လုၵ်ႈဢွၼ်ႇၼုမ်ႇမိူင်းပႃး ၸႄႈဝဵင်းသႅၼ်ဝီ 2 ၵေႃႉ ၺႃးၽူႈမၢႆပွၵ်ႉၶွင်လုမ်းၵွၼ်းၸႄႈဝဵင်း တႂ်ႈသိုၵ်းမၢၼ်ႈယိုတ်းမိူင်း ယိုဝ်း တၢႆၼိုင်ႈၵေႃႉ မၢတ်ႇၸဵပ်းၼိုင်ႈၵေႃႉ။
မိူဝ်ႈဝၼ်းတီႈ 2 လိူၼ်ၵျူႊလၢႆႊ လုၵ်ႈဢွၼ်ႇၸၢႆး 2 ၵေႃႉ ဢႃယု မွၵ်ႈ 16 ပီတင်းသွင်၊ ၶီႇရူတ်ႉၶိူင်ႈၸွမ်းၵၼ် လုၵ်ႉတၢင်းဝၢၼ်ႈလူင် ဢၢၼ်းၵႂႃႇတၢင်းဝၢၼ်ႈၵုင်းၺွင်ႇ ၊ ၺႃး ၽူႈမၢႆပွၵ်ႉၶွင်လုမ်းၵွၼ်းၸႄႈဝဵင်းႁႄႉၵိုတ်း ၊ လုၵ်ႈဢွၼ်ႇၸၢႆးၼၼ်ႉဢမ်ႇတၼ်းၵိုတ်း ၽူႈမၢႆပွၵ်ႉယိုဝ်းသႂ်ႇ ၼုမ်ႇၸၢႆးၵေႃႉၼိုင်ႈတၢႆထင်တီႈ ၵေႃႉၼိုင်ႈတႄႉမၢတ်ႇၸဵပ်း ပၢႆႈလွတ်ႈ။
“ၵေႃႉဢၼ်တၢႆၼၼ်ႉၸိုဝ်ႈႁွင်ႉ ဢၢႆႈမျိၼ်ႉ ပဵၼ်လုၵ်ႈၸၢႆး လုင်းၶမ်းပႃႈၵျႃႇ။ ပဵၼ်ၵေႃႉဢၼ်သွၼ်ႉရူတ်ႉၶိူင်ႈတင်းလင်။ ၵေႃႉၶပ်းရူတ်ႉၵေႃႈမၢတ်ႇၸဵပ်းဢိတ်းဢွတ်း မၼ်းတူၵ်းၸႂ်ႁေ သိုပ်ႇၶပ်းရူတ်ႉၵႂႃႇထႅင်ႈ။ ၽိူဝ်ႇပေႃႈမႄႈပီႈၼွင်ႉ မႃးဢဝ်တူဝ်တၢႆ ဢၢႆႈမျိၼ်ႈၼၼ်ႉ သိုၵ်းမၢၼ်ႈသမ်ႉဢမ်ႇပၼ်ဢဝ်ၶဝ်ႈဝၢၼ်ႈ။ ယဝ်ႉၵေႃႈလၢတ်ႈၵူၼ်းဝၢၼ်ႈဝႃႈ SSPP ယိုဝ်းတၢႆဢိူဝ်ႈၼႆႉ ၼႆသေ ၵူၼ်းမိူင်းၸႂ်လမ် ၵႂႃႇယွၼ်းတီႈၽူႈမီးပုၼ်ႈၽွၼ်းမႃးသၢင်းလၢင်းပၼ်ၼၼ်ႉၼႃႇ။ ”- ၵူၼ်းမိူင်းသႅၼ်ဝီၵေႃႉၼိုင်ႈလၢတ်ႈၼင်ႇၼႆ။
