မိူဝ်ႈၼႆႉ ဝၼ်းတီႈ 27/10/2023 ယၢမ်းၵၢင်ၼႂ် ပလိၵ်ႈမၢၼ်ႈ ဢၼ်ပႂ်ႉၵူတ်ႇထတ်း တီႈၵဵၵ်ႉ ၼႂ်းၵႄႈဝဵင်းၼမ်ႉၽႃႈ – လၢဝ်ႇၵၢႆး ထုၵ်ႇသိုၵ်းၵူဝ်ႈၵၢင်ႉ MNDAA ၶဝ်ႈလူမ်ႇယိုဝ်း တၢႆထင်တီႈ ဢမ်ႇယွမ်း 20 ၵေႃႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းၵူဝ်းၵၢင်ႉ လူမ်ႇယိုဝ်း မိူဝ်ႈၼႆႉ ယၢမ်း ၵၢင်ၼႂ်ၸဝ်ႉၶႃႈဢေႃႈ။ ပလိၵ်ႈမၢၼ်ႈ ဢၼ်ပႂ်ႉတီႈၵဵၵ်ႉၼၼ်ႉ လူႉတၢႆ တင်းၼမ်ၶႃႈ။ ၵဵၵ်ႉၼၼ်ႉ ပဵၼ်ၵဵၵ်ႉၵူတ်ႇထတ်း ၵူၼ်းၶဝ်ႈ ဢွၵ်ႇ တီႈဝဵင်းၼမ်ႉၽႃႈ ႁိမ်းသူၼ်ယၢင် ၼႂ်းၵႄႈလၢဝ်ႇၵၢႆး – ဝဵင်းၼမ်ႉၽႃႈၶႃႈ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ ၵူၼ်းမိူင်း ၼႂ်းဝဵင်းၼမ်ႉၽႃႈ ၸိူဝ်းၼႆႉ ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈဝႆႉတၢင်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ တီႈၼမ်ႉတိုၵ်း ထႅင်ႈတင်းၼမ်။
“ၸႂ်ႈၶႃႈဢေႃႈ ပဵၼ်ၵူၼ်းပိုၼ်ႉတီႈလႄႈ ၵူၼ်းမႃးႁဵတ်းၵၢၼ် တီႈဝဵင်းၼမ်ႉၽႃႈ ၸိူဝ်းၼႆႉ ဢွၼ်ၵၼ်ပၢႆႈၶိုၼ်ႈၵႂႃႇတၢင်းၼိူဝ်ဝဵင်း ၼမ်ႉၽႃႈၼႆႉသေ ယူႇတီႈ တပ်ႉသိုၵ်ႉဝႃႉၶဝ် ပိုတ်ႇပၼ်ၶူဝ် ယၢမ်းလဵဝ် ၵူၼ်းဝဵင်းၼမ်ႉၽႃႈ ပၢႆႈၵႂႃႇသွၼ်ႈဝႆႉ တီႈၼမ်ႉတိုၵ်း ၼႂ်း ၼႃႈလိၼ်တပ်ႉသိုၵ်းဝႃႉၼၼ်ႉ တင်းၼမ်ၶႃႈဢေႃႈ”- ၵူၼ်းပိုၼ်ႉတီႈ ဝဵင်းၼမ်ႉၽႃႈ သိုပ်ႇလၢတ်ႈ ၼႄၼင်ႇၼႆ။
မိူဝ်ႈၼႆႉ ယၢမ်းၵၢင်ၼႂ် ၶူဝ်လူင် ဢၼ်လုၵ်ႉတၢင်းၵုၼ်လူင် – ႁူဝ်ပၢင်ႇ ၵၢႆႇၸူးၵၼ်ဝႆႉၼၼ်ႉ ထုၵ်ႇယႃႉလႅဝ်ယဝ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၵုၼ်လူင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈဝဵင်းႁူဝ်ပၢင်ႇၼႆႉ ၸုမ်းဢူၺ်းလီပွတ်းႁွင်ႇၶဝ် လွမ်ႉ ႁွပ်ႈဝႆႉမူတ်းယဝ်ႉ။ ယဝ်ႉၵေႃႈ တီႈၶူဝ်ၵုၼ်လူင် – ႁူဝ်ပၢင်ႇ ဢၼ်ၵၢႆႇၸူးၵၼ်ဝႆႉၼၼ်ႉ ထုၵ်ႇယႃႉၵွႆယဝ်ႉ။ ပဵၼ် ၸုမ်းလႂ်ယႃႉတႄႉ ဢမ်ႇႁူႉ။ ႁဝ်းၶႃႈ ထၢင်ႇတႄႉ ယွၼ်ႉၸုမ်းဢူၺ်းလီၶဝ် ၶဝ်ႈလူမ်ႇယိုဝ်းလႄႈ ၶဝ်ပွႆႇမၢၵ်ႇယႃႉၵွႆၵူၺ်း။ ၶဝ်ၵူဝ်သိုၵ်းမၢၼ်ႈ ထႅမ် ႁႅင်းၶဝ်ႈမႃးၵေႃႈ ၸၢင်ႈပဵၼ်လႆႈ။ ယူႇတီႈ သိုၵ်းမၢၼ်ႈသေ ယႃႉၵွႆတႄႉ ဢမ်ႇပဵၼ်လႆႈ။ လႆႈငိၼ်းဝႃႈ ယၢမ်းၵၢင်ဝၼ်း 11 မူင်း ၶိုင်ႈၼႆႉ သိုၵ်းၵူဝ်းၵၢင်ႉၶဝ် သိမ်းလႆႈလၢဝ်ႇၵၢႆးယဝ်ႉ”- ဝႃႈၼႆ။
မိူဝ်ႈၼႆႉ ယၢမ်းၵၢင်ဝၼ်းမွၵ်ႈ 11 မူင်း သိုၵ်းမၢၼ်ႈ ဢဝ်ၶိူင်ႈမိၼ် မႃးပၼ်ႇလဵပ်ႈတၢင်း ၸႄႈဝဵင်းၼမ်ႉၽႃႈ – လၢဝ်ႇၵၢႆးလႄႈ တၢင်းၸႄႈဝဵင်းသႅၼ်ဝီ ၸိူဝ်းၼႆႉထႅင်ႈ။ ယဝ်ႉၵေႃႈ ၸွမ်းၵၢတ်ႇလူင် သႅၼ်ဝီ ၸိူဝ်းၼႆႉၵေႃႈ သိုၵ်းၵူဝ်းၵၢင်ႉ ဢဝ်တီႈယူႇဝႆႉမူတ်း ယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “တီႈဢိူင်ႇၸေႈဢူၼႆႉ သိုၵ်းၵူဝ်းၵၢင်ႉ ဢမ်ႇပၼ်ၵူၼ်းမိူင်း ဢွၵ်ႇႁိူၼ်း ပေႃးၽႂ်ဢွၵ်ႇၵေႃႈ ထုၵ်ႇၵုမ်းၶင်တူဝ်ဝႆႉ ၵူၼ်းမိူင်းၶႂ်ႈၵႂႃႇႁႆႈၵႂႃႇၼႃးၵေႃႈ ဢမ်ႇပၼ်ၽႂ်ၵႂႃႇ။ ယဝ်ႉၵေႃႈ ၸုမ်းဢူၺ်းလီၶဝ် ပိုၼ် ၽၢဝ်ႇဢွၵ်ႇဝႆႉ တႄႇဢဝ် လႃႈသဵဝ်ႈထိုင် မူႇၸေႊၼႆႉ ၵႃးၵူၼ်းမိူင်း ၵႃးတၢင်ႇၵုၼ်ႇ တေဢမ်ႇလႆႈၵႂႃႇမႃး သင်ဝႃႈ ၵႂႃႇမႃးၸိုင် တေမၵ်းမၼ်ႈဝႃႈ ပဵၼ်ယၼ်ႇသူႇၶဝ် သဵၼ်ႈတၢင်းလူင်ၼႆႉ ပိၵ်ႉဝႆႉဢေႃႈ”- ဝႃႈၼႆ။
လိူဝ်ၼၼ်ႉ တီႈတပ်ႉသိုၵ်းမၢၼ်ႈ ၶလယ 420 တီႈဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၼၼ်ႉၵေႃႈ ထုၵ်ႇသိုၵ်းတဢၢင်း TNLA ဢဵၼ်ႁႅင်းမွၵ်ႈ 300 လုၵ်ႉတၢင်း ဢိူင်ႇမိူင်းယေႃသေ ၶဝ်ႈလူမ်ႇယိုဝ်း မိူဝ်ႈၼႆႉ ဝၼ်းတီႈ 27 ယၢမ်းၵၢင်ၼႂ်ၸဝ်ႉ ႁဵတ်းႁႂ်ႈ ၵူၼ်းဝၢၼ်ႈၵၢတ်ႇ၊ ဝၢၼ်ႈလူင် ပၢႆႈၽေးသိုၵ်း ၵႂႃႇသွၼ်ႈဝႆႉတီႈ ဝတ်ႉမုၼ်ၸဝ်ႈ ဝၢၼ်ႈလူင် ႁူဝ်ၵူၼ်းတင်း ၼမ်။
