႉ တီႈၼိူဝ်တၢင်းၼၼ်ႉၵူၺ်းၼႆၵေႃႈ တေလႆႈပၼ် ၸွမ်းၼင်ႇၶဝ် ယွၼ်း ၼိုင်ႈပွၵ်ႈလႂ် လႆႈပၼ်ၶဝ် ဢမ်ႇယွမ်းသႅၼ်ပျႃး”- ၵူၼ်းပိုၼ်ႉတီႈ ၵဵင်းတုင် သိုပ်ႇလၢတ်ႈၼႄၼင်ႇၼႆ။

သင်ဝႃႈ ၵူၼ်းပိုၼ်ႉတီႈ ၸိူဝ်းမီးရူတ်ႉၵႃး ဢၼ်ပႆႇမီးပၢႆႉရူတ်ႉမႂ်ႇ ၸွမ်းၼင်ႇႁွင်ႈၵၢၼ်ၾၢႆႇတေႃႉသူင်ႇ (ကညန) ၶဝ်မၵ်း မၼ်ႈ ဢွၵ်ႇဝႆႉၼၼ်ႉၸိုင် ႁႂ်ႈၵူၼ်းမိူင်း ၵႂႃႇယိုၼ်ႈလိၵ်ႈတႃႇႁဵတ်းပၢႆႉရူတ်ႉမႂ်ႇၵၼ် တီႈလုမ်းၶဝ် ဝႃႈၼႆသေတႃႉ ပေႃးၵူၼ်း မိူင်းၵႂႃႇတၢင်ႇယွၼ်းတႄႉ ၶဝ်သမ်ႉၸၼ်ၶၢဝ်းယၢမ်း ဢမ်ႇပဵၼ်ႁဵတ်းပၼ်ၵမ်းလဵဝ်လႄႈ ၵႆႉသုတ်ႉၶၢႆဝၼ်း ၸိူင်ႉၼႆသေ ႁဵတ်း ႁႂ်ႈၵူၼ်းမိူင်းၵၢတ်ႈၵၢၼ်ငၢၼ်းၼမ် ၵူၼ်းၵဵင်းတုင်လၢတ်ႈ။

တႄႇဢဝ် ႁူဝ်လိူၼ်မေႊ 2023 ၼႆႉမႃး ပလိၵ်ႈၾၢႆႇၵုမ်းထိင်း ရူတ်ႉၵႃး တႂ်ႈသိုၵ်းမၢၼ်ႈ ယိုတ်းမိူင်း ၵုမ်းၵမ်ၼႆႉ တေၵႆႉ တင်ႈလၢၼ်ႇ ၸွမ်းၵဵၵ်းတၢင်းၶဝ်ႈဢွၵ်ႇဝဵင်းမႃးၶိူဝ်းယႂ်းသေ တေပႂ်ႉၵူတ်ႇထတ်းဝႂ်ၶပ်းၶီႇ၊ ဝႂ်ၶွၼ်ႇရူတ်ႉလႄႈ ပၢႆႉရူတ်ႉမႂ်ႇ  ၸိူဝ်းၼႆႉ မႃးၶိူဝ်းယႂ်း မိူၼ်ၼင်ႇ ဝဵင်းလူင်တူၼ်ႈတီး၊ လႃႈသဵဝ်ႈ၊ ၵဵင်းတုင်လႄႈ တႃႈၶီႈလဵၵ်း ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ၵႂႃႇမႃး ထူပ်းတၢင်းယၢပ်ႇၽိုတ်ႇႁႅင်းလႄႈ လႆႈသဵင်ႈငိုၼ်းတွင်း သုမ်းၶၢဝ်းယၢမ်းၸွမ်းၼမ် ၼႆယဝ်ႉ။