ၽူႈမၢႆပွၵ်ႉ ၶွင်လုမ်းၵွၼ်းၸႄႈဝဵင်း ၶွင်ၸုမ်သိုၵ်းမၢၼ်ႈၼၼ်ႉ ၸိုဝ်ႈႁွင်ႈဢၢႆႈၸၢႆးၵႆႇ ႁွင်ႉၸၢႆးၼေႃႇမိူင်း ။ ပဵၼ်လုၵ်ႈၸုမ်း ၸုမ်းသိုၵ်းၵူၼ်းမိူင်း ပျီႇတူႉၸိတ်ႉပၢၼ်းသေး။ မၼ်းၸၢႆးသွၼ်ႉရူတ်ႉၶိူင်ႈၵူၼ်းသိုၵ်း SSPP သေ လမ်းလုၵ်ႈဢွၼ်ႇၸၢႆး 2 ၵေႃႉ။ ၽွင်းၸႂ်ႉၵိုတ်းသေလုၵ်ႈဢွၼ်ႇၸၢႆးဢမ်ႇပႆႇတၼ်းၵိုတ်းၼၼ်ႉ ၽူႈမၢႆပွၵ်ႉယိုဝ်းသႂ်ႇ တိူဝ်ႉႁူဝ်လုၵ်ႈဢွၼ်ႇၸၢႆးၵေႃႉသွၼ်ႉတၢင်းလင်ၼၼ်ႉတူၵ်းရူတ်ႉတၢႆထင်တီႈ။ တူဝ်ၽူႈမၢႆပွၵ်ႉၵေႃႈ တူၵ်းၸႂ်သေၸၵ်ႉဢဝ်ရူတ်ႉၶိူင်ႈလုၵ်ႈသိုၵ်း SSPP ၼၼ်ႉ ၶီႈပၢႆႈၵႂႃႇ တေႃႇထိုင်တလဵဝ် ႁႃတူဝ်ယင်းပႆႇႁၼ်။ တိုၵ်ႉဢွၼ်ၵၼ်ၸွမ်းသွၵ်ႈႁႃ တႃႇဢဝ်မႃးပၼ်တူတ်ႈတၢမ်ႇယူႇဝႃႈၼႆ။
ၽိူဝ်ႇပေႃႈမႄႈၵူၼ်းႁိူၼ်းၸၢႆးမျိၼ်ႉဢၢၼ်းမႃးဢဝ်တူဝ်တၢႆ မိူဝ်းတီႈဝၢၼ်ႈလူင်ၼၼ်ႉ သိုၵ်းမၢၼ်ႈဢၼ်ပၵ်းပၢင်သဝ်းပႂ်ႉတပ်ႉဝႆႉတီႈဝၢၼ်ႈလူင် မိူင်းပႃးၼၼ်ႉသမ်ႉဢမ်ႇပၼ်ဢဝ်မိူဝ်းတီႈဝၢၼ်ႈ၊ ၸႂ်ႉႁဵၼ်းပၼ်ပၢင်မႃႇသႃႇလႄႈသွမ်းတၢင်တူဝ်ၸွမ်းတၢင်းၼၼ်ႉၵူၺ်းၼႆလႄႈ ၵူၼ်းဝၢၼ်ႈဢွၼ်ၵၼ်ႁႅၼ်းပၼ်မိူဝ်ႈဝၼ်းတီႈ 3 /7/2023။
ၵူၼ်းဝၢၼ်ႈတႄႉလၢတ်ႈဝႃႈ – မိူဝ်ႈႁၢင်လိူၼ်ၵျုၼ်ႊပူၼ်ႉမႃး မေႃယႃ ဝၢၼ်ႈၵုင်းၺွင်ႇၵေႃႉၼိုင်ႈ ၺႃးၵူၼ်း 2 ၵေႃႉၶီႇရူတ်ႉၶိူင်ႈမႃးၸွမ်းလင်သေ ၸူၼ်ဢဝ်ယႃႈယႃလႄႈငိုၼ်းသေဢမ်ႇၵႃး ဢဝ်လႅဝ်းၽၼ်းသႂ်ႇမၢၵ်ႇႁူဝ်ရူတ်ႉၶိူင်ႈမေႃယႃၼၼ်ႉပေႃးမၢင်ႈ။ လွင်ႈၼႆႉ ၵူၼ်းဝၢၼ်ႈသမ်ႉၵႂႃႇတၢင်ႇလၢတ်ႈတီႈၸုမ်း SSPP ဢၼ်မႃးတူင်ႉၼိုင်ၼႂ်းပိုၼ်ႉတီႈ ႁႂ်ႈၸွႆႈႁႃပၼ်ၵူၼ်းၸူၼ်။ ဝၢႆးၼၼ်ႉ ၸုမ်းယိပ်းၵွင်ႈ မႃးပႂ်ႉၸွမ်းတၢင်းသေၵူတ်ႇထတ်းၵူၼ်းၵႂႃႇမႃး ထိုင်တီႈလႆႈပဵၼ်လွင်ႈယိုဝ်းလုၵ်ႈဢွၼ်ႇတၢႆ။
