ၵႃးႁူၵ်းလေႃႉတင်းရူတ်ႉၶိူင်ႈပဵၼ်ၽေးၵိုင်ႉၵၢင်ႉ ၽႃႇၵၼ်တီႈမူႇၸေႊ ၵူၼ်းၼုမ်ႇၵေႃႉၼိုင်ႈ တၢႆထင်တီႈ။
မိူဝ်ႈဝႃး ဝၼ်းတီႈ 9/7/2023 ယၢမ်းႁူဝ်ၶမ်ႈ 5 မူင်းၼၼ်ႉ ၵႃးႁူၵ်းလေႃႉ တင်းရူတ်ႉၶိူင်ႈ ပဵၼ်ၽေးၵိုင်ႉၵၢင်ႉၽႃႇၵၼ် တီႈႁိမ်းပွၵ်ႉတေႃႇယွတ်ႈ ၸႄႈဝဵင်းမူႇၸေႊ ၵူၼ်းၼုမ်ႇၵေႃႉဢၼ်ႁေႃႈရူတ်ႉၶိူင်ႈ လူႉတၢႆထင်တီႈ။
ၸုမ်းၸွႆႈတူင်ႇဝူင်းၵူၼ်းမူႇၸေႊ နှလုံးလှ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၵႂႃႇတီႈတၢင်းလူင်းၵုင်းတေႃႇယွတ်ႈၼၼ်ႉ။ ၽႂ်ၽိတ်းၽႂ်ထုၵ်ႇတႄႉဢမ်ႇႁူႉ ။ လႅပ်ႈတေႁေႃႈဝႆးတင်းသွင်ၾၢႆႇ။ မိူဝ်ႈၸုမ်းၸွႆႈထႅမ်ၵႂႃႇထိုင်တီႈၽႃႇၵၼ်ၼၼ်ႉတႄႉ ၸၢႆးၼုမ်ႇၵေႃႉၼၼ်ႉ ဢမ်ႇမီးၸႂ်ယဝ်ႉ။ ဢဝ်ၶၢပ်ႈတူဝ်မၼ်း သူင်ႇထိုင်ႁူင်းယႃယဝ်ႉသေ ၸင်ႇႁွင်ႉႁႃပီႈၼွင်ႉမၼ်း။ ၵူၼ်းႁေႃႈၵႃးၼၼ်ႉတႄႉ လႆႈႁၼ် ပလိၵ်ႈမၢၼ်ႈၶဝ်မႃးတူၺ်းယူႇ တေပၼ်တူတ်ႈတၢမ်ႇသင်မၼ်းၸိူင်ႉႁိုဝ်တႄႉ ဢမ်ႇလႆႈႁူႉၸွမ်း ” – ဝႃႈၼႆ။
ၼုမ်ႇၸၢႆးၵေႃႉဢၼ် တၢႆၵႂႃႇၼႆႉ ဢႃယု မီးမွၵ်ႈ 20 ပၢႆ ပဵၼ်ၵူၼ်းႁဵတ်းၵၢၼ်တီႈတႃႈလူတ်ႉၵႃး တဵင်းတၢၼ်းၶျီႇ(သိန်းသန်းချီအဝေးပြေးကားကွင်း) ၼႂ်းၸႄႈဝဵင်းမူႇၸေႊ ။
မိူဝ်ႈဝၼ်းတီႈ 2/7/2023 ၼၼ်ႉၵေႃႈ ၵူၼ်းၸၢႆးၵေႃႉၼိုင်ႈ ပဵၼ်ၽေးၵိုင်ႉၵၢင်ႉလူမ်ႉလူတ်ႉၶိူင်ႈတီႈ ၼိူဝ်သဵၼ်ႈတၢင်းလူင်မင်ႇၵလႃႇမူၸေႊၼၼ်ႉသေ မီးလွင်ႈမၢတ်ႇၸဵပ်းၼမ် ထိုင်တီႈလႆႈသူင်ႇယူတ်းယႃတူဝ်။