ဝၢႆးလင်မိူင်းႁူမ်ႈတုမ်ၺႃးယိုတ်းဢႃၼႃႇမႃးၼႆႉ ၸုမ်းသိုၵ်းလၢႆမူႇလၢႆၸုမ်း လူလၢႆၵၼ်ႉၸၼ်ၼၢင်းယိင်းမႃး ဢမ်ႇယွမ်း 59 ၶၻီႊ ယဝ်ႉၼႆ ၸုမ်းၼၢင်းယိင်းမိူင်းႁူမ်ႈတုမ်( Burmese Women’s Union) ဢွၵ်ႇဝႆႉၼင်ႇၼႆ။

ၸွမ်းၼင်ႇၸုမ်းၼၢင်းယိင်းမိူင်းႁူမ်ႈတုမ် ၵဵပ်းႁွမ်တွမ်တႅမ်ႈဝႆႉၸိုင် တီႈဢၼ်မီးပတိၵ်ႈၶၢတ်ႈ တီႈဢၼ်မီးလွင်ႈပၢင်တိုၵ်းသိုၵ်းသိူဝ် မိူၼ်ၼင်ႇ ၼႂ်းမိူင်းယၢင်းလႅင် ၊ ၸႄႈၵႅင်း ၊ မၵူၺ်း ၊ ပႃႇၵိူဝ်( ပၵူဝ်း) လႄႈ ဢေႇရႃႇဝတီႇ ၸိူဝ်းၼႆႉ ထုၵ်ႇၸုမ်းသိုၵ်း ၵၼ်ႉၸၼ်လူလၢႆမီး ၃၆ လိူင်ႈ၊ ဢၼ်ၵဝ်းလႅၼ်ပူၼ်ႉပႅၼ်တၢင်းၵႃႇမ သမ်ႉမီး 23 လိူင်ႈဝႃႈၼႆ။

လွင်ႈၵၼ်ႉၸၼ်လူလၢႆၼၢင်းယိင်းၼႆႉ သိုၵ်းမၢၼ်ႈ ၵူၺ်းဢမ်ႇၵႃး ၸုမ်းယိပ်းၵွင်ႇၵၢင်ႇတၢင်ႇမူႇတၢင်ႇၸုမ်းၵေႃႈ ပႃး ၊  ဢၼ်ပဵၼ်ၵူၼ်းမိူင်းၼင်ႇၵၼ် လူလၢႆၵၼ်ႉၸၼ်ၵၼ်ၵေႃႈမီး။

လွင်ႈပူၼ်ႈပႅၼ်သုၼ်ႇလႆႈမၢင်ဢၼ်ၼႆႉ ႁၢႆႉႁႅင်းလိူဝ်၊ ထူပ်းႁၼ်တူဝ်တၢႆၼၢင်းယိင်း  ႁိမ်းႁွမ်းတပ်ႉသိုၵ်း ႁဵတ်းႁႂ်ႈ ၼၢင်းယိင်းၼႂ်းဝၢၼ်ႈၼႂ်းဢိူင်ႇဢမ်ႇမီးလွင်ႈႁူမ်ႇလူမ်ႈ။ ဢၼ်ၸုမ်းသိုၵ်းၶဝ်ႈဝၢၼ်ႈ လွၵ်ႇငိုတ်ႈလၢၵ်ႈၸၼ်တိူဝ်ႉတွႆႇလုပ်ႈၵမ်းၼၢင်းယိင်း မီး 9 လိူင်ႈ။

မိူဝ်ႈ လိူၼ် ၼူဝ်ႊဝႅမ်ႊပိူဝ်ႊ ဝၼ်းတီႈ 11 ပီ 2021 ပူၼ်ႉမႃးၼၼ်ႉၵေႃႈ ၸုမ်းသိုၵ်းမၢၼ်ႈ လူလၢႆၵၼ်ႉၸၼ်ၼၢင်းယိင်းၵေႃႉၼိုင်ႈ ဢၼ်တိုၵ်ႉၵိူတ်ႇလုၵ်ႈဝႆႉမႂ်ႇမႂ်ႇ တီႈဝၢၼ်ႈဢပ်ႉလႅတ်ႉ ဝဵင်းတီးတဵင်ႇ မိူင်းၶျၢင်း။လိူဝ်ၼၼ်ႉဢၼ်သိုၵ်းမၢၼ်ႈပဵၼ်မူႇပဵၼ်ၾုင် ၵၼ်ႉၸၼ်ၼၢင်းယိင်းၵေႃႈမီး။

ၼၢင်းယိင်းဢၼ်ၺႃး ၸုမ်းသိုၵ်း ပေႉၵိၼ် လူလၢႆ ၵၼ်ႉၸၼ်ၼႆႉ ၵမ်ႈၼမ်တေပဵၼ် မႄႈႁိူၼ်း ၊ ၵၼ်ႉၸၼ်ပႃး လုၵ်ႈဢွၼ်ႇယိင်းဢႃယု 2 ၶူပ်ႇ ၵေႃႉၼိုင်ႈလႄႈ ယိင်းဢွၼ်ႇဢႃယု 14 ၵေႃႉၼိုင်ႈ၊ လိူဝ်ၼၼ်ႉသိုၵ်းမၢၼ်ႈ ၶႃႈႁႅမ်ပေႃႈမႄႈၶဝ်တၢႆပႃးထႅင်ႈ။