ၵူၼ်းပိုၼ်ႉတီႈ ဢိူင်ႇမိူင်းၵႅတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ဝၢႆးဝၼ်း 2 မူင်းပၢႆ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း လမ်း ၼိုင်ႈလႄႈ ၶိူင်ႈမိၼ်မႅင်းမီႈ လမ်းၼိုင်ႈ လုၵ်ႉတၢင်းတိူင်းလႃႈသဵဝ်ႈ မႃးပွႆႇမၢၵ်ႇသႂ်ႇ တီႈၾၢႆႇၸၢၼ်းတပ်ႉမိူင်းၵႅတ်ႈၼႆႉ ဢမ်ႇ ယွမ်း 10 လုၵ်ႈ။ ၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ 4 လုၵ်ႈ။ ၶိူင်ႈမိၼ်မႅင်းမီႈ မႃးပွႆႇသႂ်ႇထႅင်ႈ 9 ၵေႃႉ။ ယဝ်ႉ ၵေႃႈ ယိုဝ်းၵွင်ႈၸၢၵ်ႈ သႂ်ႇထႅင်ႈ တင်းၼမ်။ မၢၵ်ႇဢၼ်ၶဝ်မႃးပွႆႇသႂ်ႇၼၼ်ႉ တူၵ်းၸွမ်းၼႂ်းသူၼ်ႁႆႈၼႃး ၵူၺ်းၶႃႈ လွင်ႈတုမ်ႉတိူဝ်ႉသႂ်ႇႁိူၼ်းယေး ၵူၼ်း ဝၢၼ်ႈလူႉတၢႆမၢတ်ႇၸဵပ်းတႄႉ ပႆႇမီး”- ဝႃႈၼႆ။
မိူဝ်ႈၼႆႉ ဝၼ်းတီႈ 27 တႄႇဢဝ် ယၢမ်းၵၢင်ၼႂ်ၸဝ်ႉ 4 မူင်း ၸုမ်းဢူၺ်းလီ ပွတ်းႁွင်ႇ မိူၼ်ၼင်ႇ – သိုၵ်းၵူဝ်းၵၢင်ႉ MNDAA၊ သိုၵ်းတဢၢင်း TNLA ၊ သိုၵ်းၶၢင် KIA လႄႈ သိုၵ်းရၶႅင်ႇ AA ႁူမ်ႈလူၺ်ႈ ၸုမ်းၵႅတ်ႇၶႄၵူၼ်းမိူင်း PDF လူမ်ႇယိုဝ်း တပ်ႉ သိုၵ်းမၢၼ်ႈ ယိုတ်းမိူင်း ၼႂ်းမိူင်းတႆး မႃးၶိူဝ်းယႂ်း တႄႇဢဝ် ဝဵင်းလႃႈသဵဝ်ႈ၊ သႅၼ်ဝီ၊ ၵုၼ်လူင်၊ ႁူဝ်ပၢင်ႇ၊ ဝဵင်းၼမ်ႉၽႃႈ၊ လၢဝ်ႇ ၵၢႆး၊ ၵူတ်ႉၶၢႆ၊ ၼမ်ႉၶမ်းလႄႈ မူႇၸေႊ ၸိူဝ်းၼႆႉ။
ယွၼ်ႉပၢင်တိုၵ်းၼႆႉသေ ၵူၼ်းပိုၼ်ႉတီႈ ဝဵင်းလႃႈသဵဝ်ႈ မိူၼ်ၼင်ႇ ဝၢၼ်ႈမွၼ်း၊ ဝၢၼ်ႈပၢင်ၸိူင်း၊ ဝၢၼ်ႈၵုင်းၸူင်၊ ဝၢၼ်ႈ ၵွင်းတပ်ႉ၊ ဝၢၼ်ႈၵွင်းၵေး၊ ဝၢၼ်ႈမၢၵ်ႇၶီႈၼူ ၸိူဝ်းၼႆႉသမ်ႉ ပၢႆႈမႃးသွၼ်ႈဝႆႉ တီႈဝတ်ႉႁူဝ်ပိုၵ်ႉ ႁူဝ်ၵူၼ်း 150 ပၢႆ။ ယဝ်ႉ ၵေႃႈ ၸိူဝ်းပၢႆႈ ႁွတ်ႈထိုင်ဝႆႉ တီႈဝတ်ႉမၢၼ်ႈသူႈထႅင်ႈ ႁူဝ်ၵူၼ်း 300 ပၢႆ ၼႆႉသမ်ႉ ပဵၼ်ၵူၼ်းဝၢၼ်ႈမၢၵ်ႇၶီႈၼူ၊ ပၢင်ၸိူင်း၊ ၵွင်းၽိဝ်၊ ဝၢၼ်ႈမွၼ်းလႄႈ ဝၢၼ်ႈႁူဝ်ၼမ်ႉ ၸိူဝ်းၼႆ။
