ငဝ်းလၢႆးၼႂ်းၼႃႈလိၼ်ၸၢဝ်းၶိူဝ်းၼႂ်းမိူင်းႁူမ်ႈတုမ်ၼႂ်းဝူင်ႈၼႆႉ

တီႈမိူင်းၶၢင် ၸႄႈဝဵင်းဝဵင်းမႂ်ႇ တီႈဝၢၼ်ႈၼမ်ႉသၢၼ်းယၼ်ႇၼၼ်ႉ သိုၵ်းမၢၼ်ႈလႄႈသိုၵ်းၶၢင် KIA ၶဵင်ႈၶႅင် ၵၢၼ်သိုၵ်းတေႃႇၵၼ် မိူဝ်ႈဝၼ်းတီႈ 3 လိူၼ်ၵျူႊလၢႆႊ သိုၵ်းမၢၼ်ႈထႅမ်ႁႅင်းသိုၵ်းၶိုၼ်ႈၸူး သိုၵ်းၶၢင်မီးလွင်ႈ ပိုတ်း ယိုဝ်းၵၼ် ပႃးလႄႈၵူၼ်းမိူင်း မၢတ်ႇၸဵပ်းၵေႃႉၼိုင်ႈ၊ လႆႈပၢႆႈၽေးသိုၵ်း 1000 ပၢႆ။

တီႈဝဵင်းမွင်ႇတေႃး မိူင်းရၶႅင်ႇသမ်ႉ သိုၵ်းမၢၼ်ႈဢၼ်ပႂ်ႉတပ်ႉပၢင်သဝ်းလႅၼ်လိၼ် ငၶူႇယ ၼၼ်ႉပၢႆႈတပ်ႉ 3 ၵေႃႉ ပႃးၸဵမ်တူဝ်ၽူႈၵွၼ်းတပ်ႉပၢင်သဝ်းၼၼ်ႉ။ လွင်ႈၼႆႉပဵၼ်ၵႂႃႇမိူဝ်ႈဝၼ်းတီႈ 3 လိူၼ်ၵျူႊလၢႆႊ။ ယွၼ်ႉသင်လႄႈ သိုၵ်းမၢၼ်ႈ ပၢႆႈတပ်ႉၼႆ ဢမ်ႇလႆႈႁူႉပဵၼ်တၢင်းၵၢၼ်သေတႃႉ ၵူၼ်းပိုၼ်ႉတီႈတႄႉလၢတ်ႈ ဝႃႈ ပဵၼ်ယွၼ်ႉ ၵူၼ်းလူင်ဝၢၼ်ႈ မုတ်ႉသလိမ်ႇ ၵေႃႉၼိုင်ႈ ဢၼ်ၺႃးတီႉယွၼ်ႉလွင်ႈ ၸူၼ်ၵၼ်ၼၼ်ႉ ပၢႆႈလွတ်ႈၵႂႃႇလႄႈ ၽူႈၵွၼ်းပၢင်သဝ်းၵူဝ်သေၸူဝ်းလုၵ်ႈၼွင်ႉပၢႆႈဝႃႈၼႆ။

တီႈမိူင်းၶျၢင်းတႄႉ ဢိင်ၼိူဝ်တပ်ႉ သိုၵ်းၶျၢင်း CNF လႄႈ CDF ႁူမ်ႈၵၼ် ယိုဝ်းၵႃးၵၢပ်ႇလဵၵ်းသိုၵ်းမၢၼ်ႈ လႅဝ် ၽွင်း ပၢင်တိုၵ်းၼၼ်ႉၼႆသေ ယူႇတီႈ NUG ယုၵ်ႉယွၼ်ႈတွၼ်ႈသူး ပၼ်ၸုမ်းသိုၵ်းၶျၢင်း တႃႇငိုၼ်းၵွင်ၵၢင် 4000 သႅၼ်ပျႃး မိူဝ်ႈဝၼ်းတီႈ 4 လိူၼ်ၵျူႊလၢႆႊ ။ သိုၵ်းၶျၢင်း CNF လႄႈ CDF ႁူမ်ႈၵၼ်ယိုဝ်းၵႃးၵၢပ်ႇလဵၵ်း သိုၵ်းမၢၼ်ႈ 2 လမ်း ႁိမ်းဝၢၼ်ႈၶျုၼ်ႇၵျူင်း မိူဝ်ႈဝၼ်းတီႈ 13 လိူၼ်ဢေႊပရိူဝ်ႊ ၽွင်းၵႃးသိုၵ်းမၢၼ်ႈလုၵ်ႉတီႈ ဝဵင်းၵလေး မႃးဝဵင်းႁႃးၶႃး။

