ၶၢဝ်းတၢင်း 5 လိူၼ်ပၢႆမႃးၼႆႉ ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း (လဝၵ) ဢထမ်ႇမ ၵဵပ်းငိုၼ်းၼမ် တီႈၵူၼ်းၸိူဝ်းႁဵတ်းပပ်ႉ လႅင် (ဝႂ်ၶၢမ်ႈမိူင်း) တီႈၽၵ်းတူလႅၼ်လိၼ်တႆး – ၶႄႇ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) 1 ၵေႃႉလႂ် ၵဵပ်းထိုင် 1,000 ယႂၼ် (မႅၼ်ႈငိုၼ်းမၢၼ်ႈမွၵ်ႈ 3 သႅၼ်ပျႃး)။

တႄႇဢဝ် ဝၼ်းတီႈ 8/1/2023 ၼၼ်ႉမႃး ယူႇတီႈ လူင်ပွင်ၸိုင်ႈမိူင်းၶႄႇ ပိုတ်ႇၽၵ်းတူမိူင်း ၸွမ်းလႅၼ်လိၼ်တႆး – ၶႄႇ ပဵၼ် တၢင်းၵၢၼ်မႃးသေ ၾၢႆႇၵူတ်ႇထတ်းၵူၼ်းၶဝ်ႈမိူင်း (လဝၵ) တႂ်ႈသိုၵ်းမၢၼ်ႈ ၵုမ်းၵမ် တဵၵ်းၵဵပ်းငိုၼ်း တီႈ ၵူၼ်းမိူင်း ၸိူဝ်းဢမ်ႇၸႂ်ႈၵူၼ်းၼႂ်းပိုၼ်ႉတီႈ မိူၼ်ၼင်ႇ ဝဵင်းၼမ်ႉၽႃႈ၊ လၢဝ်ႇၵၢႆး၊ ၵုၼ်လူင်လႄႈ ႁူဝ်ပၢင်ႇ ၸိူဝ်းၼႆႉ 1 ၵေႃႉလႂ် လႆႈပၼ် တီႈဢေႇသုတ်း 500 ယႂၼ် ထိုင် 1,000 ယႂၼ် (ငိုၼ်းၶႄႇ) ၼႆယဝ်ႉ။

ၵူၼ်းပိုၼ်ႉတီႈ ဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၸုမ်းလဝၵ ႁဵတ်းၵိၼ် ၵဵပ်းငိုၼ်းၵမ်းသိုဝ်ႈ ။ ပေႃး ပဵၼ်ၵူၼ်းထုင်ႉပဵင်းၸၢဝ်းမၢၼ်ႈၶဝ် ၶိုၼ်ႈမႃး 1 ၵေႃႉလႂ် လႆႈပၼ် တီႈဢေႇသုတ်းမၼ်း 500 ယႂၼ် ထိုင် 1,000 ယႂၼ်။ ၵူၼ်းမိူင်းတႆးၵေႃႈ လႆႈပၼ်ငိုၼ်းၼမ်မိူၼ်ၵၼ်။ ၸွမ်းၼင်ႇ ပိူင်ၶဝ်ဢွၵ်ႇဝႆႉ တႃႇႁဵတ်း ပၼ်ပပ်ႉလႅင်ၼႆႉ တေလႆႈၶႂၢင်ႉ ႁဵတ်းပၼ် ၵူၼ်းပိုၼ်ႉတီႈ 4 ၸႄႈဝဵင်း ဢၼ်ယူႇသဝ်းၸွမ်းလႅၼ်လိၼ်ၼႆႉၵူၺ်း။ ယၢမ်းလဵဝ် ဢမ်ႇၸႂ်ႈၸိူင်ႉၼႆ ပေႃးပဵၼ်ၵူၼ်းမိူင်း ဢမ်ႇၸႂ်ႈၼႂ်း 4 ၸႄႈဝဵင်းၼႆႉ ၶဝ်တေႁဵတ်းပၼ် ပပ်ႉလႅင်သေ ၵဵပ်းငိုၼ်းၼမ်။ ၶဝ်ႁဵတ်းပၼ်လႆႈၵူႈၵေႃႉ ပေႃးမီးငိုၼ်းၼမ်တႄႉ”- ဝႃႈၼႆ။

