ၵူၼ်းပၢႆႈၽေးသိုၵ်း တီႈလႅၼ်လိၼ်တႆး – ယၢင်းလႅင် ဢွၼ်ၵၼ်ၸပ်းတၢင်းပဵၼ် ၼၢဝ်ၶူတ်းလိူတ်ႈလိူဝ် ၸမ် 700 ၵေႃႉ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ် လိူဝ်ႁႅင်း။

ၵူၼ်းပၢႆႈၽေးသိုၵ်း ၸႄႈဝဵင်းၾၢႆၶုၼ်၊ မိူင်းပၢႆး ၼႂ်းၸိုင်ႈတႆးပွတ်းၸၢၼ်းတင်း ၸႄႈဝဵင်းၻီးမူဝ်းသူဝ်ႉ ၸႄႈမိူင်းယၢင်းလႅင် ဢၼ်ပၢႆႈၽေးသိုၵ်းဝႆႉ တီႈလႅၼ်လိၼ်တႆး – ယၢင်းလႅင် ။ ယွၼ်ႉသိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ပိုတ်းယိုဝ်းၵၼ်မႃးႁၢဝ်ႈႁႅင်း ဝၢႆးသိုၵ်းမၢၼ်ႈ ယိုတ်းမိူင်းမႃး မိူဝ်ႈႁူဝ်ပီ 2021 ၼၼ်ႉ တေႃႇထိုင်ယၢမ်းလဵဝ် မီးၶၢဝ်းတၢင်း 2 ပီပၢႆယဝ်ႉ ပၢင်တိုၵ်း ပႆႇယဵၼ်။

ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးၼႆႉ ၶဝ်ဢမ်ႇၶွၼ်ႈယူႇဝႆႉ တီႈလဵဝ်ၵၼ်။ ယူႇဝႆႉ တီႈ ၼၼ်ႈ တီႈၼႆႈ ႁဵတ်းၼၼ်ဝႆႉၵူၺ်း။ ဢွင်ႈတီႈၶဝ်ပၢႆႈမႃးမူၵ်းယူႇဝႆႉၼၼ်ႉသမ်ႉ တေပဵၼ်ၸွမ်းၼႂ်းထိူၼ်ႇ တေမီးၸမ်ပီယဝ်ႉ။ ယၢမ်းလဵဝ် ၾူၼ်ၵေႃႈတူၵ်း ၽႃႈယၢင် (မူဝ်းၵႃႇ) ၸိူဝ်းၼႆႉ ဢမ်ႇၵုမ်ႇထူၼ်ႈလႄႈ ယၢပ်ႇၽိုတ်ႁႅင်း ၶႃႈဢေႃႈ။ ယဝ်ႉၵေႃႈ လုၵ်ႈ ဢွၼ်ႇၼႆႉ ၶႂ်ႈဝႃႈ ၸပ်းတၢင်းပဵၼ်ၼၢဝ်ၶူတ်းလိူတ်ႈလိူဝ်ၵၼ်ၼႆႉ ၶႂ်ႈဝႃႈတင်းမူတ်းယဝ်ႉ။ ၵူၼ်းလူင် ၸိူဝ်းၼႆႉၵေႃႈ ပဵၼ်ၼမ် ဢေႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 4/7/2023 သိုၵ်းမၢၼ်ႈ ဢဝ်မၢၵ်ႇလူင် မႃးပွႆႇ တီႈပၢင်သဝ်းၵူၼ်းပၢႆႈၽေးသိုၵ်း ဢၼ်မီးဝႆႉ တီႈ တၢင်းၾၢႆႇတူၵ်းဝဵင်း ၻီးမူဝ်းသူဝ်ႉ ၸႄႈမိူင်းယၢင်းလႅင်ၼၼ်ႉ ႁဵတ်းႁႂ်ႈၵူၼ်းပၢႆႈၽေးတီႈၼၼ်ႈ ပၢႆႈမႃးသွၼ်ႈယူႇၸွမ်းထႅင်ႈ ယၢမ်းလဵဝ် ႁူဝ်ၵူၼ်းပၢႆႈၽေး တီႈလႅၼ်လိၼ်တႆး – ယၢင်းလႅင်ၼႆႉ မီးၵႂႃႇ 700 ပၢႆယဝ်ႉ။

ၵူၼ်းပၢႆႈၽေးသိုၵ်း 700 ပၢႆၼႆႉ ၵမ်ႈၼမ် တေပဵၼ်ၼၢင်းယိင်း၊ လုၵ်ႈဢွၼ်ႇလႄႈ ၵူၼ်းလူင်။ ယၢမ်းလဵဝ် လူဝ်ႇတၢင်း ၸွႆႈထႅမ်ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း။