တီႈမိူင်းယၢင်းလႅင်သမ်ႉ ပၢင်တိုၵ်းၼႂ်းၵႄႈသိုၵ်းမၢၼ်ႈလႄႈ တပ်ႉၽွမ်ႉႁူမ်ႈ သိုၵ်းၵႅတ်ႇၶႄၵူၼ်းမိူင်း သိုၵ်း ယၢင်းလႅင် ဢၼ်ပဵၼ်ၵႂႃႇၼႂ်းလိူၼ်ၵျုၼ်ႊၼႆႉၼၼ်ႉ ၾၢႆႇသိုၵ်းမၢၼ်ႈတၢႆ 50 ပၢႆ ၾၢႆႇတပ်ႉသိုၵ်းၵႅတ်ႇၶႄ ၸိူဝ်ႉၸၢတ်ႈယၢင်းလႅင် KNDF ပိုၼ်ၽၢဝ်ႇဝႆႉၼင်ႇၼႆ။ ၼႂ်းလိူၼ်ၵျုၼ်ႊၼႆႉ ပၢင်တိုၵ်းယႂ်ႇၼႂ်းၵႄႈသွင်ၸုမ်း ပဵၼ်တီႈ ၼႂ်းၸႄႈဝဵင်းလွႆၶေႃ 7 ၵမ်း၊ ဝဵင်းသျႃးတေႃး ၵမ်းၼိုင်ႈ၊ ဝဵင်းၽရူးသူဝ်း 4 ၵမ်း၊ ဝဵင်းတီးမူဝ်းသူဝ်ႉ 5 ၵမ်း ႁူမ်ႈတင်းမူတ်း 17 ၵမ်း။ လိူဝ်ၼၼ်ႉတီႈဝဵင်းမႄႈၸႄႉလႄႈ ဝဵင်းဝၢၼ်ႈမႂ်ႇၼၼ်ႉၵေႃႈ ပၢင်တိုၵ်းပဵၼ်ႁႅင်း ဝႆႉပဵၼ်တီႈဝႃႈၼႆ။ ၾၢႆႇသိုၵ်းၽွမ်ႉႁူမ်ႈယၢင်းလႅင်တႄႉ မီးၵူၼ်းတၢႆ 3 ၵေႃႉၵူၺ်း လႆႈႁူႉၼင်ႇၼႆ။ ယွၼ်ႉပၢင် တိုၵ်းယႂ်ႇ လႄႈၽႄႈလၢမ်းၼႂ်းလိူၼ်ၵျုၼ်ႊၼႆႉသေ ၵူၼ်းမိူင်းယၢင်းလႅင်လႆႈပၢႆႈၽေးသိုၵ်းမီး 2 သႅၼ်ပၢႆ ယဝ်ႉၼႆ ၸုမ်းသုၼ်ႇလႆႈၵူၼ်းယၢင်းလႅင်ၵေႃႈပိုၼ်ၽၢဝ်ႇဝႆႉၼင်ႇၼႆ။

တီႈတၢင်းၸႄႈမိူင်းမွၼ်းသမ်ႉ ၶူဝ်ၶၢမ်ႈၼမ်ႉလင်ၼိုင်ႈ ၸိုဝ်ႈႁွင်ႉၶူဝ်ၵျူင်ႇၻူဝ်း ၺႃးၸုမ်းဢမ်ႇႁူႉ ၾၢႆႇပွႆႇ မၢၵ်ႇယႃႉၵွႆလႄႈသိုၵ်းမၢၼ်ႈ လူင်းပိုၼ်ႉတီႈ တေဢၢၼ်းသၢင်ႈၶူဝ်မႂ်ႇထႅင်ႈလင်ၼိုင်ႈတီႈႁိမ်းၶူဝ်ၵွႆၼၼ်ႉ။ ၽင်းၽူႈမီးၸၼ်ႉၼႂ်းသိုၵ်းမၢၼ်ႈလႄႈၽူႈမီးပုၼ်ႈၽွၼ်းၵူႈႁွင်ႈၵၢၼ်ဢွၼ်ၵၼ်လူင်းၵူတ်ႇထတ်းတူၺ်းပိုၼ်ႉတီႈလႄႈတႃႇသၢင်ႈၶူဝ်မႂ်ႇယူႇၼၼ်ႉ ၺႃးမၢၵ်ႇ Drop Bomb ဢၼ်ဢဝ်ၻရူၼ်ႊ ပွႆႇသင်ႇထႅင်ႈလႄႈ ၽူႈၵွၼ်းႁွင်ႈၵၢၼ်ၾၢႆႇသၢင်ႈသဵၼ်ႈတၢင်းၸႄႈတွၼ်ႈသထူင်ႇဢိၵ်ႇပႃးတင်းၵူၼ်းၸွမ်းလင်ၵေႃႉၼိုင်ႈတၢႆထင်တီႈ။ မၢတ်ႇၸဵပ်း 28 ၵေႃႉ။ ၾၢႆႇတၢင်းၸုမ်းယၢင်းၽိူၵ်ႇ KNU တႄႉထတ်းသၢင်ဝႃႈ ၸုမ်းလုၵ်ႉၽိုၼ်ႉလႅပ်ႈတေၶႂ်ႈတတ်းသဵၼ်ႈတၢင်းတေႃႉတၢင်းၵိၼ်ၶူဝ်းၵုၼ်ႇသိုၵ်းမၢၼ်ႈၶၢတ်ႇလႄႈၸင်ႇယႃႉၶူဝ်ၵေႃႈပဵၼ်လႆႈဝႃႈၼႆ။