ၼႂ်းပိုၼ်ႉတီႈၼႃႈလိၼ်ပၢင်တိုၵ်းၼႆႉ ဢမ်ႇၵႃးသိုၵ်းမၢၼ်ႈၵူၺ်းၵၼ်ႉၸၼ်ပူၼ်ႉပႅၼ်သုၼ်ႇလႆႈၼၢင်းယိင်း ဢၼ်ပဵၼ် ၸုမ်းသိုၵ်းပီႇတီႇဢႅပ်ႉ PDF ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵေႃႈမီးလွင်ႈပူၼ်ႉပႅၼ်ၼၢင်းယိင်း။

ၼႂ်းပိုၼ်ႉတီႈပၢင်တိုၵ်းသိုၵ်းသိူဝ်ၼၼ်ႉ ဢၼ်ပဵၼ် ၵူၼ်းမိူင်းၼင်ႇၵၼ်ၵၼ်ႉၸၼ်လူလၢႆၵၼ်ၵေႃႈမီးယူႇ 46 လိူင်ႈ ။ ပဵၼ်ၼႂ်းတိူင်းပႃႇၵိူဝ်၊ မိူင်းယၢင်းလႅင် ၊ တိူင်းမၵူၺ်၊ ၸႄႈၵႅင်းလႄႈ တိူင်းၼမ်ႉၵဵဝ်။

 ၸွမ်းၼင်ႇ BWU ၵဵပ်းသဵၼ်ႈမၢႆဝႆႉတႄႉ လႆႈႁၼ်ဝႃႈသိုၵ်းမၢၼ်ႈ ပူၼ်ႉပႅၼ်လူလၢႆၼၢင်းယိင်း ၼႂ်းတိူင်းပႃႇၵိူဝ်လိူင်ႈၼိုင်ႈ၊ ၼႂ်းတိူင်းၸႄႈၵႅင်း လိူင်ႈၼိုင်ႈ၊ တိူင်းၼမ်ႉၵဵဝ် လိူင်ႈၼိုင်ႈလႄႈ တိူင်းမၵူၺ်း 6 လိူင်ႈ  ၊ ၼၢင်းယိင်းၵေႃႉလဵဝ် ၺႃးၵူၼ်းၵၼ်ႉၸၼ်ပဵၼ်မူႇပဵၼ်ၽုင်ၵေႃႈမီး ပဵၼ် 3  လိူင်ႈဝႃႈၼႆ။

လိူဝ်ၼၼ်ႉ ၸုမ်းယိပ်းၵွင်ႈၵၢင်ႇ တၢင်ႇမူႇတၢင်ႇၸုမ်း  ၵေႃႈၵၼ်ႉၸၼ်လူလၢႆၼၢင်းယိင်းမႃးၶိူဝ်းယႂ်း၊ ဢမ်ႇဝႃႈသိုၵ်းမၢၼ်ႈၵူၺ်း ၼႂ်းၶဝ်ၵေႃႈ  ဢမ်ႇမီးလွင်ႈ  ပၼ်တၢင်းၽိတ်းတူတ်ႈတၢမ်ႇ ထိုင်တီႈထိုင်လႅၼ်။

ၼၢင်းယိင်းၸိူဝ်းထုၵ်ႇၵၼ်ႉၸၼ်လူလၢႆၸိူဝ်းၼႆႉ ဢမ်ႇထိုင်တီႈသၢႆၸႂ်လူႉသုမ်းသေတႃႉ ထိုင်မိူဝ်ႈလဵဝ် ဢမ်ႇႁတ်းငွၵ်ႈႁူဝ် တိုၵ်ႉလႆႈၵူဝ်ႁႄ လႆႈမႆႈၸႂ်ၵူႈလွင်ႈၵူႈဢၼ် ၸၢတ်ႈပၢၼ်ၽဝတူဝ်ၵဝ်ႇ မိူၼ်ဢမ်ႇမီးလွင်ႈႁူမ်ႇလူမ်ႈဝႆႉ။

ၵွပ်ႈၼႆလႄႈ ၽွင်းငဝ်းလၢႆးဝၢၼ်ႈမိူင်းတိုၵ်ႉပဵၼ်လွင်ႈသုၵ်ႉယုင်ႈ ၊ ၵူၼ်းမိူင်းလဵၵ်ႉယႂ်ႇၼုမ်ႇထဝ်ႈၸဵမ်ယိင်းၸဵမ်ၸၢႆး  ၺႃးတဵၵ်းတဵင်ပူၼ်ႉပႅၼ်သုၼ်ႇလႆႈယူႇၼႆႉ  ယူႇတီႈ ၸုမ်းၼၢင်းယိင်းမိူင်းႁူမ်ႈတုမ် Burmese Women’s Union တုၵ်းယွၼ်းၸုမ်း NUG တင်း NUCC ဢိၵ်ႇ ၸုမ်းၼွၵ်ႈမိူင်းလၢႆမူႇလၢႆၸုမ်း လႄႈ  ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၊ ၸုမ်းယိပ်းၵွင်ႈသေလုၵ်ႉၾိုၼ်ႉၶွင်ႇသီႇသိုၵ်းမၢၼ်ႈ တင်းသဵင်ႈ ႁႂ်ႈတူၺ်းပၼ်ငဝ်းလၢႆး ပိူင်ပဵၼ် လွင်ႈပေႉၵိၼ်ၵၼ်ႉၸၼ်လူလၢႆၼၢင်းယိင်းၸိူဝ်းၼႆႉသေ ႁႂ်ႈၵႄႈလိတ်ႈပၼ်ႁႃၸိူဝ်းၼႆႉ ဝႆးဝႆးသေၵမ်း  ဝႃႈၼႆ။