“တီႈတႄႉမၼ်းလုၵ်ႈဢွၼ်ႇၼၼ်ႉဢမ်ႇၸႂ်ႈၸူၼ်။ ၶဝ်ပဵၼ်ၵူၼ်းဝၢၼ်ႈလူင်၊ ၵူၺ်းၵႃႈၶႃသၵ်းလၢႆးဝႆႉၸွမ်းတူဝ် ၸွမ်းၶေႃးၶႃ ပေႃးလဵၼ်းပေႃးလၢႆးၵႂႃႇမူတ်းၼေႈ။ ၶူၼ်ႁူဝ်ၵေႃႈသမ်ႉသႂ်ႇသီဝႆႉႁေ။ ပေႃးၵိုင်ႉၵၢင်ႉတူၺ်းၵေႃႈ တႃသမ်ႉပေႃးလၢႆးမဵဝ်းၼၼ်ႉၼေႈ။ ၵူၺ်းဝႃႈတႄႉ ၸဝ်ႈၼႃႈတီႈၾၢႆႇ SSPP ၵေႃႈမႃးႁူပ်ႉထူပ်းၵူၼ်းဝၢၼ်ႈ သပ်းလႅင်းၼႄပိူင်ပဵၼ်သေယဝ်ႉ ၸွႆႈထႅမ်ပၼ်ငိုၼ်း 10 သႅၼ်ပျႃးဝႆႉ ၼႆၶႃႈၼေႈ” – ၵူၼ်းမိူင်းဝဵင်းသႅၼ်ဝီ ၵေႃႉၼိုင်ႈၵေႃႈလၢတ်ႈၼင်ႇၼႆ။
လွင်ႈၼႆႉၽူႈတွႆႇႁွၵ်ႈလႆႈၶတ်းၸႂ်တိတ်းတေႃႇၸူး SSPP ယူႇၵေႃႈတိတ်းတေႃႇပႆႇလႆႈ ။
ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းတၢင်းထုင်ႉပဵင်းမိူင်းမၢၼ်ႈမႃးယူႇသဝ်းၵိၼ်သၢင်ႈ မႃးႁဵတ်းၵၢၼ်ႁႃၵိၼ်လဵင်ႉတွင်ႉ မႃးႁဵတ်းသူၼ်ဢွႆႈ တၢင်းမိူင်းတႆးၼမ်။ ၵူၼ်းပႅၵ်ႇၼႃႈ ၼမ်လႄႈၽူႈလၵ်ႉၵူၼ်းၸူၼ်ၵေႃႈလိူင်ႇၼမ်။ ၵူၼ်းမိူင်းၾၢင်ႉၵၼ်ႁႂ်ႈၾၢင်ႉယူႇၾၢင်ႉၵိၼ်ဝႃႈၼႆ။
ၸိူင်ႉႁိုဝ်ၵေႃႈလီ ၸွမ်းၼင်ႇလိၵ်ႈၵိၼ်ၵႅၼ်ႇ ၵျီႇၼီႇဝႃႇၶေႃးလ် တႄႉပႃးဝႆႉဝႃႈ – ၸုမ်းယိပ်းၵွင်ႈၵၢင်ႇၼႆႉတေဢမ်ႇလႆႈၶဝ်ႈယူႇၼႂ်းဝၢၼ်ႈၼႂ်းသူၼ်။ တေဢမ်ႇလႆႈယူႇထုၵ်းထူၼႂ်းၵႄႈၵူၼ်းမိူင်း။- ဝႃႈၼႆသေတႃႉ ၼႂ်းမိူင်းႁူမ်ႈတုမ်ၼႆႉပႃးၸဵမ်ၸုမ်းသိုၵ်းမၢၼ်ႈ ဢမ်ႇမီးၽႂ်ႁဵတ်းၸွမ်းၶေႃႈၵိၼ်ၵႅၼ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