ၵႃးတင်းရူတ်ႉၶိူင်ႈၽႃႇၵၼ်တီႈသႅၼ်ဝီ ၵူၼ်းၸၢႆးၵေႃႉၼိုင်မၢတ်ႇၸဵပ်းႁၢဝ်ႈႁႅင်း ၶႃႁၢၵ်း လႆႈႁၢမ်သူင်ႇႁူင်းယႃ။
မိူဝ်ႈဝႃး ဝၼ်းတီႈ 28/6/2023 ယၢမ်းၵၢင်ဝၼ်း 12 မူင်းပၢႆၼၼ်ႉ ၵႃးတင်းရူတ်ႉၶိူင်ႈၽႃႇၵၼ်ၼိူဝ်သဵၼ်ႈတၢင်း သႅၼ်ဝီ-လႃႈသဵဝ်ႈ တီႈဝၢၼ်ႈၼမ်ႉႁူးတဝ်ႇ ၸႄႈဝဵင်းသႅၼ်ဝီ ။
ၸုမ်းၸွႆႈတူင်ႇဝူင်းၵူၼ်းသႅၼ်ဝီ(အနှိုင်းမဲ့ကုသိုလ်)လၢတ်ႈတီႈၽူႈတွႆႇႁွၵ်ႈဝႃႈ – “ ၵႃးတင်းရူတ်ႉၶိူင်ႈ ၽႃႇၵၼ်ႁႅင်း။ ၵႃးလမ်းၼၼ်ႉ လႅပ်ႈတေလူင်းၵႂႃႇတၢင်းလႃႈသဵဝ်ႈ။ ရူတ်ႉၶိူင်ႈၼၼ်ႉတႄႉ လုၵ်ႉတၢင်းလႂ်မႃး တေၵႂႃႇတၢင်းလႂ် ဢမ်ႇတၼ်းလႆႈႁူႉ။ တီႈၶဝ်ၽႃႇၵၼ်ၼႆႉ ပဵၼ်ၾၢႆႇသၢႆႉတၢင်း ဢၼ်လုၵ်ႉသႅၼ်ဝီ တေလူင်းၵႂႃႇ လႃႈသဵဝ်ႈ ။ ၵူၼ်းၶီႇရူတ်ႉၶိူင်ႈၼၼ်ႉ ၶႅၼ်ၾၢႆႇသၢႆႉႁၢၵ်း ၼႃႈၶႅင်ႈၾၢႆႇသၢႆႉ လႅဝ်။ လႅပ်ႈပဵၼ်မၢၵ်ႇၵႃးယဵပ်ႇၼိုတ်ႈသႂ်ႇ။ ၸဝ်ႈၵႃးတႄႉ ပလိၵ်ႈၶဝ်ႁွင်ႉၵႂႃႇၵူတ်ႇထတ်းထဵတ်ႈထၢမ်ယဝ်ႉ ” – ဝႃႈၼႆ။
ၵူၼ်းၸၢႆးၵေႃႉဢၼ်မၢတ်ႇၸဵပ်းၼႆႉ ဢႃယုမီး 40 ပၢႆ ။ ပဵၼ်ၵူၼ်းဝၢၼ်ႈတၢင်းဝၢၼ်ႈၼႃးၼွႆႉ လႄႈတင်း ဝၢၼ်ႈၵွင်းႁေႃၸႄႈဝဵင်းသႅၼ်ဝီ။ ၸုမ်းၸွႆႈတူင်ႇဝူင်းၵူၼ်း ဝဵင်းသႅၼ်ဝီ ၸွႆႈဢဝ်တူဝ် သူင်ႇထိုင်ႁူင်းယႃ လူင်သႅၼ်ဝီ၊ ႁွႆးၸဵပ်းႁၢဝ်ႈႁႅင်းလႄႈ လႆႈသိုပ်ႇသူင်ႇတူဝ်ထိုင် ႁူင်းယႃလူင်လႃႈသဵဝ်ႈလႆႈႁူႉၼင်ႇၼႆ။
မိူဝ်ႈဝၼ်းတီႈ 26/6/2023 ၼၼ်ႉၵေႃႈ ၵႃးလမ်းၼိုင်ႈ ပဵၼ်ၽေးၵိုင်ႉၵၢင်ႉ ၽႃႇမႅၼ်ႈသဝ်ၾႆးၾႃႉ ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင် ႁိမ်းဝၢၼ်ႈၼွင်မွင်းၸႄႈဝဵင်းသႅၼ်ဝီၼၼ်ႉသေ မၢတ်ႇၸဵပ်းႁၢဝ်ႈႁႅင်း 1 လႄႈ လူႉတၢႆ 3 ။
မိူဝ်ႈဝၼ်းတီႈ 26/6/2023 ၼၼ်ႉၵူၺ်းၼင်ႇၵဝ်ႇ ၵႃးလမ်းၼိုင်ႈႁေႃႈမႃးၸွမ်းသၼ်လွႆၼႂ်းၵႄႈ ပၢင်သၢင်းလႄႈတၢင်ႉယၢၼ်း၊ ၵႃးၶိုၼ်းထွႆလင်သေ တူၵ်းၵႂႃႇၼႂ်းႁူၺ်ႈလိုၵ်ႉ 400 ပေႇ ၵူၼ်းႁေႃႈၵႃးတၢႆထင်တီႈၼႆ ၸုမ်းၶႄၾႆးဢၼ်ၵႂႃႇၸွႆႈထႅမ်ပၼ်ၼၼ်ႉလၢတ်ႈၼင်ႇၼႆ။