ယၢမ်းလဵဝ် လွင်ႈၶဝ်ႈၼမ်ႉတၢင်းၵိၼ်ၼႆႉ တေမီးမွၵ်ႈ 3-4 ဝၼ်းၼႆႉၵူၺ်း ယွၼ်ႉဝႃႈ ၶဝ်ႈၼမ်ႉတၢင်းၵိၼ် ဢၼ်ပိူၼ်ႈၸွႆႈမႃးၼၼ်ႉဢမ်ႇၶိုတ်းလႄႈ သင်ဝႃႈဢမ်ႇမႃးၶိုတ်းၼႆ လွင်ႈၵိၼ်ယႅမ်ႉၼႆႉ တေၶၢတ်ႇၵႂႃႇယဝ်ႉ ဝႃႈၼႆ။

“ယၢမ်းလဵဝ် ၶဝ်ႈၼမ်ႉတၢင်းၵိၼ်ၼႆႉ ၵိုတ်းဝႆႉတႃႇ 3-4 ဝၼ်းၼႆႉၵူၺ်း။ ၵွပ်ႈၼႆလႄႈ လႆႈပႅင်းၵိၼ်ၵၼ်။ ၵူႈပွၵ်ႈ မီးၸဝ်ႈတႃႇၼၶဝ် ၸုမ်း PDF ၶဝ် မႃးၸွႆႈထႅမ်။ ယၢမ်းလဵဝ် သိုၵ်းမၢၼ်ႈၼႆႉ တေဝႆႉပၢင်သဝ်းၵူၼ်းပၢႆႈၽေးၼႆႉ ပဵၼ်ပိူင်ယႂ်ႇသေ ၵႆႉပိုတ်းယိုဝ်းၵွင်ႈလူင်သႂ်ႇလႄႈ ႁဵတ်းႁႂ်ႈၵူၼ်းပၢႆႈၽေးၶဝ် ထူပ်းတၢင်းယၢပ်ႇ။ သင်ပဵၼ်လႆႈ ၶႂ်ႈႁႂ်ႈၸဝ်ႈတႃႇၼၶဝ် ႁႂ်ႈၸွႆႈထႅမ်ၶိုတ်း ၸွမ်းၶၢဝ်းယၢမ်းသေၵမ်း”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄ ၼင်ႇၼႆ။

ၸုမ်းၵႅတ်ႇၶႄ ၵူၼ်းမိူင်း ဝဵင်းၻီးမူဝ်းသူဝ်ႉ PDF ပိုၼ်ၽၢဝ်ႇ ဢွၵ်ႇဝႆႉဝႃႈ သိုၵ်းမၢၼ်ႈယိုတ်းမိူင်းၼႆႉ ဝႆႉၵူၼ်းပၢႆႈၽေးသိုၵ်း ပဵၼ်ပဝ်ႉမၢႆသေ တင်ႈၸႂ်ယိုဝ်းၵွင်ႈလူင်သႂ်ႇ တီႈပၢင်သဝ်းၵူၺ်း ဝႃႈၼႆ။

မိူဝ်ႈဝၼ်းတီႈ 4 ၼၼ်ႉ သိုၵ်းမၢၼ်ႈ ဢဝ်မၢၵ်ႇလူင် မႃးပွႆႇ တီႈပၢင်သဝ်း ဝဵင်းၻီးမူဝ်းသူဝ်ႉၼၼ်ႉ ၸၢၵ်ႇမၢၵ်ႇ တိူဝ်ႉသႂ်ႇ ၵူၼ်း ပၢႆႈၽေးသိုၵ်း 3 ၵေႃႉ လႆႈတိူဝ်ႉမၢတ်ႇၸဵပ်းၸွမ်း ၼႂ်းၼၼ်ႉ ပႃးလုၵ်ႈဢွၼ်ႇ ၵေႃႉၼိုင်ႈ။

ပူၼ်ႉမႃး မိူဝ်ႈဝၼ်းတီႈ 5/6/2023 သိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈမႃး ၼႂ်းဝဵင်းမိူင်းပၢႆးသေ လႆႈပဵၼ်ပၢင်တိုၵ်းၵၼ် တင်း ၸုမ်းၵႅတ်ႇၶႄၵူၼ်းမိူင်း PDF ၼႂ်းၶၢဝ်းတၢင်း ၼိုင်ႈလိူၼ်မႃးၼႆႉ တုမ်ႉတိူဝ်ႉၵူၼ်းမိူင်းလႄႈ လုၵ်ႈဢွၼ်ႇ လႆႈလူႉတၢႆ 20 ပၢႆ။  ၼႂ်းၼၼ်ႉ ၽူႈၸၢႆး 20 ၵေႃႉ၊ ယိင်း 3 ၵေႃႉ ယူႇတီႈ KNDF B09 ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 5 ၼႆႉ ၼင်ႇၼႆ။