လဝၵ တီႈမိူင်းၽျၢၵ်ႈသင်ႇႁႂ်ႈၵူၼ်းမိူင်းလူင်းၸိုဝ်ႈပၼ်သဵၼ်ႈမၢႆတႃႇႁဵတ်းမၢႆၾၢင်မႂ်ႇ

ၾၢႆႇထတ်းၵူၼ်းၶဝ်ႈမိူင်း (လဝၵ)  မိူင်းၽျၢၵ်ႈ သင်ႇႁႂ်ႈ ၵူၼ်းမိူင်းလူင်းၸိုဝ်ႈပၼ်သဵၼ်ႈမၢႆ တႃႇႁဵတ်းမၢႆၾၢင်( မၢတ်ႇပူင်ႇတိၼ်ႇ) သမၢတ်ႉၵၢတ်ႉ Smart Card။

ၼႂ်းဝူင်ႈၼႆႉ ၾၢႆႇထတ်းၵူၼ်းၶဝ်ႈမိူင်း လဝၵ ( လူဝင်မူကြီးကြပ်ရေးနှင့်ပြည်သူ့အင်အားဝန်ကြီးဌာန) တီႈမိူင်းၽျၢၵ်ႈ ၸိုင်ႈတႆးပွတ်းဢွၵ်ႇ ဢၼ်ယူႇတႂ်ႈသိုၵ်းမၢၼ်ႈ သင်ႇႁႂ်ႈၵူၼ်းမိူင်းၵႂႃႇပၼ်သဵၼ်ႈမၢႆလူင်းၸိုဝ်ႈ တီႈလုမ်းသေ လၢတ်ႈဝႃႈ တေႁဵတ်းပၼ်မၢႆၾၢင်ဝႂ်ၶႅင်(ႁိုဝ်) သမၢတ်ႉၵၢတ်ႉ ။

ၵူၼ်းမိူင်းၽျၢၵ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းဝၢၼ်ႈဢွၼ်ၵၼ်ၵႂႃႇႁဵတ်းဝႂ်သမၢတ်ႉၵၢတ်ႉ။ တၢင်းၾၢႆႇ လဝၵ ယွၼ်းတူၺ်းမၢႆၾၢင် မၢတ်ႉပူင်ႇတိၼ်ႇ သေ   သၵႅၼ်ႊ(scann) ဢဝ်မၢၵ်ႇတႃဝႆႉ။ ၸႂ်ႉတဵၵ်းလၢႆး ႁူဝ်မႄႈမိုဝ်း ၸိူဝ်းၼႆႉတင်းမူတ်းၸႂ်ႉၶိူင်ႈၸၢၵ်ႈႁဵတ်းလွၼ်ႉလွၼ်ႉ ။ လွင်ႈတေႁဵတ်းသမၢတ်ႉၵၢတ်ႉၼႆႉ ၾၢႆႇလဝၵ လၢတ်ႈယူႇ ၸဵမ်မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇပုၼ်ႉသေတႃႉ ၸင်ႇႁႃမႃးႁဵတ်းပၼ်ယၢမ်းလဵဝ် ။ တေမီးၽႅၼ်ၵၢၼ်သင် တႄႉဢမ်ႇႁူႉ  ” – ဝႃႈၼႆ။

ဝၢႆးသေ လူင်းၸိုဝ်ႈပၼ်သဵၼ်ႈမၢႆ တႃႇႁဵတ်း ဝႂ်ၶႅင် သမၢတ်ႉၵၢတ်ႉယဝ်ႉ ၾၢႆႇထတ်းၵူၼ်းၶဝ်ႈမိူင်း လဝၵ ပၼ်ဝႆႉ ဝႂ်ၸူဝ်ႈၶၢဝ်း ဢၼ်ပႃး ၶိဝ်ႊဢႃႊ ၶူတ်ႉ QR Code  ။

ၵူၼ်းၼႂ်းပိုၼ်ႉတီႈဝဵင်းမိူင်းၽျၢၵ်ႈၵေႃႉၼိုင်ႈသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “  ပေႃးလူင်းၸိုဝ်ႈ ပၼ်သဵၼ်ႈမၢႆယဝ်ႉ ၶဝ်ပၼ်ဝႆႉ ဝႂ်ၸူဝ်ႈၶၢဝ်း။  ၶႂ်ႈငၢႆးမိူၼ် ဝႂ်ၶၢမ်ႈၶူဝ်တႃႈၶီႈလဵၵ်း-မႄႈသၢႆဝႆႉ ။ သႂ်ႇဝႆႉပၼ်ပႃး ၶိဝ်ႊဢႃႊ ၶူတ်ႉ  ။ ပေႃးထိုင် 6 လိူၼ်ၶဝ်ၸင်ႇတေပိၼ်ႇပၼ် မၢႆၾၢင်သမၢတ်ႉၵၢတ်ႉ ။ တေလႆႈဢဝ်ဝႂ်ဢၼ်ပႃး ၶိဝ်ႊဢႃႊ ၶူတ်ႉ  ၼႆႉလႄႈတင်းဝႂ်မၢတ်ႉပူင်ႇတိၼ်ႇၵဝ်ႇသေၵႂႃႇလႅၵ်ႈဢဝ်ၶိုၼ်း ၊ တၢင်ႇၸႄႈဝဵင်းၵေႃႈ လႅပ်ႈတေသင်ႇႁဵတ်းယူႇယဝ်ႉ  ” – ဝႃႈၼႆ။

လိူဝ်သေ မိူင်းၽျၢၵ်ႈယဝ်ႉ ၵူၼ်းမိူင်းၼႂ်း ၸႄႈဝဵင်းၵဵင်းတုင်ၵေႃႈ ၾၢႆႇၵူတ်ႇထတ်းၵူၼ်းၶဝ်ႈမိူင်း လဝၵ  သင်ႇႁႂ်ႈၵူၼ်းမိူင်းၵႂႃႇလူင်းၸိုဝ်ႈ ပၼ်သဵၼ်ႈမၢႆတႃႇလႅၵ်ႈမၢႆၾၢင် မၢတ်ႉပူင်ႇတိၼ်ႇၵဝ်ႇ လႅၵ်ႈပဵၼ်သမၢတ်ႉၵၢတ်ႉ- လႆႈႁူႉၼင်ႇၼႆ ။