ၵူၼ်းပိုၼ်ႉတီႈ ဢၼ်လႆႈၶႂၢင်ႉ ႁဵတ်းလႆႈပပ်ႉလႅင် (ဝႂ်ၶၢမ်ႈမိူင်း) တီႈလႅၼ်လိၼ်တႆး – ၶႄႇ (ဝဵင်းၼမ်ႉၽႃႈ –  မိူင်းတိင်) ၼႆႉ တေလႆႈပဵၼ်ၵူၼ်းပိုၼ်ႉတီႈ ၼႂ်းၸႄႈဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ၊ ႁူဝ်ပၢင်ႇလႄႈ ၵုၼ်လူင် ၸိူဝ်းၼႆႉ 1 ၵေႃႉလႂ် လႆႈပၼ် ၵႃႈႁဵတ်း ပပ်ႉလႅင် 40 ယႂၼ် (မႅၼ်ႈငိုၼ်းမၢၼ်ႈ 11,000 ပျႃးပၢႆ)။ ၼႂ်း 4 ၸႄႈဝဵင်းၼႆႉ တႃႇၸႄႈဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) တႄႉ ပဵၼ်ၼႂ်းၼႃႈလိၼ်တပ်ႉသိုၵ်းၵဝ်ႈၵၢင်ႉ (MNDAA) ၵုမ်းၵမ်။ ဝဵင်းႁူဝ်ပၢင်ႇသမ်ႉ ပဵၼ်ၼႂ်းၼႃႈလိၼ်တပ်ႉ သိုၵ်းဝႃႉ (UWSA) ၵုမ်းၵမ်လႄႈ ဝဵင်းၵုၼ်လူင်သမ်ႉ ပဵၼ်ၼႂ်းပိုၼ်ႉတီႈ လူင်ပွင်ၸိုင်ႈမၢၼ်ႈ ၵုမ်းၵမ်။  

ၽၵ်းတူလႅၼ်လိၼ်တႆး – ၶႄႇ တီႈဝဵင်းၼမ်ႉၽႃႈ – မိူင်းတိင်ၼႆႉ ပဵၼ်သဵၼ်ႈတၢင်းၵႃႉၶၢႆလူင် သဵၼ်ႈၼိုင်ႈ ဢၼ်လုၵ်ႉတၢင်း မိူင်းမၢၼ်ႈ – မိူင်းတႆး တေႃႉသူင်ႇၸူးၶဝ်ႈမိူင်းၶႄႇ ၶူဝ်းသူၼ် မိူၼ်ၼင်ႇ ဢွႆႈ၊ ယၢင်၊ ၶဝ်ႈၵၢပ်ႇ၊ တႅင်၊ ထူဝ်ႇလႄႈ ၶူဝ်းၵုၼ်ႇႁႅင်ႈ ၸိူဝ်းၼႆႉ။

မိူၼ်ၼၼ် ၼင်ႇၵဝ်ႇ တီႈၽၵ်းတူလူင် (သူၺ်ႇၼၢၼ်းတေႃႇ) ဝဵင်းမူႇၸေႊ လႅၼ်လိၼ်တႆး – ၶႄႇ ၼၼ်ႉၵေႃႈ ၽူႈမီးပုၼ်ႈ ၽွၼ်း တၢင်းၾင်ႇမိူင်းႁူမ်ႈတုမ်ၼႆႉ ဢထမ်ႇမ ၵဵပ်းငိုၼ်း ၵႃႈႁဵတ်းဝႂ်ၶၢမ်ႈမိူင်းၵမ်းလဵဝ် ပေႃးၵႂႃႇႁဵတ်းႁင်းၵူၼ်း  1 ၵေႃႉလႂ် 10,000 ပျႃး 20,000 ပျႃး တေလႆႈပႂ်ႉႁိုင်ဝၼ်းသွင်ဝၼ်း သင်ဝႃႈ ၸၢင်ႈၵူၼ်းၵၢင်ႁဵတ်းပၼ်သမ်ႉ 50,000 ပျႃး လႆႈၵမ်းလဵဝ်။ ၵူႈပွၵ်ႈ မိူဝ်ႈပႆႇပဵၼ်ၶူဝ်ႊဝိတ်ႉ 19 ၼၼ်ႉ 1 ၵေႃႉ လႆႈပၼ် 500 ပျႃးၵူၺ်း ဝႃႈၼႆ။

ၽၵ်းတူလႅၼ်လိၼ်တႆး – ၶႄႇၼႆႉ ပိၵ်ႉဢိုတ်းမႃး ၶၢဝ်းတၢင်းၸမ် 3 ပီ တႄႇဢဝ် ဝၼ်းတီႈ 1/4/2020 တေႃႇထိုင် 8/1/2023 ၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်း ။